Il schema d'agir è dividì en trais pass da process: Mia valitaziun, barat colleghial, entrada en contact cun la Cussegliaziun spezialisada per la protecziun d'uffants. Ils trais pass dal process servan a valitar la ristga d'in svilup disfavuraivel u d'ina periclitaziun dal bainstar d'in uffant ed ad instradar mesiras adattadas. Il schema d'agir sa basa sin in sistem d'ampla. La valitaziun da la periclitaziun vegn fatga cun agid da quatter categorias da colurs – verd, mellen, oransch e cotschen. Las categorias da colurs defineschan plinavant l'ulteriur proceder sco er las pussaivladads d'intervenziun.

Il proceder dependa da Vossa funcziun e dals proceders interns definids en Vossa organisaziun. Vossa rolla po per exempel esser quella da protocollar en moda exacta constataziuns, observaziuns u percepziuns e da dar vinavant questas infurmaziuns, entant ch'igl è l'incumbensa d'ina persuna superiura da valitar e sclerir la situaziun. Quai po restrenscher Voss spazi d'agir. A medem temp po quai dentant er gidar a definir cleras obligaziuns d'agir ed a distgargiar Vus.

Avant l'emprim diever èsi impurtant da sa famigliarisar cun il schema d'agir. Legiai accuratamain ils pass 1 fin 3 (vesair link sutvart). Il schema d'acziun vegn duvrà en cumbinaziun cun il schurnal. En il schurnal documentais Vus tut las infurmaziuns, observaziuns e percepziuns.

Pass 1 – Mia valitaziun
Pass 2 – Barat colleghial
Pass 3 – Contactar la Cussegliaziun spezialisada per la protecziun d'uffants

Cuntrari a las persunas spezialisadas han las persunas da referiment savens main pussaivladads da sa barattar e da survegnir sustegn specific per valitar in nausch sentiment u ina situaziun. Ellas pon far sezzas ina valitaziun e percurrer ils trais pass dal process – ubain contactar directamain la Cussegliaziun spezialisada per la protecziun d'uffants. En cas da dubi pon natiralmain er las persunas spezialisadas adina contactar la Cussegliaziun spezialisada.