Formats da barat e pussaivladads d'intervenziun
Als differents champs professiunals stattan mintgamai a disposiziun agens formats da barat e pussaivladads d'intervenziun.
Canorta d'uffants
Cundiziuns generalas
La canorta d'uffants surpiglia incumbensas multifaras: Ella tgira e promova uffants, collavura stretgamain cun ils geniturs e procura per in manaschi senza disturbis. Cun quai è ella in element central da la tgira, furmaziun ed educaziun durant la fasa tempriva da l'uffanza.
Las canortas d'uffants pon esser organisadas dal maun public, privat u da la baselgia. La lavur pedagogica sa basa sin in concept pedagogic ch'è definì cleramain e che reflectescha ils princips e las finamiras da l'instituziun. La manadra u il manader è la pli impurtanta persuna da contact per ils geniturs, per las autoritads e per il team.
Obligaziun da discreziun / secret d'uffizi ed obligaziun d'annunzia
Collavuraturas e collavuraturs d'ina canorta d'uffants suttastattan a l'obligaziun da discreziun, en cas d'instituziuns publicas er al secret d'uffizi. Per la protecziun da l'uffant na dastgan pia naginas infurmaziuns cun datas persunalas vegnir dadas vinavant ad entiras cumissiuns u suprastanzas. Igl è perquai essenzial, che la manadra u il manader sco er las collavuraturas ed ils collavuraturs communitgeschian conscienziusamain e cun senn da responsabladad. En cas ch'il bainstar da l'uffant è periclità, po l'obligaziun da discreziun resp. il secret d'uffizi vegnir abolì tras in'obligaziun d'annunzia a la APUC. In'orientaziun porscha l'instrument da lavur «Dretg d'annunzia ed obligaziun d'annunzia a la APUC».
Furmas da barat pussaivlas per il barat colleghial
Tenor las directivas da qualitad da l'Uffizi chantunal dal servetsch social sto mintga canorta d'uffants formular en scrit las mesiras preventivas sco er il proceder en cas d'abus u d'in suspect respectiv, e quai en in concept d'integritad. Quest concept duess cuntegnair cleras vias da communicaziun e d'infurmaziun.
En general vali, ch'il barat colleghial vegn en il cas ideal fatg l'emprim en il team. Sche pussaivel duess en quest connex adina vegnir consultada ina persuna spezialisada – naginas emprendistas u emprendists ubain forzas auxiliaras. En tscherts cas poi er far senn da sa barattar colleghialmain cun ina persuna da referiment d'ordaifer l'instituziun, sco per exempel cun la persuna che maina la gruppa da gieu da l'uffant. En quests cas dovri stringentamain il consentiment en scrit da las persunas responsablas per l'educaziun.
Igl è impurtant da documentar il barat, d'infurmar immediatamain la manadra u il manader e da definir cuminaivlamain eventuals pass. La responsabladad per la valitaziun d'ina periclitaziun davent da la categoria melna, tenor il manual, ha per regla la manadra u il manader. Sch'il concept d'integritad duess prevair in'autra persuna sco responsabla, sto quella persuna vegnir integrada suenter in barat colleghial.
Pussaivladads da sa barattar en moda anonima, per exempel cun la cussegliaziun da geniturs, èn problematicas en regiuns ruralas, perquai che las famiglias pertutgadas èn savens enconuschentas. Talas furmas da barat duessan perquai vegnir evitadas. Empè da quai duai – en cas da basegn – vegnir contactà la Cussegliaziun spezialisada per la protecziun d'uffants.
Exempels per pussaivladads d'intervenziun SUENTER il barat colleghial
Integraziun dals uffants e giuvenils
Ils uffants che vegnan tgirads en ina canorta d'uffants èn savens fitg giuvens. Quai difficultescha lur integraziun participativa. Tuttina è la participaziun impurtanta ed er pussaivla. Sche pussaivel, duain ils uffants vegnir infurmads confurm a lur vegliadetgna davart ils pass planisads. Els duessan avair la pussaivladad da far dumondas che vegnan respundidas confurm a lur vegliadetgna e confurm a la vardad. Uschia na subescha l'uffant betg ina perdita da la controlla, mabain vegn integrà activamain en il process.
