La midada dal cudesch civil svizzer che entra en vigur il 1. da schaner 2013 realisescha l'egualitad dals conjugals en il sectur da la regulaziun dal num e dal dretg da burgais. Mintga conjugal mantegna ses num e ses dretg da burgais. Ils spus pon dentant declerar a chaschun da la maridaglia ch'els veglian purtar il num da nubil da la spusa u dal spus sco num da famiglia cuminaivel. L'uffant da geniturs maridads survegn ubain il num da famiglia cuminaivel ubain – sch'ils geniturs portan differents nums – il num da nubil ch'els han fixà a chaschun da lur mari¬daglia sco num da lur uffants cuminaivels. Sch'ils geniturs n'èn betg maridads in cun l'auter, survegn l'uffant il num da nubil da la mamma. En cas d'ina tgira genituriala cuminaivla, pon ils geniturs declerar che l'uffant duai purtar il num da nubil dal bab. En futur pon partenarias u partenaris declerar a chaschun da la registraziun dal partenadi ch'ellas u els veglian purtar il num da nubil da la partenaria u dal partenari sco num da famiglia cuminaivel.

Quel conjugal che ha midà ses num a chaschun da la maridaglia, mantegna il num suenter la schliaziun da la lètg, saja quai pervia da mort u pervia da divorzi. Ma el po declerar da tut temp envers l'uffiziala u l'uffizial da stadi civil ch'el veglia puspè purtar ses num da nubil. Il medem dretg han quels conjugals che han midà lur num avant il 1. da schaner 2013 a chaschun da la maridaglia.

Quai ch'è vegnì ditg vala confurm al senn er, sch'in partenadi registrà vegn schlià.

Nun ch'i vegnia acceptà puspè il num da nubil vegni permess da midar il num mo, sch'igl existan motivs respectabels (art. 30 al. 1 CCS).


Dumondas frequentas en connex cun il nov dretg da num