Per pendicularas senza concessiun federala ch'èn previsas per il transport da persunas, dovri ina permissiun da manaschi chantunala. En spezial èn quai pendicularas pitschnas, runals, runals pitschens e tschintas da transport. Pendicularas da material vegnan duvradas exclusivamain per tramsportar material e nu na dovran negina permissiun da manaschi, sch'ellas na traversan betg plazzas cun fullas da glieud e vias publicas.

Per pudair garantir la segirezza dals implants è il chantun Grischun commember dal Concordat interchantunal per pendicularas e runals (CITR). Per incumbensa da l'autoritad executiva chantunala controllescha il post da controlla dal concordat (CITR) periodicamain ils implants. Las prescripziuns tecnicas èn fixadas en il Reglament davart la construcziun ed il manaschi da pendicularas, da runals e d'elevaturs inclinads senza concessiun federala.

Per ch'ina permissiun da manaschi possia vegnir concedida e renovada, dovri ina permissiun da construcziun, la cumprova da la garanzia tras l'assicuranza sco er in rapport positiv dal post da controlla pertutgant l'approvaziun dals plans e pertutgant l'inspecziun . Dumondas da permissiun ston vegnir inoltradas al post spezialisà chantunal, vul dir al UAG.