Integraziun dals geniturs
En la tgira d'uffants cumplementara a la famiglia vegnan ils geniturs considerads sco partenaris d'educaziun ed experts per lur uffants – in princip che vegn er applitgà en la protecziun d'uffants. Ils geniturs ston vegnir integrads uschè svelt sco pussaivel en tut ils pass relevants. Partenadi d'educaziun vul dir:
- Da vart dals geniturs: Valitar e sustegnair da situar eventualas midadas da cumportament da l'uffant sco er enconuscher pli profundamain las preferenzas e particularitads da l'uffant.
- Da vart da las persunas spezialisadas: Constatar e tematisar singularitads, sustegnair cun exempels d'intervenziun pratics or dal mintgadi da la canorta, metter a disposiziun infurmaziuns specificas davart il svilup da l'uffant sco er intermediar purschidas da sustegn adattadas.
Intervenziuns senza integrar ils geniturs duessan vegnir fatgas mo en cas excepziunals. En quests cas stoi almain vegnir examinà, sche e co ch'ils geniturs pon vegnir infurmads.
Intervenziuns senza il consentiment dals uffants
En tschertas situaziuns poi esser necessari d'agir cunter la voluntad da l'uffant. Er en tals cas èsi impurtant per l'uffant, ch'i vegn infurmà en moda transparenta. Ils sentiments che resultan da quai duessan vegnir accumpagnads professiunalmain. Las emoziuns negativas ston vegnir acceptadas e supportadas cun respect.
Las collavuraturas ed ils collavuraturs d'ina canorta d'uffants èn obligads d'inoltrar in'annunzia da periclitaziun, sch'ina periclitaziun acuta vegn constatada. Sch'ins percorscha en il barat colleghial, ch'igl exista directamain in privel per corp e vita da l'uffant e sche la manadra u il manader u sia substituziun n'è betg cuntanschibel, poi esser necessari, che collavuraturas u collavuraturs ston contactar sezs organisaziuns d'urgenza. La manadra u il manader ubain sia substituziun sto en mintga cas vegnir infurmà posteriuramain davart quest emprim contact.
Sche la manadra u il manader na prenda naginas mesiras u sche las mesiras vegnan valitadas sco insuffizientas, exista il dretg d'infurmar immediatamain la proxima persuna superiura ch'è definida en il concept d'integritad – per regla ina commembra u in commember da la suprastanza.
Scrit en collavuraziun cun: Federaziun spezialisada per la tgira d'uffants dal Grischun
Persunas d'instrucziun e per la direcziun da la scola
Cundiziuns generalas
L'incumbensa centrala da la scola è la furmaziun e l'educaziun d'uffants e giuvenils. Plinavant è la protecziun d'uffants ina rolla decisiva da la scola che ha mintga di contact cun uffants e po pia constatar a temp emprims segns da negligientscha, da maltractament u da periclitaziun. La scola è pia betg mo in lieu da furmaziun, mabain er ina instanza da protecziun per ils uffants.
En il chantun Grischun vegnan l'organisaziun ed il svilup da bleras scolas manads da la direcziun da la scola. La direcziun da la scola ha la responsabladad per manar la scola concernent la pedagogia, l'organisaziun ed il persunal. Igl è fitg impurtant d'avair in stretg barat tranter las persunas d'instrucziun e la direcziun da la scola, particularmain en il sectur da la protecziun d'uffants. En cas ch'ina scola n'ha nagina direcziun da la scola, sa drizza il post superiur tenor la structura da la scola. Savens surpiglia alura l'autoritad da scola u il cussegl da scola la surveglianza da la scola. L'incumbensa exacta ed ils puncts da contact ston esser definids en la scola respectiva.
Obligaziun da discreziun / secret d'uffizi
Las persunas d'instrucziun sco er las persunas da la direcziun da la scola suttastattan al secret d'uffizi. Ellas èn obligadas da tegnair secret las infurmaziuns confidenzialas ch'ellas survegnan en funcziun d'in uffizi. Quai pertutga en spezial las datas persunalas da scolaras e scolars sco er da lur famiglias.
