Sonda, ils 21 d'avust 2010, envida l'uffizi da construcziun bassa dal Grischun la populaziun interessada ad in di da visita public dal plazzal tranter Mustér e Sedrun. Quest plazzal è zunt interessant pervia da la tecnica da construcziun che vegn applitgada. La preschentaziun dal project ed il guid cumenzan mintgamai a las 09.00, a las 10.30 ed a las 13.30 e duran ca. 1½ uras. Il lieu da scuntrada sa chatta en l'aula da la chasa da scola da Sedrun.

La correcziun da la via Garmischeras - Tscheppa è la part centrala da las lavurs dal traject stretg tranter Mustér e Sedrun che ha ina lunghezza da circa 1 kilometer e ch'è geologicamain difficil. Gia ils onns 1989 fin 1992 èn vegnidas montadas grondas francaziuns per stabilisar la costa ch'è per part instabila. L'avrigl 2009 èsi vegnì cumenzà cun las lavurs principalas da la correcziun da la via. Ellas vegnan fatgas en 3 etappas annualas e senza ch'il traffic stoppia vegnir interrut. Per schlargiar il vial sin ils 7 meters usitads ston vegnir construids tut en tut 950 meters punts a spunda, punts e mirs da sustegn. Actualmain vegn exequida la segunda etappa che po vegnir visitada a chaschun dal di da visita.

program curt