Per entrar en la 1. classa dal gimnasi absolvan las candidatas ed ils candidats da la 6. classa da la scola primara l'examen d‘admissiun 1G.

Infurmaziuns generalas examen d‘admissiun 1G 

Admissiun

A l'examen d'admissiun 1G vegnan admess mo scolaras e scolars da la 6. classa da la scola primara, sche almain in da lur geniturs ha ses domicil civil en il chantun Grischun.

In'admissiun a l'examen durant la 5. classa da la scola primara u durant la 1. classa dal stgalim secundar I è exclusa. Excepziuns n'èn betg pussaivlas.

Roms d’examen

• Eprima lingua* (tudestg, rumantsch u talian): 90 minutas examen en scrit
• Matematica 
  1. part (en scrit): 60 minutas examen en scrit
  2. part (quintar a chau en moda fixada): 30 minutas examen en scrit

*A chaschun da l'annunzia decleran las candidatas ed ils candidats, ensemen cun las persunas responsablas per l'educaziun, ina da las linguas chantunalas rumantsch, tudestg u talian sco lur emprima lingua, q.v.d. sco quella lingua, en la quala els vulan vegnir examinads (decleraziun persunala). Las candidatas ed ils candidats che tschernan rumantsch u talian sco emprima lingua, survegnan las dumondas d'examen en matematica part 1 e part 2 en l'emprima lingua tschernida ed en tudestg.

Disposiziuns davart las enconuschientschas preliminaras

Calculaziun da las notas

La nota finala (media da l'examen) ch'è relevanta per l'admissiun en la 1. classa dal gimnasi d'ina scola media grischuna, correspunda a la media arrundada sin duas cifras suenter il punct, ord la nota dal rom d'examen linguas, ord la nota dal rom d'examen matematica ed ord la nota d'admissiun.

La nota dal rom d'examen linguas sa cumpona da la nota d'examen, arrundada sin quartas notas, en l'emprima lingua e da la nota per la segunda lingua da l'attestat da l'emprim semester da la 6. classa d'ina scola primara, che instruescha tenor il Plan d'instrucziun 21 en il champ d'applicaziun d'ina legislaziun chantunala da scola (nota d'attestat). Ella correspunda a la media arrundada sin duas cifras suenter il punct, ord la nota d'examen en l'emprima lingua ed ord la nota d'attestat per la segunda lingua.

Nota dal rom d'examen matematica

Il rom d'examen matematica cumpiglia dus examens cun duas notas separadas: matematica part 1 – en scrit (cun accent sin algebra e geometria) e part 2 – quintar a chau en moda fixada. Tuttas duas parts dattan mintgamai ina nota d'examen arrundada sin quartas notas. La nota dal rom d'examen matematica correspunda a la media arrundada sin duas cifras suenter il punct, ord la nota dal rom d'examen matematica part 1 (en scrit) ed ord la nota dal rom d'examen matematica part 2 (quintar a chau en moda fixada). La nota dal rom d'examen matematica part 1 vegn resguardada a dus terzs e la nota dal rom d'examen part 2 vegn resguardada ad in terz.

Nota d'admissiun

Mo candidatas e candidats che absolvan l'examen d'admissiun durant la 6. classa primara d'ina scola che instruescha tenor il Plan d'instrucziun 21 en il champ d'applicaziun d'ina legislaziun chantunala da scola (pia senza onn intermediar u onn da scolaziun supplementar), han il dretg ch'i vegnia resguardada ina nota d'admissiun. Tut las autras candidatas ed ils auters candidats n'han betg quest dretg.

La nota d'admissiun correspunda a la media arrundada sin duas cifras suenter il punct, ord las suandantas nov notas da l'attestat dal 1. semester:

• Emprima lingua
• Segunda lingua (sco segunda lingua vala per scolaras e scolars da scolas u da classas bilinguas ina da las duas linguas chantunalas che vegnan duvradas sco lingua d'instrucziun, dentant betg la lingua ch'è vegnida tschernida sco lingua d'examen)
• Englais
• Aritmetica e geometria
• Natira, uman, societad
• Art figurativ
• Chant e musica
• Moviment e sport
• Medias ed informatica  

Exempel da calculaziun da las notas 

➔ Tar il calculatur da las notas

(document per tudestg)

Criteris d’admissiun

Per reussir l'examen d'admissiun 1G sto vegnir cuntanschida ina media da l'examen da 4.50. Ultra da quai na dastgan las divergenzas envers las notas dals roms d'examen – da la nota 4 vers engiu – betg importar dapli che 0.75 puncts (la nota d'admissiun quinta medemamain sco nota dal rom d'examen).

La 1. classa dal gimnasi na po betg vegnir repetida. Tgi che n'ademplescha betg las disposiziuns da promoziun a la fin da la 1. classa dal gimnasi, sto entrar en la scola secundara.

Directivas concernant la midada da l’emprima classa dal gimnasi inferiur al stgalim superiur da la scola populara 
(document per tudestg)

Meds auxiliars e material

Ils candidats ston s’identifitgar tar ils examens d’admissiun entras in palpiri d’identitad valaivel (carta d’identitad, pass u legitimaziun d’esters).

A l'examen d'admissiun è il suandant da prender cun sai:

Examen emprima lingua 

• Stilograf u culli (blau u nair), fieuters da pilot n’èn betg lubids
• L’utilisaziun da marcaders, da la lingera e dal geotriangul è lubida.

Examen da matematica part 1 – en scrit

• Stilograf u culli (blau u nair), fieuters da pilot n’èn betg lubids
• Rispli (pensums da construcziun vegnan fatgs cun rispli), gumma, gizzarisplis
• Colur verda (per marcar schliaziuns en ils pensums da geometria)
• Circul, geotriangul ed lingera

Examen da matematica part 2 – quintar a chau en moda fixada

• Nagut. Ins dastga be duvrar il culli che vegn mess a disposiziun.

Ulteriuras infurmaziuns

Tut ils pensums èn da schliar directamain sin ils documents d‘examen. Tar ils examens èsi scumandà da duvrar meds auxiliars che n`èn betg lubids expressivamain (p. ex. calculaders da tastga, vocabularis d’ina u duas linguas, vocabularis electronics, telefonins u smartwatches).

Il diever d’in rispli è cun excepziun da las construcziuns da schliaziuns geometricas en il rom d’examen matematica, 1. part, betg lubì.

Exempels d'examens

Exempels d’examens dals davos 4 onns: Exempels d'examens

Las dumondas e respostas las pli frequentas 

Cura e nua han lieu occurrenzas d'orientaziun davart ils examens d'admissiun?

As drizzai p.pl. directamain a la scola media respectiva.

Dastg jau duvrar fieuters da pilot?

Na. La tinta dals fieuters da pilot svanescha tar influenza da chaud (chalira da fricziun). Tar ils documents stampads da d’omadus varts exista il privel, che en cas da correcturas tras far or cun la gumma vegn la scrittira sin la vart davos illegibla resp. svanescha.

Poss jau prender cun mai ina pitschna marenda ed ina bavronda en la stanza
d’examen?

Gea.