En cas ch'il bainstar da l'uffant è periclità, po il secret d'uffizi vegnir abolì tras in'obligaziun d'annunzia a la APUC. In'orientaziun porscha l'instrument da lavur «Dretg d'annunzia ed obligaziun d'annunzia a la APUC».
Furmas da barat pussaivlas per il barat colleghial
Persunas d'instrucziun
En il cas ideal ha il barat colleghial lieu l'emprim en il team da las persunas d'instrucziun. Tut tenor situaziun poi esser raschunaivel d'integrar la direcziun da la scola. En las categorias oranschas e cotschnas da la taxaziun da la periclitaziun sto la direcziun da la scola vegnir infurmada immediatamain. Supplementarmain èsi pussaivel da far in barat anonimisà cun la lavur sociala da scola, sch'ina tala è disponibla, u cun il Servetsch psicologic da scola.
Mainascola
Cas che vegnan valitads sco periclitaziun considerabla, ston vegnir tractads directamain dal stab da crisa, sch'ina tala structura è avant maun. Mintga purtader da scola sto en quest connex fixar individualmain, co ch'il stab da crisa sa cumpona e tge incumbensas che las singulas commembras ed ils singuls commembers surpiglian.
Exempels per pussaivladads d'intervenziun SUENTER il barat colleghial
Integraziun dals uffants u giuvenils
Sche disponiblas, èn la lavur sociala da scola e/u la direcziun da la scola savens integradas en il barat colleghial. Per regla maina quella persuna il discurs persunal, che ha il pli stretg contact cun la scolara u cun il scolar – il pli savens è quai ina persuna d'instrucziun.
Integraziun dals geniturs
Sch'ins po supponer cun ina fitg gronda probabilitad, ch'ils geniturs na fan betg part da la periclitaziun, poi esser raschunaivel da far in discurs cun quels. Sche pussaivel, vegnan ils geniturs adina integrads cun il consentiment da la scolara u dal scolar. Las persunas participadas (persuna d'instrucziun, direcziun da la scola, lavur sociala da scola) decidan cuminaivlamain, tgi che entra en contact cun ils geniturs e tgi ch'è preschent en cas d'in eventual discurs.
La finamira principala è quella da persvader ils geniturs d'ina cooperaziun. Mo lura exista la pussaivladad da deescalar ina situaziun critica, senza far in'annunzia a la APUC. Sche la lavur sociala da scola na po betg satisfar als interess da la famiglia, survegnan ils geniturs recumandaziuns ed en cas da basegn sustegn d'entrar en contact cun posts spezialisads adattads.
Ensemen cun ils geniturs èsi per exempel pussaivel da sviluppar mesiras scolasticas per sustegnair l'uffants u il giuvenil e da fixar discurs davart la situaziun actuala.
Lavur sociala da scola
Sch'ina lavur sociala da scola è disponibla, procuran las persunas d'instrucziun a temp per ina integraziun da la lavur sociala da scola. Per il mintgadi professiunal èsi necessari da stabilir svelt ina collavuraziun nuncumplitgada e tenor basegn.
Servetsch psicologic da scola
Sche l'uffant u il giuvenil mussa particularitads en il cumportament, en connex cun l'emprender u cun ses stadi psichic, po il Servetsch psicologic da scola vegnir involvì per far scleriments u tut tenor basegn per instradar in sustegn.
Cooperaziun cun auters posts spezialisads
La persuna d'instrucziun, la direcziun da la scola u lavur sociala da scola po s'infurmar tar ils geniturs, schebain ulteriuras persunas spezialisadas èn gia involvidas en il sistem da famiglia. Sche quai è il cas e sch'ils geniturs dattan lur consentiment, èsi pussaivel da convocar ina maisa radunda. Quella serva a sclerir las cumpetenzas, a definir vias da communicaziun ed a coordinar la collavuraziun.
