Navigation

Inhaltsbereich

Skript-Editor

Einleitung Impfen

A partir da l'october vala ina nova recumandaziun da vaccinar: La vaccinaziun cunter Covid-19 vegn recumandada l'atun/enviern per persunas spezialmain periclitadas. Dunnas en speranza pon survegnir ina vaccinaziun suenter in scleriment individual. A tut las ulteriuras persunas na vegn betg recumandada ina vaccinaziun cunter Covid-19.

Mez october cumainza la stagiun da vaccinar per quist mez-viern. Infuormaziuns in quist connex as rechatta fingià uossa sin la pagina d'internet.

 

Nua poss jau ma laschar vaccinar?

 

Wirkung der Schutzimpfung

Infurmaziuns en las linguas da la populaziun da migraziun
Per migrantas e migrants da la Svizra metta l’UFSP a disposiziun infurmaziuns en diversas linguas.

A tgi vegn recumandada in vaccinaziun l'atun/l'enviern?

A tut las persunas spezialmain periclitadas da 16 onns e dapli vegn recumandada la vaccinaziun cunter COVID-19
l'atun/l'enviern. Latiers tutgan:

  • persunas da 65 onns e dapli
  • persunas da 16 onns e dapli cun ina malsogna cronica
  • persunas da 16 onns e dapli cun trisomia 21

 Cun la vaccinaziun pon las persunas spezialmain periclitadas meglierar lur protecziun cunter grevs decurs da la malsogna per plirs mais. Dunnas en speranza pon survegnir ina vaccinaziun, suenter in scleriment individual cun lur media u medi.

Cetegorias da persunas spezialmain periclitadas (PDF)

Tge vala per dunnas en speranza?

Dunnas en speranza pon survegnir ina vaccinaziun, suenter in scleriment individual cun lur media u medi. En il cas singul po la vaccinaziun far senn, perquai ch'ella meglierescha la protecziun cunter grevs decurs da la malsogna per plirs mais. Tar las variantas actualas dal virus è la ristga da cumplicaziuns da gravidanza u d'ina naschientscha prematura pervia d'ina infecziun pli pitschna che tar las variantas precedentas.

Tge vala per las ulteriuras gruppas da la populaziun?

A tut las persunas sut 65 onns che n'han nagins facturs da ristga, na vegni betg recumandà da sa laschar vaccinar l'atun/enviern cunter COVID-19. Per ellas porscha la vaccinaziun ina protecziun minimala e da curta durada cunter ina infecziun cun in decurs miaivel da la malsogna.

Er a persunas spezialisadas dal sectur da sanadad ed a persunas da tgira na vegn ina vaccinaziun perquai betg recumandada. Vus pudais dentant As laschar vaccinar, sche Vus vulais tenor la valitaziun e la decisiun individuala reducir in zic la ristga d'ina infecziun cun in decurs miaivel.

Infurmaziuns davart la vaccinaziun

Mument da la vaccinaziun
Il mument ideal per la vaccinaziun cunter COVID-19 è tranter mez october e mez december. La vaccinaziun po vegnir fatga a partir da 6 mais suenter l'ultima vaccinaziun ubain a partir da 6 mais suenter ina infecziun cun il coronavirus constatada. Ulteriuras vaccinaziuns cun vaccins inactivads (sco p.ex. la vaccinaziun cunter la grippa) pon vegnir fatgas avant, suenter ubain a medem temp sco ina vaccinaziun cunter COVID-19.

Vaccin
As laschai vaccinar cun in vaccin mRNA adattà a las variantas actualas dal virus u cun il vaccin a basa da proteins adattà da Novavax. I n'emporta betg, cun tge vaccins che las vaccinaziuns d'enfin ussa èn vegnidas fatgas.

Impurtant: Dunnas en speranza, mammas che tezzan sco er persunas cun in sistem d'immunitad fitg flaivel duessan sa laschar vaccinar cun in vaccin mRNA.

Allergias: Sche Vus avais allergias confermadas cunter cumponentas da vaccins, As laschai cussegliar d'ina allergologa u d'in allergolog

Effects secundars
Mintga vaccinaziun po chaschunar effects secundars. Savens èn quels flaivels fin moderads e passan svelt. Tar ils effects secundars frequents tutgan reacziuns al lieu da l'injecziun sco dolurs, cotschnurs ed unfladiras sco er mal il chau e stancladad. Ultra da quai pon sa mussar dolurs dals musculs e da las giugadiras e sintoms generals sco snavurs, sentiment da fevra ubain fevra. 

 Fitg darar datti effects secundars gravants. Uschia pon per exempel singulas persunas avair ina greva reacziun allergica directamain suenter ina vaccinaziun. Ella sa mussa tras ina ferma unfladira, tras cotschnurs, cun murdims u cun difficultads da respirar. En fitg paucs cas han ins observà inflammaziuns dal muscul dal cor u dal pericard entaifer 14 dis suenter la vaccinaziun. La gronda part da questas inflammaziuns èn stadas miaivlas ed han pudì vegnir tractadas bain. Sintoms tipics per ina inflammaziun dal muscul dal cor èn mal il pèz, difficultads da respirar e ferm battacor, per il solit entaifer 2 emnas suenter la vaccinaziun.

I po dar ulteriurs effects secundars. Ils sintoms pon avair ina durada differenta. Annunziai per plaschair maldispostadads gravantas u nunspetgadas che sa mussan suenter la vaccinaziun cunter COVID-19, ad ina media u in medi, ad in'apotecra u in apotecher u al lieu da vaccinaziun. Problems da sanadad pon capitar da tut temp, mintgatant er directamain suenter ina vaccinaziun. Quai na vul betg dir ch'els stoppian esser ina consequenza da la vaccinaziun.

Custs
Ina vaccinaziun recumandada è gratuita e vegn surpigliada da l'assicuranza obligatorica per la tgira da malsauns per

  • persunas spezialmain periclitadas;
  • dunnas en speranza suenter in scleriment individual tras la media u il medi

As orientai en quest connex a la pagina d'internet «Uschia ans protegin nus».

Dumondas frequentas (FAQ)

Dumondas frequentas chattais Vus qua.

Ulteriuras infurmaziuns

Vaccinaziun: Uschia ans protegin nus (UFSP)

Ulteriuras infurmaziuns davart la vaccinaziun (Uffizi federal da sanadad publica)

Infoline Coronavirus (Uffizi federal da sanadad publica): +41 58 463 00 00 (mintga di da las 08.00 fin las 18.00)