Dretg d'annunzia ed obligaziun d'annunzia a la APUC
Uffants, giuvenils e persunas creschidas che basegnan sustegn duain vegnir protegids svelt ed en moda efficazia. Cun reglas differenziadas davart ils dretgs d'annunzia e davart las obligaziuns d'annunzia vegni garantì, che la APUC vegn a savair a temp da talas situaziuns e che las relaziuns da confidenza professiunalas èn protegidas en cas da basegn (fegl d'infurmaziun COPUC dal mars 2019).
Dretg d'annunzia
Mintga persuna po far in'annunzia a la APUC, sche l'integritad corporala, psichica u sexuala d'uffants u da giuvenils para dad esser periclitada. Tschertas gruppas professiunalas èn dentant restrenschidas en connex cun quest dretg d'annunzia (CS 210, art. 314c CCS).
Sch'insatgi ha tema, ch'il bainstar d'uffants u da giuvenils pudess esser periclità, ha questa persuna il dretg da far in'annunzia a la APUC. Schebain questa persuna fa diever da quest dretg, sto ella giuditgar sezza. Ina cumprova da la periclitaziun n'è betg necessaria. La APUC fa ils scleriments respectivs. Impurtant da savair: La APUC daventa mo activa, sch'ella vegn infurmada davart ina pussaivla periclitaziun dal bainstar d'in uffant.
Avant ch'ina persuna spezialisada u ina persuna da referiment fa in'annunzia a la APUC, sto ella considerar cun quità, sche quai è propi en l'interess e per il bainstar dals uffants u giuvenils. Ella sto examinar, sche la relaziun da confidenza pudess vegnir donnegiada qua tras. In'annunzia signifitga numnadamain adina, ch'i vegnan dadas vinavant infurmaziuns persunalas. Sch'ils uffants u giuvenils perdan la confidenza en ina persuna spezialisada u en ina persuna da referiment, po quai esser problematic. Tuttina sto la relaziun da confidenza envers ils geniturs u envers terzas persunas vegnir considerada sco secundara, cumpareglià cun la responsabladad envers ils uffants periclitads. Sche la persuna spezialisada resp. la persuna da referiment vegn suenter avair reflectà intensivamain a la conclusiun, ch'ina annunzia gida plitost che quai ch'ella fa donn als uffants u giuvenils, po la persuna far in'annunzia. En quest connex duessan er vegnir resguardads ils interess d'auters uffants u giuvenils pertutgads, sco per exempel fragliuns.
Obligaziun d'annunzia
Sche l'integritad corporala, psichica u sexuala d'uffants u da giuvenils para d'esser periclitada, èn las persunas spezialisadas che han tras lur professiun regularmain contact cun uffants e giuvenils, obligadas tenor lescha da far in'annunzia a la APUC, premess ch'ellas n'èn betg suttamessas al secret professiunal tenor il Cudesch penal svizzer e ch'ellas na pon betg eliminar la periclitaziun en il rom da lur activitad (CS 210, art. 314d CCS).
L'obligaziun d'annunzia dal dretg civil na vala betg per tut las persunas spezialisadas che han contact professiunal cun uffants. L'obligaziun han quellas gruppas professiunalas che duessan esser qualifitgadas d'identifitgar e da valitar svilups disfavuraivels e periclitaziuns dal bainstar d'uffants sco er da surpigliar la responsabladad per in'annunzia. Pervia da lur connex cun la pratica e lur savida spezialisada pon ellas ir enturn cun situaziuns difficilas che pertutgan ils uffants e giuvenils.
Da princip sto la finamira adina esser quella da far in'annunzia en cunvegnientscha cun ils geniturs resp. cun las persunas che han la tgira genituriala. En tscherts cas n'è quai betg pussaivel. In'annunzia a la APUC senza consentiment u cunter la voluntad dals geniturs duess vegnir fatga pir suenter in giudicament conscienzius da la situaziun da privel. Ils geniturs duessan vegnir infurmads davart quest pass, er sche l'annunzia vegn fatga senza lur consentiment. Er qua vala: La relaziun da confidenza envers ils geniturs u envers terzas persunas sto vegnir considerada sco secundara, cumpareglià cun la responsabladad envers ils uffants periclitads.
En tut ils secturs da lavur vegni recumandà, da far l'annunzia a la APUC sur la direcziun, quai per pudair pussibilitar in'eventuala ulteriura collavuraziun cun l'uffant e cun il sistem famigliar.