Intervenziuns en classas
Sche quai è inditgà e raschunaivel, pon las persunas d'instrucziun delegar intervenziuns en classas a la lavur sociala da scola u surdar extern ina incarica. Talas intervenziuns pon per exempel vegnir fatgas per infurmar ils uffants davart lur dretgs, davart purschidas da sustegn e co ir enturn cun situaziuns engrevgiantas. Sche las mesiras na bastan betg per proteger ils uffants e giuvenils, sto la direcziun da la scola vegnir infurmada a temp.
Intervenziuns senza il consentiment dals uffants u giuvenils
Quai pertutga mo quels cas, nua ch'il bainstar da l'uffant è directamain e massivamain periclità. En tals cas fa la direcziun da la scola, l'autoritad d'engaschament u il presidi da la scola in'annunzia a la APUC. Sche pussaivel, vegnan ils uffants u giuvenils e las famiglias infurmads ordavant davart quest pass.
Scrit en collavuraziun cun: Federaziun da mainascolas dal Grischun
lavur sociala en chasa da scola
Cundiziuns generalas
La lavur sociala da scola porscha in sustegn facultativ e simpel. En il focus stattan la prevenziun, la promoziun d'in clima da scola positiv sco er l'identificaziun e l'intervenziun tempriva. La lavur sociala da scola accumpogna e sustegna scolaras e scolars che dovran agid en secturs scolastics, famigliars u socials, quai cunzunt en cas da dischavantatgs socials. En quest connex vegnan integrads activamain ils geniturs, las persunas d'instrucziun ed autras persunas da referiment. La pli impurtanta finamira è il bainstar da las scolaras e dals scolars.
Plinavant cusseglia la lavur sociala da scola er las persunas d'instrucziun e las direcziuns da scola, sensibilisescha per svilups socials e lavura en moda interdisciplinara – adina tegnend quint da la protecziun da datas. L'affiliaziun organisatorica variescha: La lavur sociala da scola po appartegnair ad in'administraziun sociala u ad in post spezialisà ubain esser domiciliada directamain tar la scola. Independentamain da la structura resta la perspectiva independenta da la lavur sociala adina garantida.
Obligaziun da discreziun / secret d'uffizi ed obligaziun d'annunzia
Las persunas spezialisadas da la lavur sociala da scola suttastattan a l'obligaziun da discreziun ed en tscherts cas supplementarmain al secret d'uffizi, quai tut tenor la relaziun d'engaschament. Infurmaziuns dastgan vegnir dadas vinavant mo cun il consentiment dals uffants u dals giuvenils. Excepziuns datti en connex cun in'obligaziun d'annunzia a la APUC, sch'i vegnan constatadas situaziuns da periclitaziun u situaziuns d'urgenza acutas. In'orientaziun porscha l'instrument da lavur «Dretg d'annunzia ed obligaziun d'annunzia a la APUC».
Furmas da barat pussaivlas per il barat colleghial
En il cas ideal datti l'emprim in barat colleghial entaifer il team da la lavur sociala da scola, sch'in tal team exista. Cun il consentiment da l'uffant èsi er pussaivel da sa barattar cun la persuna d'instrucziun. Resguardond l'obligaziun da discreziun èsi plinavant er pussaivel da sa barattar colleghialmain en moda anonimisada cun la direcziun da la scola u cun las persunas d'instrucziun cumpetentas.
En situaziuns criticas che correspundan savens a la categoria oranscha dal sistem d'ampla, sto vegnir fatga in'annunzia a la persuna superiura. Quella variescha tut tenor la structura da l'organisaziun e po cumprender la direcziun da la scola, il cussegl da scola, posts spezialisads externs ubain ils servetschs socials da la vischnanca.
Exempels per pussaivladads d'intervenziun SUENTER il barat colleghial
Integraziun dals uffants u giuvenils
Per regla tschertgan ins il discurs cun l'uffant u cun il giuvenil. En quest connex poi sa mussar, ch'i na dovra naginas ulteriuras mesiras. Cas cuntrari èsi pussaivel da fixar ulteriurs discurs, per sclerir dumondas avertas u per accumpagnar l'ulteriur andament.
