Il chancelier maina la Chanzlia chantunala sco post da stab, da coordinaziun e da colliaziun dal Cussegl grond, da la Regenza e da l'administraziun. La Chanzlia chantunala è activa en il sustegn da la direcziun ed en la furniziun da servetschs centrals per l'administraziun, ma er per las burgaisas e per ils burgais. Plinavant è il chancelier ensemen cun sias collavuraturas e ses collavuraturs responsabel per l'organisaziun e per la preparaziun da las sesidas da la Regenza, a las qualas el prenda part cun vusch consultativa. Il chancelier vegn elegì da la Regenza.