Per entrar en la 3. classa dal gimnasi ed en la 1. classa da la SMC, SMI u SMS absolvan las candidatas ed ils candidats l'examen unifitgà.

Fegl d'infurmaziun per l'examen unifitgà

Admissiun

A l'examen unifitgà vegnan admess mo scolaras e scolars da la 2. u 3. classa dal stgalim secundar I, sche almain in da lur geniturs ha ses domicil civil en il chantun Grischun.

L'admissiun suenter il temp da scola obligatoric è pussaivla fin e cun l'onn chalendar che las candidatas ed ils candidats cuntanschan la maiorennitad (premess che almain in da lur geniturs haja ses domicil civil en il chantun Grischun).

L'admissiun a l'examen durant la 1. classa dal stgalim secundar I è exclusa. Excepziuns n'èn betg pussaivlas.

Roms d’examen

• Eprima lingua* (tudestg, rumantsch u talian): 90 minutas examen en scrit
• Englais
  1. Part: 15 minutas chapientscha da tadlar
  2. Part: 60 minutas examen en scrit
• Aritmetica & algebra: 60 minutas examen en scrit
• Geometria: 60 minutas examen en scrit
  

*A chaschun da l'annunzia a l'examen decleran las candidatas ed ils candidats, ensemen cun las persunas responsablas per l'educaziun, lur emprima lingua, q.v.d. quella lingua, en la quala els vegnan examinads en l'emprima lingua ed en la quala els survegnan las dumondas d'examen er en ils ulteriurs roms (decleraziun persunala). Excepziun: Per ils roms aritmetica & algebra e geometria n'existan naginas dumondas d'examen per rumantsch.

Disposiziuns davart las enconuschientschas preliminaras

Disposiziuns davart las enconuschientschas preliminaras Englais: Verbs irregulars

Disposiziuns davart las enconuschientschas preliminaras Tudestg: Detailliste Sprache im Fokus (document en tudestg)

Calculaziun da las notas

La nota finala (media da l'examen) ch'è relevanta per l'admissiun en la 3. classa gimnasiala sco er en la 1. classa da la SMC, SMI u SMS d'ina scola media grischuna, vegn calculada sco media arrundada sin duas cifras suenter la comma, quai sin fundament da la nota dal rom d'examen en l'emprima lingua, da las notas d'englais, d'aritmetica ed algebra, da geometria e da la nota d'admissiun.

Nota dal rom d'examen linguas

La nota dal rom d'examen linguas sa cumpona da las duas notas d'examen, arrundadas sin quartas notas, en l'emprima lingua ed en englais. Ella correspunda a la media da las notas d'examen, arrundada sin duas cifras suenter il punct.

Nota dal rom d'examen matematica

La nota dal rom d'examen matematica sa cumpona da las duas notas d'examen, arrundadas sin quartas notas, en aritmetica & algebra ed en geometria. Ella correspunda a la media da las notas d'examen, arrundada sin duas cifras suenter il punct.

Nota d’admissiun

Mo candidatas e candidats che absolvan l'examen d'admissiun durant la 2. classa secundara d'ina scola che instruescha tenor il Plan d'instrucziun 21 en il champ d'applicaziun d'ina legislaziun chantunala da scola, han il dretg ch'i vegnia resguardada ina nota d'admissiun. Tut las autras candidatas ed ils auters candidats n'han betg quest dretg.

La nota d'admissiun correspunda a la media arrundada sin duas cifras suenter il punct, ord las suandantas set notas da l'attestat dal 1. semester:

• Geografia
• Istorgia
• Natira e tecnica
• Art figruativ
• Chant e musica
• Moviment e sport
• Segunda lingua (sco segunda lingua vala per scolaras e scolars da scolas u da classas bilinguas ina da las duas linguas chantunalas che vegnan duvradas sco lingua d'instrucziun)
  

Exempel da calculaziun da las notas 

 ➔ Tar il calculatur da las notas

(document en tudestg)

Criteris d’admissiun

Per reussir l'examen d'admissiun en la 3. classa dal gimnasi sto vegnir cuntanschida ina media da 4.50 en l'examen unifitgà. Ultra da quai na dastgan las divergenzas envers las notas dals roms d'examen – da la nota 4 vers engiu – betg importar dapli che 0.75 puncts (la nota d'admissiun quinta medemamain sco nota dal rom d'examen).

