PROMO Femina on Tour
En executivas communalas svizras è mo stgars in quart dals sezs occupà da dunnas. Questa sutrepreschentanza clera conferma la retschertga regulara da l'Uffizi da vischnancas dal Grischun. Il Center per management d'administraziun da la Scola auta spezialisada dal Grischun (SASGR) ha examinà quest fenomen per incumbensa ed ensemen cun il Post da stab per l'egualitad da las schanzas dal Grischun e da quatter ulteriurs chantuns (SG, ZH, VS, AR). En in process da dialog vast è vegnida sviluppada da l'october 2020 fin il mars 2022, en il rom dal project PROMO Femina, ina plattafurma cun mesiras pussaivlas, divididas tenor ils stakeholders ils pli pertutgads: dunnas, raits, partidas e vischnancas.
Cun «PROMO Femina on Tour» vegnan valurisadas las enconuschientschas dal project PROMO Femina. La retscha d'occurrenzas sa ferma en trais regiuns dal Grischun. Ensemen cun represchentantas localas e represchentants locals da vischnancas, partidas, raits e dunnas interessadas vegnan las mesiras proponidas discutadas e sviluppadas vinavant per las relaziuns al lieu.
Organisadas vegnan questas occurrenzas dal Post da stab per l'egualitad da las schanzas dal Grischun, il Center per management d'administraziun (CMA) ed in'organisaziun partenaria al lieu. Finanzialmain vegn la retscha d'occurrenzas sustegnida dal Departament da finanzas e vischnancas dal Grischun.
Ulteriuras infurmaziuns davart il tema dunnas en la politica ed en l'administraziun datti qua.
Promo Femina on Tour – Scuol, 12 da mars 2024
La proxima ediziun da Promo Femina vegn ad avair lieu ils 12 da mars 2024 a Scuol. Ulteriuras infurmaziuns suondan.
«La Bregaglia femminile» – Soglio, 26 da schaner 2023
Inizià las occurrenzas ha l'occurrenza da pilot «La Bregaglia femminile – donne e politica: quale prospettiva in Bregaglia?» ils 26 da schaner 2023 a Soglio. Partenaris al lieu èn stads il «Laboratorio vivente Bregaglia» (laboratori real Bregaglia) da la Scola auta spezialisada dal Grischun sco er la vischnanca da Bregaglia, che ha gì la funcziun d'ospitanta. L'occurrenza è vegnida realisada en moda bilingua en talian e tudestg.
A l'occurrenza han per l'ina Anna Giacometti, cussegliera naziunala ed anteriura presidenta communala da Bregaglia, e Nora Saratz, presidenta communala da Puntraschigna, dà ina invista da lur carriera e da lur experientschas politicas. Ellas èn vegnidas interrogadas d'Alberto Palaia, Post spezialisà per la plurilinguitad, e da Barbara Wülser, manadra dal Post da stab per l'egualitad da las schanzas. Per l'autra han las participantas ed ils participants gì l'occasiun da sa fatschentar pli detagliadamain cun las relaziuns e cun las pussaivladads da la Bregaglia e da discutar e da sondar quellas en in local avert. Simon Theus, vicemanader da l'Uffizi da vischnancas, ha cumplettà l'occurrenza cun in facit.
Ulteriuras infurmaziuns