La Polizia da traffic da la Polizia chantunala dal Grischun cumpiglia quatter secturs centrals: Ils Centers da controlla per il traffic pesant, l'Administraziun da traffic, la Registratura da traffic sco er la Tecnica da traffic.
Centers da controlla per il traffic pesant
Il post da servetsch Traffic pesant exequescha incumbensas spezialas da la Polizia da traffic en ils Centers da controlla per il traffic pesant ad Unterrealta ed a San Vittore. El lavura er sco element mobil per lung da l'autostrada A13. Il post da servetsch sustegna las regiuns cun savida spezialisada e fa controllas da manaschi. La finamira èsi, da meglierar la segirezza dal traffic sin la rait da vias. Il post da servetsch procura, che las disposiziuns legalas vegnian observadas.
Administraziun da traffic
Il biro da radar registrescha tut ils surpassaments da sveltezza. Las datas da fotografias e da videos vegnan elavuradas en il sistem. Suenter vegnan ellas consegnadas a las persunas culpaivlas ubain a las autoritads d'investigaziun. Ils cas che na pon betg vegnir tractads cun ina multa disciplinara, vegnan tramess vinavant cun in rapport da polizia a la Procura publica per il giudicament.
Il biro da multas disciplinaras elavura tut las multas ch'èn vegnidas emessas da la Polizia chantunala, da las vischnancas e da l'Uffizi per la natira e l'ambient en il chantun Grischun.
Il biro per permissiuns spezialas surveglia ils viadis da transports excepziunals. El emetta tschertas permissiuns spezialas per il traffic pesant sin las vias chantunalas.
Ulteriuras incumbensas da l'Administraziun da traffic èn proceduras d'assistenza giudiziala en Svizra ed a l'exteriur, publicaziuns en il sistem naziunal da retschertga informatisà Ripol e la scolaziun da funcziunaris communals en il sectur da las multas disciplinaras.
Registratura da traffic
Ella controllescha tut ils rapports da traffic da la Polizia chantunala electronics areguard las pli impurtantas datas e sin palpiri areguard la cumplettadad. Suenter trametta ella vinavant ils rapports a la Procura publica dal Grischun ed ina copia a l'Uffizi per il traffic sin via dal Grischun.
En il sectur da la Polizia da traffic elavura la Registratura da traffic tut las dumondas d'assicuranzas, d'advocatas ed advocats sco er tut las dumondas d'assistenza giudiziala naziunalas ed internaziunalas che entran.
Tecnica da traffic
Las persunas spezialisadas da la Tecnica da traffic giuditgeschan projects da vias e fermadas dal traffic public. Ellas examineschan la segirezza dal traffic. Plinavant cusseglian ellas las vischnancas en connex cun dumondas davart la signalisaziun (signals e stabiliments da traffic) ed elavuran las disposiziuns necessarias en chaussa.
La Tecnica da traffic registrescha statisticamain ils accidents da traffic per constatar lieus, nua ch'i capitan adina puspè accidents e lieus privlus. Ella elavura dumondas da permissiun per occurrenzas da velo e da sport motorisà sin via.
La Tecnica da traffic permetta la signalisaziun da plazzals cun amplas da traffic. Ella controllescha, che las prescripziuns respectivas vegnian observadas.
Lukas Christen, schef da la Polizia da traffic