Il «Program da turissem dal Grischun 2014-2023» è in program d'innovaziun che ha la finamira surordinada da rinforzar la cumpetitivitad internaziunala dal turissem grischun.

Il program da 10 onns fa en emprima lingia quint cun l'atgna iniziativa da destinaziuns turisticas e da purtaders da prestaziuns che vulan sa metter ensemen per iniziativas e per cooperaziuns. El appellescha a la voluntad da prestaziun da tut ils acturs che vulan puspè manar il chantun turistic a la testa. Potenzial da meglieraziun datti tant tar ils products sco er tar la moda e maniera, co che prestaziuns confurmas al martgà vegnan furnidas. Il princip è simpel, ma tuttina pretensius: ils acturs dal turissem grischun duain emprender in da l'auter. Quai premetta ch'els sajan pronts da parter las cumpetenzas, la savida e las experientschas.
Il pled-clav englais ha num «coopetition», ina maschaida da «cooperation» (cooperaziun) e «competition» (concurrenza). El stat per il gieu alternant da concurrenza e cooperaziun sin ils martgads. Las stentas da tut ils acturs duain esser d'unir intelligentamain las forzas e da crear uschia effects da multiplicaziun che gidan la finala il turissem grischun a survegnir dapli perseveranza ed in retgav pli grond.
Promovids vegnan projects en ils secturs dal svilup da products, d’innovaziuns dal sistem, d’optimaziun da process, dal know-how, d’intermediaziun da savida sco er dal svilup da l'economia locala. Ils projects duain sa basar sin in grad d'innovaziun uschè grond sco pussaivel.

Ils suandants resultats duain vegnir cuntanschids cun il Program da turissem dal Grischun 2014-2023:

• La cumpetitivitad dal turissem grischun è rinforzada cumprovadamain.
• La posiziun en ils martgads è engrondida.
• Las plivalurs dals projects da cooperaziun ed ils avantatgs dal sistem èn cumprovabels.
• Las destinaziuns e l'economia locala dals lieus funcziuneschan en moda fidada ed èn sa profiladas ulteriuramain.

«Cudesch alv per il turissem grischun»

Per orientar strategicamain e per accumpagnar la realisaziun dal Program da turissem dal Grischun 2014-2023 ha la Regenza grischuna installà in cussegl. Quel ha publitgà il «Cudesch alv per il turissem grischun» la fin da november 2017.

Il cudesch alv po vegnir empustà cun inditgar il dumber giavischà ed in'adressa postala (tourismus@awt.gr.ch).

Chargiar giu: «Cudesch alv per il turissem grischun» (versiun online)

Chargiar giu: «Cudesch alv per il turissem grischun» (versiun per stampar)

Chargiar giu: «Il libro bianco per il turismo grigionese»