Il basegn da persunas spezialisadas è en il Grischun, sco actualmain dapertut, fitg grond. Gist las firmas da tecnologia investeschan bler en la recrutaziun. Las represchentanzas da talas interpresas èn conscientas dal fatg, ch'ellas occupan paucas dunnas e ch'ellas han fitg paucas persunas da cader femininas. Ellas avessan tuttavia la voluntad da midar quai. Savens las mancan dentant las enconuschientschas davart ils connexs da l'egualitad cun ina meglra cumpatibilitad da la professiun cun la famiglia ed il temp liber. Qua gida Diversity-gr.
Sco rait per e da las interpresas en il chantun Grischun promova Diversity-gr l'egualitad e la diversitad e sensibilisescha per ils connexs respectivs. La finamira da la rait è quella da porscher a las interpresas ina plattafurma per il barat d'experientschas, da proponer cun fatgs, cun buns exempels e cun impuls da reflexiun soluziuns pratitgablas e da francar l'avertadad per la diversitad en la cultura da la firma. In accent vegn dà a las professiuns ed a las branschas dad IT e da tecnologia, quai perquai ch'il basegn da persunas spezialisadas supplementaras è fitg grond e la quota da dunnas è fitg bassa qua.
Entaifer 4 onns, dal schaner 2024 fin il december 2027, vegn sviluppada ina rait d'interpresas che s'engaschan per l'egualitad e per la diversitad e che vulan rinforzar uschia lur posiziun. Per quest intent vegnan organisadas pliras occurrenzas publicas, online e serradas. Ultra da quai vegnan rimnadas, examinadas ed intermediadas purschidas e persunas spezialisadas, che accumpognan las interpresas en lur process per meglierar e per francar l'egualitad e la diversitad. Plinavant sa barattan ils purtaders cun auters chantuns sco er cun autras regiuns ed organisaziuns, per emprender in da l'auter e per barattar experientschas ed enconuschientschas specificas.
«Cun meglierar l'egualitad da las schanzas e l'access da tuttas duas schlattainas a las branschas e professiuns dad IT e da tecnologia sco er a las posiziuns da cader vegnan er meglieradas l'egualitad sco tala e la participaziun sociala. Da quai profita la schlattaina sutrepreschentada (en quest cas las dunnas), ma er la branscha sco tala (cun augmentar la purschida da persunas spezialisadas en la regiun) e l'economia publica (cun augmentar la participaziun da las lavurantas e dals lavurants)», uschia Susanna Mazzetta,
co-manadra dal project Diversity-gr.
|
Purtader
- Post da stab per l'egualitad da las schanzas per dunnas ed umens (co-direcziun dal project)
- Center d'innovaziun e da perscrutaziun CSEM (co-direcziun dal project)
- Women in Tech Switzerland
- Center da las IPM dal Grischun
- Scola auta spezialisada dal Grischun
- Academia Raetica
- Scola auta da pedagogia dal Grischun
Website Diversity-gr
Occurrenzas
Qua vegnan menziunadas tut las occurrenzas actualas.
Project preliminar 2022–2023
En in project preliminar èn vegnids rimnads tut ils basegns e tut las pussaivladads dals purtaders participads e da las interpresas en il Grischun. Quai è vegnì fatg en discurs, en enquistas ed a chaschun d'occurrenzas.
In'emprima occurrenza «Diversity in Leadership & Tech» ha gì lieu il november 2022. Ella ha dà respostas e purschì pussaivladads da barat en connex cun las dumondas, nua ch'il Grischun stat areguard la diversitad e l'inclusiun, areguard la cumpatibilitad da la professiun cun il temp liber e cun la famiglia sco er areguard l'egualitad tranter dunna ed um. L'occurrenza è sa drizzada cunzunt a quellas persunas, firmas ed instituziuns pertutgadas, ch'eran prontas da s'engaschar per midadas e d'emprender ina da l'autra.
La stad 2023 ha la rait Diversity-gr envidà las interpresas ad in emprim «discurs da lavur», per rimnar lur basegns e giavischs. Esther-Mirjam de Boer ha dà in impuls cun sias explicaziuns davart la recrutaziun ed il svilup.
Dapli infurmaziuns https://diversity-gr.ch
Illustraziun 1: Discurs da lavur dals 29 da zercladur 2023: participantas e participants discutan davart pussaivladads per meglierar la cumpatibilitad da la professiun cun auters secturs da la vita.