La prevenziun svizra da la criminalitad (PSC) ha actualisà sia campagna "armas da soft air" en collavuraziun cun l'uffizi federal da polizia. La revisiun da la lescha federala davart las armas ch'è entrada en vigur dacurt è stada il motiv per quai. En la lescha federala vegn reglada il diever da las armas da soft air e d'autras armas d'imitaziun. Ussa èsi scumandà a persunas minorennas da duvrar armas da soft air. Las infurmaziuns sa chattan sin la pagina d'internet www.softairguns.ch.
Er per expertas e per experts èsi difficil da distinguer tranter armas da soft air e dretgas armas da fieu. Sche las armas da soft air vegnan duvradas per smanatschar persunas, er sche quai capita mo cun l'intenziun da giugar, po quai chaschunar reacziuns considerablas: en il stress na chapescha ina persuna smanatschada betg spert e cun tschertezza che l'arma n'è betg privlusa. Instinctivamain reagescha ella uschia sco sch'ella vegniss smanatschada d'ina dretga arma da fieu. Quai vala er per la polizia che reagescha en la medema maniera visavi armas da soft air sco visavi dretgas armas da fieu. Pervia da ses effect da smanatscha sto in'arma da soft air survegnir il medem status sco ina dretga arma. Il legislatur ha consequentamain scumandà a persunas minorennas da duvrar armas da soft air.
La campagna naziunala da prevenziun "armas da soft air" sut la direcziun da la PSC sa drizza ad uffants, a giuvenils, a geniturs, a persunas d'instrucziun ed ad autoritads ed infurmescha davart il privel da scumbigliar armas da soft air cun dretgas armas sco er davart las prescripziuns legalas. En il center da la campagna stattan uschenumnadas dumondas frequentas (frequently asked questions, FAQ). En questa rubrica vegnan tractadas per exempel dumondas davart l'obligaziun d'annunzia, davart las limitas da vegliadetgna u davart las formalitads da cumpra e da vendita.
A la polizia chantunala stat a disposiziun in placat d'infurmaziun ch'ella surdat gratuitamain a las scolas. Il placat po vegnir empustà tar il post da prevenziun da la polizia chantunala.
Link tar la pagina d'internet da la PSC: http://www.softairguns.ch
Link tar la lescha federala davart las armas: http://www.fedpol.admin.ch/fedpol/de/home/themen/sicherheit/waffen/recht.html
Contact: Martin Boess, manader da la PSC, 031 320 29 50 / 078 608 20 29, mb@skppsc.ch