La purschida da la lavur sociala da scola è facultativa. Sch'ils uffants u giuvenils giavischan in accumpagnament u sch'els dattan lur consentiment per quel, vegnan fixads termins regulars per ponderar ensemen, co ch'ins pudess sustegnair e rinforzar els il meglier pussaivel, per ch'els dumognian il mintgadi. En quest connex èsi essenzial, ch'ils uffants u giuvenils vegnian integrads activamain en il process ed infurmads davart l'ulteriur proceder.
Integraziun dals geniturs
La finamira è quella da persvader ils geniturs da collavurar en moda cooperativa. Mo uschia po ina situaziun critica eventualmain vegnir mitigiada, senza ch'i dovria in'annunzia a la APUC.
Cun il consentiment dals uffants u dals giuvenils vegnan, sche pussaivel, er integrads ils geniturs. En tscherts cas, po l'integraziun dals geniturs er esser necessari cunter la voluntad dals uffants u giuvenils. Quest pass duess vegnir ponderà conscienziusamain e communitgà als uffants u giuvenils en moda transparenta.
Las persunas spezialisadas participadas (persuna d'instrucziun, direcziun da la scola, lavur sociala da scola) fixeschan cuminaivlamain, tgi che entra en contact cun ils geniturs e procura – en cas da basegn – per ulteriuras infurmaziuns. En quest connex poi sa tractar da la finanziaziun da purschidas u da l'integraziun d'autras persunas spezialisadas, p.ex. d'ina procuratura u d'in procuratur.
Ensemen cun ils geniturs èsi per exempel pussaivel da sviluppar mesiras per sustegnair ils uffants u giuvenils e da fixar discurs davart la situaziun actuala. Sch'il sectur da cumpetenza necessari n'avess betg dad esser en il sectur da cumpetenza da la lavur sociala da scola, survegnan ils geniturs recumandaziuns davart posts spezialisads adattads.
Sche necessari, pon ils geniturs vegnir renviads ad ulteriurs posts spezialisads sco per exempel a la Psichiatria d'uffants e da giuvenils, al Servetsch psicologic da scola, a medias e medis d'uffants sco er a l'Agid a victimas. Sch'ils geniturs èn d'accord, pon questas instituziuns al cumenzament entrar en contact cun la lavur sociala da scola.
En situaziuns criticas che correspundan a la categoria oranscha dal sistem d'ampla, sto vegnir fatga in'annunzia a la persuna superiura.
Intervenziuns en classas
En cunvegnientscha cun la persuna d'instrucziun da classa e sch'igl è adequat e raschunaivel, pon vegnir fatgas intervenziuns en classas. Per quai dovri il consentiment e la cooperaziun da la persuna d'instrucziun da classa.
Cooperaziun cun auters posts spezialisads
Persunas spezialisadas ch'èn participadas (persuna d'instrucziun, direcziun da scola, lavur sociala da scola) pon s'infurmar tar ils geniturs, sche ulteriuras persunas spezialisadas èn gia involvidas en il sistem da famiglia. Sche quai è il cas e sch'ils geniturs dattan lur consentiment, èsi pussaivel da convocar ina maisa radunda. Quella serva a sclerir las cumpetenzas, a definir vias da communicaziun ed a coordinar la collavuraziun.
Intervenziuns senza il consentiment dals uffants u giuvenils
Quai pertutga mo quels cas, nua ch'il bainstar da l'uffant è directamain e massivamain periclità. En in tal cas fa la lavur sociala da scola, en cunvegnientscha cun las persunas superiuras, in'annunzia a la APUC (mesira superprovisorica). Ils uffants u giuvenils ed ils geniturs vegnan adina infurmads tras la lavur sociala da scola davart l'annunzia.
