Na restai betg suletta u sulet!

Sche Vus avais in nausch sentiment intern, ina supposiziun u in suspect, na restai betg suletta u sulet. Giai a temp per sustegn – er sche Vus essas ina persuna spezialisada. Il princip da quatter egls è central en la protecziun d'uffants.

Pertge ch'il barat è impurtant

Igl è impurtant da sa barattar cun autras persunas spezialisadas e d'examinar l'atgna percepziun. Svilups disfavuraivels u periclitaziuns dal bainstar d'uffants èn savens fitg cumplexs e pon svegliar reacziuns emoziunalas e sentiments d'impussanza er tar las persunas spezialisadas. Ils agens sentiments han savens in connex cun las experientschas e las ideas persunalas. Igl è impurtant d'esser conscient da quai, per pudair valitar endretg observaziuns ed indizis e per pudair differenziar tranter fatgs e supposiziuns. Considerai il barat sco resursa impurtanta, per reducir intschertezzas e per chapir meglier la situaziun. Ina premissa essenziala per ina protecziun d'uffants efficazia è quella, che la collavuraziun tranter tut las persunas participadas funcziunia e saja caracterisada da stima e da la prontezza da cooperar.

Furmas da barat pussaivlas èn:

• discurs en il team e/u cun persunas superiuras
• colliaziun cun autras persunas spezialisadas, ch'enconuschan l'uffant or d'in auter context e fan uschia valair ina perspectiva cumplementara
• consultaziun d'in ulteriur sustegn professiunal

Controllai avant in barat, sche Vus stuais dumandar il consentiment dals geniturs ubain da l'uffant ch'è abel da giuditgar u dal giuvenil – ubain sch'i basta da far in barat anonimisà. Scleri plinavant, tge commembras u commembers dal team ch'enconuschan la situaziun da l'uffant u giuvenil.

Dretg d'annunzia ed obligaziun d'annunzia

Sche persunas spezialisadas u persunas da referiment han in suspect davart ina periclitaziun dal bainstar d'in uffant, sa dumondan ellas savens sco emprim: Stoss jau u dastg jau annunziar mias observaziuns? En la protecziun d'uffants fan ins la differenza tranter il dretg d'annunzia e l'obligaziun d'annunzia. Persunas che han tras lur professiun contact cun uffants e giuvenils, na pon betg mo avair il dretg da far in'annunzia, mabain er esser obligadas da far quai.

Dretg d'annunzia ed obligaziun d'annunzia a la APUC

Reglas per in barat cun terzas persunas

En cas d'in svilup disfavuraivel (supponì) d'uffants u da giuvenils ubain d'ina periclitaziun dal bainstar d'uffants (supponida) èsi decisiv da mantegnair la calma e da betg violar eventualas obligaziuns da discreziun.

Entaifer ina instituziun dastgais Vus barattar infurmaziuns che sa refereschan ad in cas u ad ina persuna, cun collavuraturas u collavuraturs ch'èn incaricads directamain cun la situaziun da l'uffant u giuvenil. Sch'il barat ha lieu cun commembras u commembers dal team che n'èn betg involvids directamain, ubain cun posts spezialisads externs, vegn il barat fatg en moda anonimisada. Sco alternativa pudais Vus dumandar ils geniturs per ina dispensaziun en scrit da l'obligaziun da discreziun. I n'è betg adina pussaivel d'integrar ils geniturs en il process. Sch'i n'è betg avant maun ina dispensaziun explicita da l'obligaziun da discreziun u sche Vus supponis, che l'integraziun dals geniturs pudess procurar per in'ulteriura periclitaziun da l'uffant, na dastgais Vus betg dar vinavant a terzas persunas infurmaziuns che sa refereschan ad in cas (excepziun: annunzia a la APUC). Vus dastgais dentant vinavant:

• Far ina discussiun dal cas interna cun commembras e commembers dal team ch'èn incaricads en chaussa, per vegnir a savair las valitaziuns d'autras forzas spezialisadas.
• Convocar ina discussiun dal cas interna anonimisada, sche las commembras ed ils commembers dal team participads n'èn betg involvids directamain en la situaziun da l'uffant u giuvenil.
• Descriver il cas en moda anonimisada resp. a la Cussegliaziun spezialisada per la protecziun d'uffants e sa laschar cussegliar davart l'ulteriur proceder.

Dispensaziun vicendaivla da l'obligaziun da discreziun

Rolla da la famiglia

Ils geniturs èn las persunas da contact las pli impurtantas e las pli efficazias. Els han la responsabladad principala per il bainstar da l'uffant. Sch'els na pon betg accumplir questa incumbensa u sch'els fan sezs part da la periclitaziun, ston els vegnir sustegnids en l'interess dal bainstardals uffants e giuvenils. Cun accumpagnament, sustegn e cussegliaziun duain els vegnir rendids abels da procurar per il bainstar da lur uffants.

L'analisa da svilups disfavuraivels u da periclitaziuns dal bainstar d'uffants mussa, ch'i vegn savens fatg memia svelt in giudicament davart la famiglia e che quest giudicament na vegn betg mess suffizientamain en dumonda. Perquai èsi inditgà d'adina puspè trair endament, che la famiglia è per regla il pli impurtant lieu per midar persistentamain en moda positiva il bainstar da l'uffant u giuvenil. En ils pli blers cas vulan ils geniturs da princip il meglier per lur uffant. Periclitaziuns resultan savens pervia d'ina surchargia u d'ina surpretensiun.

I vala perquai adina la paina d'examinar e da resguardar la participaziun dals geniturs, dals uffants e dals giuvenils.

• Ina participaziun augmenta marcantamain las schanzas per midadas positivas e rinforza l'autoefficacitad da las persunas pertutgadas.
• Tras ina integraziun tempriva survegnan ils geniturs la pussaivladad da contribuir sezs a la midada da la situaziun, avant ch'i vegnan prendidas mesiras externas per il sistem famigliar.

Na targlinai perquai betg d'integrar a temp ils geniturs e da far attent els sin modas da cumportament concretas. Excepziun: En cas che Vus essas malsegira u malsegir, sche la segirezza u il bainstar dals uffants u giuvenils ubain la retschertga da las cumprovas en in'eventuala procedura penala vegn periclitada tras l'integraziun. Preparai il discurs cun ils geniturs.

Propostas per discurs cun geniturs

Integraziun dals uffants e giuvenils

Controllai en mintga cas singul, co e cura ch'ils uffants e giuvenils pon vegnir integrads en process da la protecziun d'uffants. Il gener da la participaziun dependa da la vegliadetgna e dal stadi da svilup dals uffants u giuvenils. Resguardai lur giavischs e basegns en Vossas valitaziuns e decisiuns. Rinforzai ils uffants e giuvenils, cun infurmar davart il proceder e cun discutar – uschenavant che quai è pussaivel – cuminaivlamain ils proxims pass. Sch'i fiss necessari da far in'annunzia da periclitaziun a la APUC, communitgai er quai als uffants e giuvenils pertutgads.