La populaziun grischuna è creschida ils ultims onns praticamain mo pervia da l'immigraziun da persunas estras. En cumparegliaziun cun la Svizra è la creschientscha però anc adina cleramain sut la media.

Il saldo da las naschientschas (dumber da las naschientschas vivas minus dumber dals mortoris) è stà levamain negativ l'onn passà. Entant ch'il dumber da naschientschas vivas è puspè creschì, sa chattava il dumber da mortoris l'onn 2021 danovamain sur la media da blers onns. Quai ha chaschunà – en spezial tar la populaziun permanenta svizra en il Grischun – in surpli da mortoris cumpareglià cun il dumber da naschientschas. Ultra da quai s'avanza l'inveteraziun demografica da la populaziun.

La statistica BEVNAT (statistica annuala da las naschientschas, da las maridaglias, dals divorzis, dals mortoris, da las renconuschientschas da la paternitad, da las adopziuns e dals partenadis registrads), ch'è concepida sco retschertga cumpletta, è ina da las basas las pli impurtantas per observar il svilup da lètgs e famiglias en Svizra e furnescha parameters per numerusas ulteriuras statisticas.