Scrit en collavuraziun cun: Direcziun dal sectur Lavur sociala da scola da la citad da Cuira
Lavur averta cun uffants e cun giuvenils
Cundiziuns generalas
La lavur averta cun uffants e cun giuvenils (LAUG) accumpogna e cusseglia uffants e giuvenils sin basa facultativa e promova la participaziun e la cundecisiun. La finamira è quella da rinforzar lur autodeterminaziun e lur atgna responsabladad. Ils uffants ed ils giuvenils vegnan integrads activamain en decisiuns. Datas persunalas vegnan dadas vinavant mo cun lur consentiment.
En il Grischun lavuran las persunas spezialisadas da la LAUG en differentas furmas d'organisaziun. Tschertas èn integradas en l'administraziun communala u municipala, autras èn organisadas sco uniun u sco structuras regiunalas. Intginas vischnancas retiran prestaziuns da la LAUG sur contracts cun vischnancas vischinas. Bleras persunas spezialisadas en il Grischun han pitschens pensums parzials e lavuran senza team. Lur persunas superiuras èn savens commembras u commembers d'autoritads, da cumissiuns u da suprastanzas, che n'han per regla betg ina savida professiunala davart la lavur sociala. L'anonimitad dals uffants e dals giuvenils variescha tut tenor la grondezza da la vischnanca.
Obligaziun da discreziun / secret d'uffizi ed obligaziun d'annunzia
Las persunas spezialisadas da la lavur averta cun uffants e cun giuvenils suttastattan u a l'obligaziun da discreziun u al secret d'uffizi ubain ad ina cumbinaziun da quels dus, quai tut tenor relaziun d'engaschament. Excepziuns datti en connex cun in'obligaziun d'annunzia a la APUC, en cas da situaziuns da periclitaziun u en situaziuns d'urgenza acutas. In'orientaziun porscha l'instrument da lavur «Dretg d'annunzia ed obligaziun d'annunzia a la APUC».
Furmas da barat pussaivlas per il barat colleghial
En il cas ideal vegn il barat colleghial fatg intern en il team, sch'ina tala structura è avant maun. Ultra da quai èsi pussaivel da far in barat bilateral anonimisà cun persunas che lavuran cun giuvenils d'autras vischnancas ubain en gruppas regiunalas cun persunas spezialisadas da la lavur averta cun uffants e cun giuvenils. In'ulteriura pussaivladad porscha la rait jugend.gr cun JuArConnect ubain la direcziun dal post spezialisà da jugend.gr. Plinavant èsi pussaivel da far diever dad intervisiuns, supervisiuns e coachings sco ulteriuras furmas da barat, che pon vegnir utilisadas tut tenor finamira e basegn. Mintga format ha tscherts avantatgs e pussaivladads d'applicaziun specificas. Per il solit sto vegnir inoltrada ina dumonda per la finanziaziun da tals formats da cussegliaziun.
Exempels per pussaivladads d'intervenziun SUENTER il barat colleghial
Integraziun dals uffants u giuvenils
En la lavur averta cun uffants e cun giuvenils, tschertgan ins, sche pussaivel, adina il discurs direct cun l'uffant u cun il giuvenil, quai per sclerir la situaziun e per eruir, sch'i dovra ulteriuras mesiras. Sch'igl avess da sa mussar, ch'i dovra in sustegn supplementar e sch'ils uffants u giuvenils giavischan in accumpagnament, vegn la concepziun da quels pass definida cuminaivlamain. En quest connex vegni er discutà, sche e tge ulteriurs posts spezialisads, persunas spezialisadas u autoritads che duain vegnir integrads. Sche necessari, sustegna la lavur cun giuvenils ils uffants e giuvenils en ulteriurs discurs e represchenta «en moda d'advocatura» ils interess dals uffants e dals giuvenils. Ils uffants u ils giuvenils pon terminar da tut temp la cussegliaziun e l'accumpagnament.
Integraziun dals geniturs
Sch'ins po supponer cun ina fitg gronda probabilitad, ch'ils geniturs na fan betg part da la periclitaziun, poi esser raschunaivel da far in discurs cun quels. Ils geniturs vegnan dentant integrads mo cun il consentiment dals uffants u dals giuveaannnils.
