Sco furnitura da servetschs sustegna la tgira da monuments proprietarias e proprietaris d'edifizis istorics da valur en connex cun la perscrutaziun, la restauraziun e la documentaziun da quests edifizis. Per mesiras da restauraziun professiunalas pon vegnir dumandadas – sur la tgira da monuments – subvenziuns chantunalas e federalas. En il sectur da la planisaziun locala metta la tgira da monuments a disposiziun a las vischnancas ed a lur biros da planisaziun incaricads glistas d'inventaris sco basa per determinar areals da protecziun ed objects singuls protegids.

Nossas cussegliadras e noss cussegliaders da construcziun, nossa planisadra sco er nossas collavuraturas e noss collavuraturs scientifics ed administrativs As gidan gugent en cas da dumondas davart il patrimoni cultural architectonic. Nossa biblioteca e noss archiv pon vegnir duvrads – sin annunzia – per retschertgas scientificas.