Gruppas professiunalas cun obligaziun d'annunzia
Oravant tut duas gruppas da persunas han da princip in'obligaziun d'annunzia. Ellas èn obligadas da far in'annunzia, sch'i existan indizis concrets, che l'integritad corporala, psichica u sexuala d'uffants u da giuvenils è periclitada, e sch'ellas na pon betg eliminar la periclitaziun en il rom da lur activitad. L'obligaziun d'annunzia è er ademplida, sche l'annunzia vegn fatga a persunas superiuras. La terza gruppa da persunas suttastat al secret professiunal tenor il Cudesch penal svizzer. En cas acuts han er ellas in'obligaziun d'annunzia.
Persunas spezialisadas che han tras lur professiun regularmain contact cun uffants e giuvenils
Persunas spezialisadas dals secturs medischina, psicologia, tgira, assistenza, educaziun, furmaziun, cussegliaziun sociala, religiun e sport. Tar questas persunas tutgan tranter auter persunas spezialisadas da tgira en gruppas da gieu ed en canortas d'uffants sco er tgiradras e tgiraders d'uffants e mammas/geniturs dal di professiunals, persunas d'instrucziun en scolas betg obligatoricas, terapeutas e terapeuts (p.ex. fisioterapia, osteopatia, ergoterapia, terapias psicologicas), collavuraturas e collavuraturs da posts da cussegliaziun (p.ex. cussegliaziun da geniturs) u organisaziuns privatas per il sustegn social, trenadras e trenaders professiunals da tut ils geners da sport, magistras e magisters da musica professiunals.
Persunas cun ina incumbensa da dretg public
Persunas u posts che adempleschan ina incumbensa da dretg public (dal stadi, dal chantun u da la vischnanca). Latiers tutgan tranter auter la polizia, autoritads penalas (da giuventetgna), dretgiras civilas, autoritads da migraziun, uffizis da taglia e da scussiun, lavur sociala, scolas / persunas d'instrucziun publicas sco er privatas (che instrueschan uffants en la vegliadetgna da scola) u persunas che fan in scleriment social per incumbensa da la APUC.
Persunas cun secret professiunal
Sch'igl è avant maun l'enconuschientscha che uffants, giuvenils u persunas creschidas èn periclitads acutamain tras terzas persunas u tras sasez alura èn er persunas spezialisadas che suttastattan al secret professiunal, obligadas da far in'annunzia (DG 210.100, art. 61 al. 1 LItCCS). Il secret professiunal è impurtant per las suandantas gruppas professiunalas: medias e medis, spirituals, advocatas ed advocats, defensuras e defensurs, notaras e notars, advocatas ed advocats da patenta, revisuras e revisurs (ch'èn obligads da mantegnair discreziun tenor il Dretg d'obligaziuns), dentistas e dentists, chiropraticras e chiropratichers, psicologas e psicologs, spendreras.
Excepziuns da l'obligaziun d'annunzia
L'obligaziun d'annunzia fundamentala na vala betg per persunas spezialisadas che suttastattan al secret professiunal ch'è protegì dal dretg penal (art. 321 CP) (gruppa da persunas cun secret professiunal). Da princip na dastgan ellas betg dar vinavant infurmaziuns ch'ellas survegnan durant lur lavur, er betg a la APUC (excepziun: en cas acuts). Sch'ina annunzia è dentant en l'interess da l'uffant, pon er questas persunas rumper il secret professiunal per far in'annunzia (art. 314c al. 2 CCS), ubain ch'ellas dumondan lur autoritad da surveglianza da las dispensar dal secret professiunal.
Ulteriuras excepziuns da l'obligaziun d'annunzia valan er per persunas che han tras in'activitad en uffizi d'onur, voluntarmain e mo en il sectur dal temp liber contact cun uffants e giuvenils. Quai èn per exempel: manadras e manaders dals battasendas, da G+S sco er da JUBLA, trenadras e trenaders da sport en uffizi d'onur, assistentas u assistents voluntars da giuventetgna.
Nagina obligaziun d'annunzia n'han las persunas che sustegnan persunalmain las emprimas gruppas professiunalas numnadas qua survart, sco p.ex. collavuraturas e collavuraturs dal secretariat da terapeutas e terapeuts, il survegliader da material d'ina gronda uniun da ballape, che ha tras sia professiun regularmain contact cun las junioras ed ils juniors da l'uniun. Questas persunas na suttastattan betg a l'obligaziun d'annunzia, ellas han però il dretg da far in'annunzia.
Infurmaziuns cumplementaras