Che decisiuns da dunnas vegnan messas en dumonda plitgunsch, questas experientschas han confermà pliras politicras communalas e plirs politichers communals en uffizi a chaschun da l'occurrenza «Dunnas e politica: Schanzas e sfidas per la regiun Engiadina Bassa Val Müstair» ils 12 da mars 2024 a Scuol. Accentuà è dentant er vegnì: Politica communala fa plaschair, perquai ch'ella è datiers da las persunas.
Ils 12 da mars 2024 ha il tema «Dunnas e politica: Schanzas e sfidas per la regiun Engiadina Bassa Val Müstair» attratg bundant 30 persunas interessadas en la sala communala da Scuol. L'occurrenza è stada la segunda fermada da la retscha d'occurrenzas «Promo Femina on Tour» dal Post da stab per l'egualitad da las schanzas e da la Scola auta spezialisada dal Grischun. Las discussiuns animadas han mussà: Las dumondas, pertge che la quota da dunnas stagnescha en la politica communala e tge mesiras che pon vegnir prendidas per augmentar la quota da dunnas, èn fitg actualas. Las cifras sa movan dapi onns sin in nivel bass, sco che mussa l'enquista annuala da l'Uffizi da vischnancas.
Sin la dumonda or da la sala, sche dunnas vegnian sutvalitadas en la politica communala, ha respundì Aita Zanetti, presidenta communala da Scuol, al podium: «Sche dunnas vegnan sutvalitadas, na sai jau betg, ma i dat in'autra percepziun.» Decisiuns vegnian plitost messas en dumonda. Gabriella Binkert Becchetti, presidenta communala da Val Müstair, ha confermà questa constataziun: «Decisiuns vegnan discutadas danovamain. Gea, forsa er in zic sutvalitadas.» Las politicras communalas preschentas han declerà, che metter en dumonda decisiuns possia chaschunar dubis da sasez e ch'ellas tschertgian alura il sbagl l'emprim ina giada tar sasezzas. Quai tschessia dentant suenter l'emprim onn d'uffizi.
Politica communala è politica pragmatica
La motivaziun da s'engaschar politicamain è per Anina Sieber d'ina vart la midada dal clima, ma er la qualitad da viver en la regiun. Sco dunna giuvna interessada a la politica è ella er stada preschenta al podium sut la direcziun dad Alberto Palaia, Post spezialisà per la plurilinguitad, e da Barbara Wülser, Post da stab per l'egualitad da las schanzas. Per ella èn medemamain èn per ella impurtants lieus da dimora ed activitads da temp liber per giuvenils. Decisiuns da la politica communala na pertutgan betg mo il futur, mabain er ses mund da viver actual. Perquai èsi tenor Anina Sieber impurtant da s'interessar sco dunna giuvna per la politica communala.
En la politica communala gioga la politica da partida mo ina pitschna rolla. In'appartegnientscha ad ina partida n'è betg absolutamain necessaria, po dentant esser utila per mobilisar per l'elecziun. Il bel da la politica communala, uschia Aita Zanetti, saja la proximitad a l'ambient social. La societad duai vegnir colliada. Construir punts la reusseschia bain, uschia Aita Zanetti. «Politica communala fa plaschair, perquai ch'ins po concepir.»
Promover e rinforzar dunnas
En in open space han las participantas ed ils participants discutà intensivamain davart las mesiras proponidas da la plattafurma Promo Femina. Igl è sa mussà, ch'il tema dunnas en la politica communala n'è betg mo ina dumonda da l'egualitad, mabain pertutga er il futur ed ils munds da viver en las regiuns e da las generaziuns futuras. La represchentanza bassa da dunnas en uffizis politics premetta vinavant mesiras per promover e per motivar dunnas, quai per rinforzar la diversitad e la represchentanza en la politica communala.
La quota bassa da dunnas vegn anc ad occupar pli ditg las vischnancas. La prontezza da s'engaschar per la communitad sin plaun local, sa reducescha tendenzialmain tenor Simon Theus da l'Uffizi da vischnancas. Per l'occupaziun dals uffizis vegnissan duvradas dunnas. Dunnas ston vegnir encuraschadas, promovidas e motivadas, uschia in facit da l'occurrenza.
Dapli infurmaziuns
• PromoFemina – Pagina d'internet dal project SAS dal Grischun
• PROMO Femina on Tour (gr.ch)
• Represchentanza da dunnas en suprastanzas communalas dal Grischun 2024 (gr.ch)