La cumissaria u il cumissari chantunal d'avieuls vegn elegì da la regenza. Ella u el è suttamess a la veterinaria chantunala u al veterinari chantunal. Ella u el cusseglia la veterinaria chantunala u il veterinari chantunal areguard malsognas d'avieuls e la u al sustegna en il cumbat cunter las malsognas d'avieuls suttamessas a l'obligaziun d'annunzia.
Per cumbatter effectivamain epidemias d'animals collavura la cumissaria u il cumissari d'avieuls stretgamain cun las inspecturas e cun ils inspecturs d'avieuls en las regiuns dal chantun.
Las inspecturas u ils inspecturs d'avieuls retschaivan las annunzias da suspects u las annunzias d'epidemias da las apiculturas e dals apiculturs e prendan – en cas d'epidemias – las mesiras da cumbat per propi en ils pievels, e quai tenor l'ordinaziun davart epidemias d'animals e tenor las ordinaziuns da la cumissaria u dal cumissari d'avieuls.

Da princip èn las apiculturas ed ils apiculturs responsabels per la sanadad dals pievels d'avieuls.
Ellas ed els èn obligads d'annunziar epidemias d'avieuls u suspects da talas a l'inspectura u a l'inspectur d'avieuls. Ellas ed els sustegnan las inspecturas ed ils inspecturs en lur incumbensas.