Cooperaziun cun auters posts spezialisads
Ina stretga collavuraziun cun las scolas, ils servetschs socials e cun autras instituziuns relevantas pussibilitescha da sustegnair ils uffants e giuvenils en moda cumplessiva. Il barat interdisciplinar procura, che tut ils aspects relevants da la situaziun vegnian resguardads. La LAUG sto esser nunbirocratica e facultativa e sto observar la protecziun da datas. Ina collavuraziun cun las scolas, cun ils servetschs socials e cun autras instituziuns relevantas vegn perquai fatga mo cun il consentiment dals uffants u giuvenils pertutgads. Excepziuns èn incidents u cas d'urgenza che ston vegnir annunziads.
Intervenziuns senza il consentiment dals uffants u giuvenils
Sche la lavur averta cun uffants e cun giuvenils survegn ina infurmaziun concreta davart ina pussaivla periclitaziun dal bainstar d'in uffant u sch'ella constatescha in tal incident, poi esser necessari d'instradar intervenziuns er senza il consentiment dals uffants u giuvenils pertutgads.
Tut tenor la grevezza da l'incident, las infurmaziuns davart la pussaivla periclitaziun dal bainstar d'in uffant e la furma da l'organisaziun respectiva sto la persuna superiura vegnir infurmada ed integrada. I sto vegnir examinà, sch'il cas sto vegnir annunzià a la APUC. Sch'ina annunzia è necessaria, duess quella – sche pussaivel – vegnir suttascritta da la persuna superiura.
Sche geniturs u persunas responsablas per l'educaziun na fan betg part directamain u indirectamain da la periclitaziun, stoi vegnir sclerì, co e tgi che als infurmescha davart la situaziun. Schebain ils uffants u giuvenils pertutgads vegnan infurmads davart las intervenziuns planisadas, dependa mintgamai dal cas singul e da las circumstanzas specificas.
Scrit en collavuraziun cun: Federaziun tetgala da la promoziun d'uffants e da giuvenils dal Grischun – jugend.gr
Sport
Cundiziuns generalas
In'uniun da sport porscha pussaivladads da trenar, concurrenzas ed activitads da temp liber per tut las gruppas da vegliadetgna e da prestaziun. Ella promova sport per tuts, sustegna sportistas e sportists talentads e metta a disposiziun ina purschida multifara. La gronda part da las uniuns da sport è organisada sco uniun inscritta. Quai pussibilitescha la segirezza giuridica e la renconuschientscha sco organisaziun d'utilitad publica.
Confidenzialitad ed obligaziun d'annunzia
Collavuraturas e collavuraturs d'ina uniun en uffizi d'onur u en uffizi principal n'èn betg obligads tenor lescha da mantegnair discreziun. Per motivs etics duessan els però tractar infurmaziuns sensiblas en moda confidenziala.
En cas ch'ina periclitaziun dal bainstar d'in uffant vegn suspectada, po exister in'obligaziun d'annunzia. En quest connex ston ins differenziar tranter il sectur da sport professiunal cun trenadras e trenaders cun activitad professiunala principala ed il sectur da temp liber cun manadras e manaders voluntars en uffizi d'onur. In'orientaziun porscha l'instrument da lavur «Dretg d'annunzia ed obligaziun d'annunzia a la APUC».
Furmas da barat pussaivlas per il barat colleghial
Cun il «Standard da branscha per il sport Svizzer» (Branchenstandard für den Schweizer Sport) ha Swiss Olympic introduci in'ovra reglamentara obligatorica che definescha las aspectativas envers las organisaziuns da sport. Questas prescripziuns valan per las federaziuns naziunalas a partir da l'onn 2025 e per tut las uniuns che survegnan meds finanzials federals u contribuziuns da G+S a partir dal 1. da schaner 2026. Il standard da branscha per il sport svizzer formulescha cleramain questas pretensiuns centralas en ils secturs governance, uman ed ambient.
En il center dal sectur «uman» stattan la protecziun ed il bainstar da tut las persunas participadas, surtut d'uffants e da giuvenils. Quai cumpiglia cleras directivas da cumportament, mesiras preventivas sco er la recumandaziun da nominar persunas responsablas per l'etica.