Per reussir l'examen en la SMC, SMS u SMI sto vegnir cuntanschida ina media da l'examen da 4.00. Ultra da quai na dastgan las divergenzas envers las notas dals roms d'examen – da la nota 4 vers engiu – betg importar dapli che 0.75 puncts (la nota d'admissiun quinta medemamain sco nota dal rom d'examen).

Material e meds d'agid

• Als examens d'admissiun ston las candidatas ed ils candidats preschentar in document d'identitad valaivel (carta d'identitad, passaport u document da legitimaziun da persunas estras).
• Als examens ston las candidatas ed ils candidats prender cun sai material da scriver (stilograf u culli [blau u nair], rispli, colurs [incl. ina colur verda per marcar las soluziuns da las dumondas da geometria]), gumma, gizzarisplis, circul, geotriangul e lingera.
• En il rom d'examen geometria dastga vegnir duvrà in calculatur da giaglioffa senza CAS, che n'è betg programmabel e che na sa betg preschentar graficas. As atschertai per plaschair a temp, che Voss calculatur da giaglioffa saja permess a l'examen d'admissiun. En cas da dubi vegni recumandà da dumandar suenter tar Vossa persuna d'instrucziun da matematica u tar ina fatschenta spezialisada. In model admissibel e frequent sin ils stgalims secundars I e II è il calculatur da giaglioffa TI-30X Plus (betg da scumbigliar cun il calculatur betg admissibel TI-30X Pro).
  

Ulteriuras infurmaziuns

Per l'examen dastgan vegnir duvrads mo ils documents d'examen (nagin agen palpiri da notizias). Tut las dumondas ston vegnir schliadas directamain sin ils documents d'examen. Ils examens ston vegnir scrits cun in culli u cun tinta (en blau u nair) (excepziun: dissegns geometrics). Stilografs Pilot n'èn betg permess. Cun excepziun da la construcziun da soluziuns geometricas en il rom d'examen geometria n'èsi betg permess da duvrar in rispli.

En ils roms d'examen emprima lingua, englais sco er aritmetica & algebra n'èn admess nagins meds d'agid. Lingera, geotriangul e fieuters fluorescents dastgan ins dentant duvrar.

Als examens èsi scumandà da duvrar meds d'agid che n'èn betg admess expressivamain (per exempel vocabularis monolings u bilings, vocabularis electronics, handys u smartwatches).

Exempels d'examens

Qua chattais Vus exempels dals examens dals ultims 4 onns: Exempels d'examens

Dumondas frequentas e respostas  

Han lieu occurrenzas d'orientaziun davart ils examens d'admissiun?

As drizzai p.pl. directamain a la scola media respectiva.

Dastgan ins duvrar stilografs Pilot/Frixion?

Na. La tinta dals stilografs Pilot svanescha, sch'i dat in effect termic (chalira da fricziun). Sin ils documents d'examen ch'èn stampads dad omaduas varts exista il privel, che la scrittira daventa nunlegibla resp. svanescha, en cas ch'ins fa correcturas cun la gumma.

Poss jau prender cun mai ina pitschna marenda ed ina bavronda en la stanza d’examen?

Gea.

Poss jau, sche jau hai reussì l'examen unifitgà per la SMC, SMS u SMI, entrar er en ina scola da maturitad spezialisada en il chantun Grischun?

Da princip gea. As drizzai per raschuns da cumpetenza per ulteriuras infurmaziuns a l'Uffizi per la furmaziun professiunala, Grabenstrasse 1, 7001 curia, tel 081 / 257 27 68 u info@afb.gr.ch.