Il post spezialisà per la promoziun da la sanadad sustegna projects che rinforzan la promoziun da la sanadad e la prevenziun en il chantun Grischun e che sa cunfan cun la strategia dals fatgs chantunals da sanadad.
Tenor l'artitgel 7 alinea 2 da la Lescha da sanadad po il chantun Grischun pajar contribuziuns finanzialas a projects per la promoziun da la sanadad e per la prevenziun. La calculaziun da las contribuziuns vegn fatga sin basa da l'evaluaziun da la dumonda. Las dumondas da contribuziun ston vegnir inoltradas a la partiziun Promoziun da la sanadad e prevenziun da l'Uffizi da sanadad.
Il dretg da survegnir contribuziuns han projects che vegnan realisads en il chantun Grischun resp. che mettan en il focus la populaziun grischuna sco gruppa en mira.
Da principi èsi pussaivel dad inoltrar dumondas per in sustegn finanzial per ils suandants tips da projects:
Occurrenzas d’impuls
Occurrenzas d’impuls èn arranschaments publics e gratuits d’infurmaziun e da sensibilisaziun che rinforzan la cumpetenza da sanadad e l’autoefficacitad da la populaziun grischuna e promovan in cumportament conscient per la sanadad. Ils temas moviment, nutriment e sanadad psichica vegnan tractads cun metodas attractivas, p.ex. referats specifics, prelecziuns, café narrativ, discussiuns al podium, exposiziuns, films, teater u exercizis pratics. Occurrenzas d’impuls porschan la pussaivladad d’in barat social vicendaivel ed intermedieschan purschidas da promoziun da la sanadad localas e regiunalas a la gruppa en mira.
Ulteriuras infurmaziun e premissas chattais Vus qua: occurrenzas d’impuls
Projects en scolas grischunas
Projects u programs che vegnan realisads en classas u en chasas da scola che contribueschan a rinforzar in stil da viver saun da las scolaras e dals scolars. Per integrar la promoziun da la sanadad e la prevenziun en scola distinguain nus duas pussaivladads:
-
Program: Access a lunga vista e cumplessiv purtà da l’entira scola.
-
Project: durada limitada, po vegnir realisà da singulas classas u da plirs stgalims. Ils project duain esser integrads en il program da scola e/u en l’instrucziun cun ina preparaziun ed ina reflexiun correspundenta.
Documentaziun per las scolas
Project dad organisaziuns d’util public
In dretg a contribuziuns han projects da promoziun da la sanadad dad organisaziuns d’util public resp. betg orientadas al gudogn u da vischnancas che vegnan realisads en il chantun Grischun resp. che sa concentreschan sin la populaziun grischuna sco gruppa en mira.
Documents per organisaziuns d’util public
Cundiziuns formalas
-
Ina dumonda cumpletta sto vegnir inoltrada almain in mais avant l’entschatta dal project. Cun ina resposta pon ins far quint entaifer duas emnas. Retroactivamain n’è in sustegn finanzial betg pussaivel.
-
Ils meds finanzials per sustegnair projects da promoziun da la sanadad e prevenziun èn limitads. Las dumondas vegnan tractadas tenor la data d’inoltraziun. Per finanziar l’entschatta han novs projects preferenza envers tals che sa repetan. I na dat nagin dretg ad in sustegn finanzial.
-
Suenter la realisaziun dal project sto vegnir tramess ina pitschna documentaziun finala ed in rendaquint detaglià cun copias dals quints al Post spezialisà per la promoziun da la sanadad. Sin basa da questas indicaziuns succeda il pajament da la contribuziun.
Finanziaziun
Contribuziuns vegnan concedidas mo
-
Sche l’atgna prestaziun da l’organisatur e las contribuziuns da terzas persunas èn exauridas.
-
Las contribuziuns dal Post spezialisà per la promoziun da la sanadadcuvran maximalmain 50% dals custs totals e per regla betg dapli che 10’000 CHF per project. Per occurrenzas d’impuls maximalmain 2’000 CHF per occurrenza.
-
Cust da persunal da l’organisatur na pon betg vegnir resguardads.
-
Ina contribuziun finanziala è pussaivla per las suandantas expensas: fit per localitads, onuraris per referentas e referents e per persunas da moderaziun, dretgs da preschentaziun, mangiar, publicaziun d’inserats.
-
Sch’i na dat nagin’autra cunvegna, vegn il pajament fatg suenter l’examinaziun dals documents dal rendaquint (documentaziun finala e rendaquint detaglià), cun la cundiziun che las finamiras formuladas en il plan dal project èn vegnidas cuntanschidas.
-
La contribuziun concedida po mo vegnir duvrada per custs dal project.
Criteris d’exclusiun
Nagin sustegn finanzial da vart dal Post spezialisà per la promoziun da la sanadad na survegnan;
-
Projects da natira commerziala
-
Dis da sport resp. champs da sport ed excursiuns che sa repetan mintg’onn
-
Materialias da moviment e d’instrucziun per la plazza da pausa e la stanza da scola
-
Projects che survegnan sustegn finanzial dad autras instanzas chantunalas u da G+S
-
Projects che stattan en conflict cun activitads dal Post spezialisà per la promoziun da la sanadad u da ses partenaris