Persunas responsablas per l'etica èn spezialmain adattadas per far in barat colleghial, perquai ch'ellas èn tranter auter sensibilisadas per quest tema. In barat colleghial po però er vegnir realisà cun autras manadras u manaders da l'uniun ubain cun commembras u commembers da la suprastanza.
Igl è impurtant da documentar il barat, d'infurmar la suprastanza e da definir cuminaivlamain eventuals pass. Sch'i èn necessarias ulteriuras mesiras, surpiglia savens ina persuna da la suprastanza la responsabladad.
Exempels per pussaivladads d'intervenziun SUENTER il barat colleghial
Integraziun dals uffants u giuvenils
Tschertgai, tut tenor pussaivladad, il discurs cun l'uffant u cun il giuvenil. En quest connex poi sa mussar, ch'i na dovra naginas ulteriuras mesiras. Sch'i dovra tuttina mesiras, examinai, sch'igl è pussaivel da far ulteriurs discurs per sclerir dumondas avertas, ubain sch'igl è raschunaivel d'integrar ulteriuras persunas, sco per exempel commembras u commembers da la suprastanza.
Integraziun dals geniturs
Cun il consentiment dals uffants u giuvenils pon er vegnir integrads ils geniturs. Per quai stoi vegnir fixà, tgi che entra en contact cun ils geniturs e tgi che maina il discurs. En situaziuns criticas poi esser necessari da desister d'in discurs cun ils geniturs. En tals cas duess percunter vegnir contactà il Post d'annunzia da Swiss Sport Integrity u la Cussegliaziun spezialisada per la protecziun d'uffants.
Post d'annunzia da Swiss Sport Integrity e Cussegliaziun spezialisada per la protecziun d'uffants
Il Post d'annunzia da Swiss Sport Integrity è en emprima lingia cumpetent per violaziuns da cunfins tras persunas en il sport, per exempel en cas da cumportaments abusivs da manadras u manaders ubain da persunas che assistan. Persunas che han in'obligaziun da protecziun e da surveglianza speziala, sco manadras u manaders, assistentas u assistents u persunas superiuras da persunas che assistan e d'emploiadas ed emploiads d'organisaziuns da sport, èn obligadas d'annunziar las cuntravenziuns cunter l'etica, ch'ellas han constatà, a Swiss Sport Integrity: sportintegrity.ch. Il Post d'annunzia stat a disposiziun a tut las persunas che vulan annunziar eventualas cuntravenziuns u incunvegnientschas – er en moda anonima. El porscha in'emprima cussegliaziun davart pussaivlas modas da proceder, elavura cuntravenziuns supponidas e persequitescha – en cas da basegn – vinavant quellas.
Legiai qua las explicaziuns davart l'obligaziun d'annunzia!
La Cussegliaziun spezialisada per la protecziun d'uffants duess vegnir contactada, sche trenadras u trenaders, assistentas u assistents constateschan en ils conturns dal sport svilups disfavuraivels fin a periclitaziuns dal bainstar d'in uffant, per exempel igiena manglusa, plajas betg tractadas u negligientschas sumegliantas.
Intervenziuns senza il consentiment da l'uffant u dal giuvenil ubain dals geniturs
Tut tenor la grevezza da l'incident, las infurmaziuns davart in'eventuala periclitaziun dal bainstar d'in uffant e la furma da l'organisaziun respectiva sto la suprastanza vegnir infurmada ed integrada. I sto vegnir examinà, sch'il cas sto vegnir annunzià a la APUC e/u al Post d'annunzia da Swiss Sport Integrity.
Sche geniturs u persunas responsablas per l'educaziun na fan betg part directamain u indirectamain da la periclitaziun, stoi vegnir sclerì, co e tgi che als infurmescha davart la situaziun. Schebain ils uffants u giuvenils pertutgads vegnan infurmads davart las intervenziuns planisadas, dependa mintgamai dal cas singul e da las circumstanzas specificas.
Scrit en collavuraziun cun: Uffizi per la scola populara ed il sport dal Grischun