Modificaziun da la via en il vitg da Mulegns
La via dal Güglia è ina da las colliaziuns da via las pli impurtantas cun l'Engiadina ch'èn avertas l'entir onn. Il traject en il vitg da Mulegns è caracterisà d'ina stretga che ha mo in vial e nua ch'i dat adina puspè collisiuns e strivladas da vehichels gronds cun ils edifizis cunfinants. Questa problematica duai vegnir schliada cun adattar commensuradamain la via e cun mantegnair il medem mument la "Chasa alva".
© Clavuot
Gia dapi 20 onns exista l'intenziun d'eliminar la stretga da la via dal Güglia. Durant ils onns suandants èn vegnids elavurads e puspè refusads differents projects. L'execuziun dal project planisà porscha a las abitantas ed als abitants dal vitg sco er al chantun la gronda schanza da realisar ina soluziun avantagiusa cun in passadi fluid e segir. Premess ch'il project survegnia vigur legala, po l'uffizi da construcziun bassa dal Grischun cumenzar la stad 2019 cun las lavurs da construcziun.
Ziele des Projekts
Cun engrondir la stretga, quai vul dir cun adattar parzialmain la fatschada da la "Chasa alva" vegn stgaffì in profil interiur ch'è aut avunda per camiuns e per bus. Grazia al trassé adattà pon sa cruschar autos da persunas sin quest traject. Per las pedunas ed ils peduns vegn stgaffida ina colliaziun nova e segira che passa tranter la "Chasa alva" ed il Ragn da Faller. Cun quest project vegn meglierada l'entira survesaivladad e garantida uschia ina circulaziun dal traffic segira e fluida sin il traject en il vitg.
Concurrenza per la nova concepziun
La modificaziun da la via principala tanghescha l'apparientscha dal center dal vitg da Mulegns. Perquai ha l'uffizi da construcziun bassa publitgà la stad 2018 ina concurrenza da studi cun quatter biros d'architectura per evaluar sin questa via la soluziun la meglra pussaivla per il vitg sco er per il traffic sin via. Questa situaziun pretensiusa, cun la quala ha stuì vegnir chattà in equiliber tranter ils interess cuntraris dal traffic sin via e dal maletg dal vitg creschì istoricamain, ha dumagnà il biro d'architectura Clavuot da Cuira. Cun in'adattaziun geometrica eleganta da la "Chasa alva" ha Clavuot persvadì la giuria en spezial cun sia intervenziun commensurada e cun las proporziuns armonicas creadas da nov.
Il project victur
Cun il project victur è avant maun ina concepziun stabila che respecta il center istoric dal vitg, che pussibilitescha in'utilisaziun raschunaivla e che sa lascha realisar ensemen cun il project da vias da l'uffizi da construcziun bassa. L'uffizi da construcziun bassa ha surpiglià las parts relevantas dal project victur liantamain en il project d'exposiziun "Correcziun da la via en il vitg da Mulegns". Questa varianta porta avantatgs per l'impressiun generala dal project, ina plivalur concernent il mantegniment da la substanza architectonica da la "Chasa alva" sco er per la segirezza da las pedunas e dals peduns.
L'exposiziun
Las actas da project inclusiv il rapport da la giuria davart ils quatter studis èn exponids per l'invista dals 19 da november fin ils 18 da december 2018 en l'administraziun communala da Surses. Durant il temp d'exposiziun pon ellas vegnir consultadas e chargiadas giu sut Aktuelles > Projektauflagen. Ultra da quai vegnan exponids publicamain a Mulegns ils quatter studis sco er il project da via: en la "Chasa cotschna", Veia Gelgia 30, 7455 Mulegns, en il suler principal dal plaunterren sco er sin l'emprim plaun. Questa exposiziun dura dals 20 fin ils 23 da november 2018 da las 14.00 fin las 18.00.
Fotobeilagen: