Sin basa da la valitaziun da la situaziun, dals resultats dal barat colleghial e da las intervenziuns ch'èn eventualmain gia vegnidas realisadas, contactais Vus, en cas da basegn, en il pass 3 dal process la Cussegliaziun spezialisada per la protecziun d'uffants, quai per planisar ensemen cun las persunas spezialisadas l'ulteriur proceder.

Documentai ils temas discutads, las recumandaziuns obtegnidas e l'ulteriur proceder en il schurnal (pagina 13 e 15).

Cussegliaziun spezialisada per la protecziun d'uffants

La Cussegliaziun spezialisada per la protecziun d'uffants porscha a las persunas spezialisadas ed a las persunas da referiment ina cussegliaziun nuncumplitgada, anonima e gratuita, en cas ch'igl è difficil da valitar dubis u segns davart svilups disfavuraivels resp. davart ina periclitaziun dal bainstar d'in uffant. La Cussegliaziun spezialisada per la protecziun d'uffants consultescha, en cas da basegn, ensemen cun Vus la gruppa da focus per la protecziun d'uffants. Quella porscha a Vus ina valitaziun interdisciplinara dad expertas ed experts.

La Cussegliaziun spezialisada per la protecziun d'uffants sustegna Vus tranter auter en ils suandants secturs:

• utilisaziun dal manual e dal schurnal
• valitaziun da la situaziun
• valitaziun da la necessitad da prender mesiras immediatas e/u mesiras da protecziun
• examinaziun da las intervenziuns gia realisadas
• infurmaziuns davart persunas spezialisadas e posts spezialisads cumpetents
• pussaivladad da discutar il cas en la gruppa da focus per la protecziun d'uffants

Gruppa da focus

La gruppa da focus sa cumpona d'expertas ed experts spezialisads cun experientscha en il sectur da la protecziun d'uffants. La discussiun dal cas en la gruppa da focus è ina cussegliaziun unica ed anonima. Expertas ed experts da la gruppa da focus sustegnan la valitaziun e fan recumandaziuns resp. preschentan pussaivladads d'agir. Schebain in cas vegn discutà en la gruppa da focus, decida la Cussegliaziun spezialisada per la protecziun d'uffants.