La Confederaziun sustegna stentas d'egualitad da la branscha da tecnica grischuna
L'Uffizi federal per l'egualitad tranter dunna ed um sustegna il project Diversity-gr ils proxims 4 onns cun 270 000 francs. Ulteriurs 220 000 francs vegnan contribuids dals purtaders dal project, tranter quels il Post da stab per l'egualitad da las schanzas, en furma d'atgnas prestaziuns. La finamira dal project èsi da meglierar las cundiziuns per l'egualitad e per l'inclusiun en branschas e professiuns dad IT e da tecnologia.
Il project Diversity-gr sustegna las interpresas da la branscha dad IT e da tecnologia per surmuntar ils obstachels structurals e culturals da l'egualitad tranter dunna ed um sco er la cumpatibilitad e per francar cumpetenzas d'agir correspundentas en interpresas. Per quest intent vegn stabilida ina rait da caders, da collavuraturas e collavuraturs sco da er persunas spezialisadas da resursas umanas, che vegnan infurmads e sensibilisads cun ina pagina d'internet, occurrenzas, lavuratoris e buns exempels davart ils temas diversity ed egualitad ed uschia qualifitgads da realisar mesiras concretas. Plinavant vegnan stabilids e tgirads la cooperaziun ed il barat cun projects cun finamiras sumegliantas en la Svizra tudestga e taliana.
Ina vasta basa
L'Uffizi federal per l'egualitad tranter dunna ed um conceda agids finanzials tenor la Lescha d'egualitad prioritarmain per projects che cumpiglian purschidas per patrunas e patruns, quai per sustegnair finanzialmain la participaziun equivalenta da dunnas e d'umens en professiuns ed en branschas cun mancanza da persunas spezialisadas. Il project Diversity-gr correspunda cumplainamain a quests criteris. Perquai ha l'Uffizi federal per l'egualitad tranter dunna ed um concedì per ina durada da 4 onns tut en tut maximalmain 270 000 francs, quai che correspunda a 55 pertschient dal preventiv total. Ils ulteriurs custs vegnan surpigliads dals purtaders en furma d'atgnas prestaziuns. Purtaders dal project èn il center d'innovaziun CSEM, il Post da stab per l'egualitad da las schanzas, l'Academia Raetica, la rait «Women in Tech Switzerland», la Scola auta spezialisada dal Grischun, il Center da las IPM dal Grischun e la Scola auta da pedagogia dal Grischun.
Co francar l'egualitad?
Al cumenzament ha lieu ils 12 da favrer 2024 da las 17.00 fin las 20.00 l'occurrenza publica «Diversity in Leadership & Tech: francar la diversitad» en l'Auditori da la Banca Chantunala Grischuna a Cuira. L'occurrenza tracta la dumonda, tge midadas structuralas, organisatoricas e strategicas ch'èn necessarias per francar en las interpresas ina cultura ed ina pratica vivida ch'è orientada a l'egualitad. Discutada vegn er la dumonda, tgi ch'è responsabel per francar e per monitorar ils process ch'èn relevants per l'egualitad en l'organisaziun, tge puncts da contact ch'i dat cun auters secturs e cun tge cumpetenzas ed autorisaziuns che las persunas responsablas èn equipadas. Cun l'occurrenza publica cuntinuescha Diversity-gr cun l'arranschament da success «Diversity in Leadership & Tech: francar la diversitad» dals 8 da november 2022.
Dapli infurmaziuns:
Diversity in Leadership and Tech | Diversity GR (diversity-gr.ch)
Diversity-gr – Projects