Navigation

Inhaltsbereich

  • Erste Mitteilung
  • Neuen Beitrag einfügen

Puntraschigna è ina da las emprimas vischnancas che ha introducì il dretg da votar e d'eleger da las dunnas sin plaun communal. Ussa envida il Post da stab per l'egualitad da las schanzas a festivar il giubileum dal dretg da votar sin plaun chantunal ils 30 da zercladur 2022 a Puntraschigna. La performance vocala «Vuschs visiblas – Visible Voices» vegn realisada en il rom da la festa «Viva la Via» e vegn accumpagnada d'ina exposiziun.

Avant 50 onns èsi er stà uschè lunsch en il Grischun: Las dunnas han survegnì l'onn 1972 il dretg da votar e d'eleger sin plaun chantunal. A promover quests dretgs ha segiramain gidà la finala in giavisch da blers onns da las dunnas grischunas, numnadamain l'introducziun dal dretg da votar e d'eleger sin plaun federal l'onn 1971. In punct impurtant èn dentant er stadas las stentas da las emprimas tschintg vischnancas che han concedì gia l'onn 1968 il dretg da votar e d'eleger a las dunnas. En ina da questas vischnancas da pionier, numnadamain a Puntraschigna, envida il Post da stab per l'egualitad da las schanzas ils 30 da zercladur 2022 a la festa da giubileum. L'occurrenza vegn organisada sco represchentaziun ospitanta en il rom da la festa «Viva la Via».

L'occurrenza da giubileum cumpiglia la performance «Vuschs visiblas – Visible Voices» tenor la partitura Four6 da John Cage ed in'exposiziun mobila che permetta da sfunsar en l'atmosfera da quella giada e che intensivescha l'egliada per la situaziun actuala. La performance vocala è vegnida sviluppada aposta per quest giubileum. Ils 5 da mars 2022, il di da la votaziun a l'urna da quella giada, è ella vegnida represchentada per l'emprima giada a Cuira. Tras questa performance daventa la tematica dal dretg da votar perceptibla sensitivamain, uschia ch'ella surpassa il stretg connex istoric. Quatter dunnas e lur experientschas da vita vegnan mussadas. Lur differents puncts da vista e munds emoziunals sa maschaidan ad in spievel cumplex da l'autoexpressiun feminina e tschentan la dumonda eterna a nus tuttas e tuts, quant dretg che nus dastgain prender per nossa atgna vusch – en la societad sco er en la vita privata.

«Sa far valair davanttiers»
La performance che dura ina mes'ura, vegn represchentada ils 30 da zercladur 2022, a las 18.00, en il Center da congress e da cultura a Puntraschigna. La presidenta communala Nora Saratz Cazin dilucidescha silsuenter il giubileum ord vista d'ina politicra activa. «Dapi in pau dapli che 50 onns dastgain nus dunnas votar ed eleger», resumescha Nora Saratz Cazin. Ses giavisch saja che anc dapli dunnas e giuvenils gughegian da concepir activamain la politica e nossa societad ed occupian dapli uffizis politics. «Igl è temp che nus n'ans participeschian betg pli mo davostiers a las discussiuns, mabain che nus ans fetschian valair davanttiers.»
L'exposiziun mobila davart il dretg da votar e d'eleger da las dunnas en il Grischun è averta da las 16.00 fin las 20.00. Scleriments ed ulteriuras infurmaziuns survegnis Vus sut www.pontresina.ch/vivalavia e www.stagl.gr.ch.

Planisà ulteriura represchentaziun a Tavau
Tar las vischnancas da pionier tutgan ultra da Puntraschigna er Cuira, Landarenca, Murmarera e Seglias. Successivamain èn suandadas ulteriuras vischnancas, tranter auter Tavau l'onn 1970. Ils 27 d'avust 2022 vegn organisada in'ulteriura represchentaziun ospitanta al Kulturplatz a Tavau. Las ultimas 13 vischnancas grischunas èn vegnidas sfurzadas l'onn 1983 tras l'obligatori chantunal d'introducir il dretg da votar e d'eleger da las dunnas sin plaun communal. Tgeninas che quai èn, tradescha l'exposiziun mobila.

Fotografia agiuntada:

Stimmperformance «Vuschs visiblas – Visible Voices»

Performance vocala «Vuschs visiblas – Visible Voices», premiera dals 5 da mars 2022 a Cuira. Da sanestra a dretga: Ursina Giger, Annika Hunziker, Anna Kühn, Wanda Wylowa
© Livia Mauerhofer, Südostschweiz

Infurmaziuns:

Susanna Mazzetta, collavuratura giuridica, Post da stab per l'egualitad da las schanzas, tel. +41 81 257 35 72, e‑mail Susanna.Mazzetta@stagl.gr.ch 

 

Responsabladad: Post da stab per l'egualitad da las schanzas

Neuer Artikel