Faschai ina controlla da quatter egls cun ina u in collega ubain cun Vossa persuna superiura. Ponderai, cun tge persuna ch'in barat fiss il pli raschunaivel ed il pli cunvegnent. En il cas ideal ha il barat colleghial lieu ensemen cun Vossa persuna superiura ubain entaifer il team.

Cundiziuns generalas per il barat colleghial

Sut tschertas circumstanzas poi gidar d'integrar pliras persunas en il barat colleghial, per augmentar la segirezza davart la valitaziun. A medem temp èsi pussaivel, che l'elavuraziun dal cas vegn qua tras pli cumplexa e ch'i resultan speculaziuns betg giavischadas. Considerai conscienziusamain il niz envers eventuals aspects critics e resguardai vinavant las las reglas per in barat cun terzas persunas (manual, pagina 8).

Utilisai en il barat colleghial las infurmaziuns dal schurnal. Documentai las novas enconuschientschas ed infurmaziuns sco er dumondas avertas e malsegirezzas en il schurnal (pagina 11).

Las pussaivladads per in barat colleghial varieschan tut tenor il champ professiunal, l'instituziun, l'organisaziun e la valitaziun individuala.

Nova valitaziun suenter il barat colleghial

Giuditgai danovamain la situaziun suenter il barat colleghial, quai cun agid da l'analisa da las ristgas e da la segirezza (schurnal, pagina 12). Valitai perquai danovamain la ristga d'ina periclitaziun da l'uffant u dal giuvenil ed examinai, quant segira che Vossa valitaziun è. L'attribuziun ad ina da las quatter categorias da colurs – verd, mellen, oransch u cotschen – fixescha l'ulteriur proceder e renviescha a pussaivladads d'intervenziun.

Pussaivladads d'intervenziun verd

In basegn da sustegn n'è betg inditgà

Sche Vus valitais er suenter la segunda valitaziun la ristga sco fitg pitschna fin pitschna e sche Vus essas segir(a) fin fitg segir(a) da quai, n'exista probablamain nagin basegn da sustegn.

Restai dentant attent, en cas ch'il cumportament dals uffants u giuvenils sa mida e procura danovamain per quitads. Documentai ultra da quai las eventualas mesiras d'intervenziun en il schurnal (pagina 14).

Pussaivladads d'intervenziun mellen

In basegn da sustegn è inditgà

Sche Vus avais suenter il barat colleghial vinavant malsegirezzas areguard la valitaziun da la periclitaziun u areguard la planisaziun d'intervenziuns, As drizzai a la Cussegliaziun spezialisada per la protecziun d'uffants (manual, pagina 20).

Cas cuntrari defini intervenziuns concretas e notai talas en il schurnal (pagina 14). Scleri a temp, tgi che surpiglia la direcziun dal cas e tge persunas ch'èn responsablas per ils pass da realisaziun respectivs.

Sche geniturs e/u uffants ubain giuvenils n'èn betg pronts u abels d'acceptar il sustegn offrì, èsi impurtant da mantegnair il contact cun la famiglia e da render vinavant attent a purschidas da sustegn adattadas. En questa fasa dovri in'attenziun speziala, per identifitgar in pegiurament successiv da la situaziun per l'uffant u giuvenil. Quai gartegia il meglier, sche Vus examinais regularmain la situaziun. Sch'i avessan d'exister vinavant segns per ina periclitaziun, malgrà las intervenziuns realisadas, e sche Vus duvrais sustegn per l'ulteriura planisaziun, consultai la Cussegliaziun spezialisada per la protecziun d'uffants (manual, pagina 20), per instradar a temp las mesiras da protecziun necessarias.

Pussaivladads d'intervenziun oransch

Il basegn da sustegn è considerabel

Sche Vus avais suenter il barat colleghial vinavant malsegirezzas en connex cun la valitaziun da la periclitaziun u cun la planisaziun d'intervenziuns, As drizzai a la Cussegliaziun spezialisada per la protecziun d'uffants (manual, pagina 20).

Cas cuntrari defini intervenziuns concretas e notai talas en il schurnal (pagina 14). Scleri a temp, tgi che surpiglia la direcziun dal cas e tge persunas ch'èn responsablas per ils pass da realisaziun respectivs. Sche Vus avessas vinavant, er suenter la realisaziun d'intervenziuns, da supponer ina periclitaziun dal bainstar da l'uffant, e sche Vus duvrais sustegn per l'ulteriura planisaziun, consultai la Cussegliaziun spezialisada per la protecziun d'uffants (manual, pagina 20).

Pussaivladads d'intervenziun cotschen

In basegn da sustegn è urgent

En cas che Vus essas segira u segir en il barat colleghial u suenter tar la segunda valitaziun da la ristga, ch'il bainstar da l'uffant u giuvenil è periclità, èsi obligatoric da far ina annunzia ad in'organisaziun d'urgenza (manual, pagina 22), sche Vus na pudais betg eliminar sezza u sez la periclitaziun en il rom da Vossa activitad professiunala.

Sche uffants u giuvenils èn periclitads acutamain u èn en privel da vita, sto immediatamain vegnir infurmada in'organisaziun d'urgenza.

Documentai las mesiras d'intervenziun en il schurnal (pagina 14).