Co enconusch jau in svilup disfavuraivel?

Svilups disfavuraivels èn situaziuns gravantas che disturban ils uffants u giuvenils en lur svilup. Els tanschan da grevezzas cun influenzas minimalas sin il svilup fin a periclitaziuns dal bainstar d'uffants.

Constatar indizis

Co enconusch jau ina periclitaziun dal bainstar d'in uffant?

Prendai serius eventuals segns per in svilup disfavuraivel u per ina periclitaziun dal bainstar d'in uffant – na tirai dentant betg conclusiuns nunponderadas. Ils segns sa manifesteschan sin plaun corporal, emoziunal, psichic, cognitiv u social ed èn savens cumplexs.

Constatar indizis

Tge poss jau far, sche jau hai in nausch sentiment?

Per ina cussegliaziun pudais Vus contactar per telefon la Cussegliaziun spezialisada per la protecziun d'uffants.

Vus pudais far sezza u sez ina valitaziun cun agid da Cumpass.

Sun jau obligà da daventar activ, sche jau observesch ina periclitaziun u in svilup disfavuraivel?

En la protecziun d'uffants fan ins la differenza tranter il dretg d'annunzia e l'obligaziun d'annunzia. Persunas che han tras lur professiun contact cun uffants e giuvenils, na pon betg mo avair il dretg da far in'annunzia, mabain er esser obligadas da far quai.

Leger vinavant «Dretg d'annunzia ed obligaziun d'annunzia a la APUC».

Per tgi è la Cussegliaziun spezialisada per la protecziun d'uffants?

• Spezialistas e spezialists dal sectur pedagogic: mainascolas, persunas d'instrucziun, collavuraturas e collavuraturs socials da giuventetgna e.u.v.
• Persunas spezialisadas dal sectur medicinal: medias e medis, dals secturs spezials sco ergoterapia, fisioterapia, logopedia ed auter.
• persunas da referiment dal temp liber, p.ex. trenadras e trenaders da sport, manadras e manaders da battasendas, magistras e magisters da musica e.u.v.
• Ulteriuras persunas da l'ambient social sco per exempel vischins

Poss jau restar anonim, sche jau fatsch diever d'ina cussegliaziun per telefon?

• Gea, Vus pudais restar anonim. Er la descripziun da la situaziun vegn fatga en moda anonimisada.
• La cussegliaziun è en mintga cas confidenziala.

Tge custa la cussegliaziun?

• La cussegliaziun vegn finanziada dal chantun Grischun. Per Vus na resultan nagins custs.
• Il Cumpass (manual, schurnal) pudais Vus chargiar giu gratuitamain.

Tge poss jau far, sch'igl exista ina periclitaziun acuta?

Sch'igl exista ina periclitaziun acuta: Infurmai directamain la polizia, il clom d'urgenza u la APUC. Vus stuais infurmar Vossa persuna superiura. Sche quai n'è betg pussaivel, pudais Vus tuttina instradar las mesiras immediatas resp. da protecziun ed infurmar posteriuramain la persuna superiura. Sch'igl è necessari da far in'annunzia a la APUC, scleri cuminaivlamain, tgi che scriva l'annunzia da periclitaziun, tgi che suttascriva e sche resp. co ch'ils uffants u giuvenils e/u ils geniturs duain vegnir infurmads.

Co sa differenziescha la Cussegliaziun spezialisada per la protecziun d'uffants da la APUC?

• La Cussegliaziun spezialisada per la protecziun d'uffants cumenza baud. Gia en cas d'in nausch sentiment u sch'i vegn observà in svilup disfavuraivel.
• La Cussegliaziun spezialisada per la protecziun d'uffants As cusseglia, sche Vus avais dumondas u duvrais segirezza en ina situaziun concreta, ed ella metta a disposiziun l'instrument Cumpass.
• La Cussegliaziun spezialisada per la protecziun d'uffants n'ordinescha naginas mesira. Per quai è cumpetenta la APUC u la polizia.

Tgi fa la cussegliaziun?

• La cussegliaziun vegn fatga da persunas spezialisadas cun experientscha che han ina basa en lavur sociala, en dretg ed er en furmaziuns supplementaras specificas sco p.ex. la protecziun d'uffants.
• La gruppa da focus è ina gruppa interdisciplinara che sa cumpona da tschintg expertas ed experts dal sectur da la protecziun d'uffants. Represchentadas èn gruppas professiunalas sco la lavur sociala, la psicologia d'uffants e da giuvenils u il Servetsch da giuvenils da la Polizia chantunala.
• La Cussegliaziun spezialisada per la protecziun d'uffants è ina purschida dal chantun Grischun.