Navigation

Inhaltsbereich

Durant las lavurs da protecziun cunter la corrosiun vi da la platta dal vial sto la punt sur il Rain a La Punt/Rehenau vegnir serrada da glindesdi, ils 20 d'avrigl, fin mesemna, ils 3 da zercladur 2015. Questas lavurs èn ina part da la reparatura cumplessiva da la punt.

L'onn passà èn vegnidas prendidas mesiras per rinforzar la punt a giatrera e la platta dal vial è vegnida remplazzada. Pervia da la trida aura n'han las lavurs da protecziun cunter la corrosiun vi da la platta dal vial betg pudì vegnir realisadas sco giavischà. Uschia sto la punt sur il Rain vegnir serrada questa primavaira anc ina giada durant bundant sis emnas. Peduns e velocipedists pon traversar la punt durant quest temp sur in piogn separà. Per il traffic motorisà vegn signalisada ina deviaziun.

La punt sur il Rain a La Punt/Rehenau vegn reparada durant ils onns 2014 e 2015 en moda cumplessiva. Il project da reparaziun prevesa da glimar giu cumplettamain la protecziun da corrosiun vertenta e da la remplazzar tras in sistem da surtratga da pliras vettas. Als lieus sensibels sco per exempel tar las sfessas tranter las singulas parts purtantas vegnan fixadas stuppadiras supplementaras resp. surtratgas autamain flexiblas. Ultra da quai duain questas parts sensiblas vegnir fixadas cun struvas. Grazia a questas mesiras vegn cuntanschida ina durada da protecziun da 40 onns. Il vial da betun actual vegn remplazzà tras ina platta d'atschal che va d'ina vart da la punt a l'autra. Sin quella vegn fixada ina cuvrida satiglia e betg memia groppa. Per augmentar la durada d'utilisaziun da questa construcziun artifiziala istorica èn planisadas ulteriuras mesiras da rinforz che na midan però betg l'apparientscha da la punt. Ils custs vegnan calculads cun circa 4 milliuns francs.

Ulteriuras infurmaziuns: TBA-info dal 21.07.2014