L'egualitad da las schanzas è in tema che influenzescha tut ils secturs da la vita. Interpresas ed organisaziuns giogan en quest connex ina rolla centrala. Cun «egual 21 – Plan d'acziun per l'egualitad en l'administraziun chantunala» rinforza la Regenza in mund da lavur che promova l'egualitad, la cumpatibilitad sco er l'inclusiun.
Il chantun Grischun s'engascha dapi onns per l'egualitad da las schanzas, per l'egualitad da las schlattainas e cunter la discriminaziun pervia da la schlattaina. Da far avanzar l'egualitad, per cumbatter la mancanza da persunal qualifitgà e per posiziunar l'administraziun chantunala sco patruna attractiva, metta l'administraziun chantunala cun «egual 21 – Plan d'acziun per l'egualitad en l'administraziun chantunala» liantas finamiras per porscher a las collavuraturas ed als collavuraturs existents e futurs cundiziuns da lavur favuraivlas per la cumpatibilitad e per la promoziun da l'egualitad. El sa basa sin ina incumbensa da fracziun dal zercladur 2019. Il december 2020 ha la Regenza approvà l'elavuraziun d'in plan d'acziun cun focus sin l'administraziun chantunala.
Illustraziun 1: Porscher las medemas schanzas malgrà ils basegns differents, quai è ina finamira dad egual21.
Il plan d'acziun per l'egualitad cumpiglia quatter champs d'acziun cun otg finamiras liantas ed in plan da mesiras.
Illustraziun 2: Ils quatter champs d'acziun
Ils trais champs d'acziun tematics «structura d'organisaziun», «models da lavurs variads» sco er «recrutaziun e svilup da persunal» ha ina gruppa da lavur interdepartamentala sviluppà en in process participativ l'onn 2022. Il quart champ d'acziun «francaziun e structura» procura per la francaziun necessaria a pli lunga vista sin plaun organisatoric. El è vegnì sviluppà d'ina gruppa da project che sa cumpona da represchentantas dal post da stab per l'egualitad da las schanzas, da l'uffizi da persunal e da la Fachstelle UND.
Las finamiras dal plan d'acziun per l'egualitad valan per l'entira administraziun e vegnan integradas en la strategia da persunal elavurada el 2023. Uschia vegni garantì che l'egualitad, la cumpatibilitad, l'egualitad da las schanzas èn francadas strategicamain en l'administraziun chantunala. Il plan d'acziun dura dal 2023 fin il 2025.
Contact
Miriam Erni, manadra da project egual21, miriam.erni@stagl.gr.ch, +41 81 257 35 73