Navigaziun principala

Cuntegn da la pagina

Il center da servetschs dal chantun

La chanzlia chantunala sa chapescha sco instanza che fa in servetsch a l'administraziun publica ed a la publicitad. Ella è il post da stab general da la regenza e dal cussegl grond. La chanzlia chantunala permetta a la regenza ed al parlament d'ademplir lur incumbensas per la publicitad en moda cunvegnenta, cun cleras finamiras ed en moda transparenta. A las burgaisas ed als burgais garantescha e gida ella a realisar lur dretgs politics. Per garantir in servetsch optimal a la clientella metta la chanzlia chantunala a disposiziun a l'administraziun las prestaziuns centralas ch'èn necessarias per quai.

Tge vulain nus cuntanscher?

La chanzlia chantunala è in center da servetschs professiunal. Ella sa metta las suandantas finamiras:

Regenza e parlament

La chanzlia chantunala …

  • sustegna la regenza ed il cussegl grond activamain a planisar, a realisar ed a controllar lur lavurs;
  • coordinescha la lavur da la regenza e dal cussegl grond;
  • sustegna - ensemen cun il secretariat dal cussegl grond - en moda efficazia il presidi dal cussegl grond, ils presidis da las cumissiuns sco er las commembras ed ils commembers dal cussegl grond ad exequir lur lavur parlamentara;
  • procura ch'ils plans politics da la regenza vegnian tractads en il cussegl grond cun in'acceptanza uschè gronda sco pussaivel;
  • renda transparenta e chapaivla la lavur da la regenza per il cussegl grond, per la publicitad e per las medias cun publitgar ils instruments da planisaziun ils pli impurtants, sco per exempel il program da la regenza ed il program annual;
  • sondescha las schanzas e las ristgas da las tendenzas sin il champ da l'activitad statala ed administrativa ed è il post da preavertiment da la regenza;
  • realisescha - per incarica da la regenza - projects interdepartamentals;
  • è il post da contact per ils servetschs centrals da la confederaziun e dals chantuns sco er da las regiuns estras vischinas e procura che las relaziuns externas vegnian tgiradas ed amplifitgadas;
  • s'occupa dals giasts da la regenza en il rom da las usanzas uffizialas.

Administraziun

La chanzlia chantunala …

  • translatescha ils texts uffizials dal chantun en las trais linguas chantunalas uffizialas, e quai en ina qualitad irreproschabla ed entaifer il termin fixà;
  • producescha ils stampats da l'administraziun en ina moda economica ed ecologica che resguarda ils termins fixads e proveda l'administraziun chantunala cun material e cun apparats da biro funcziunals;
  • procura ch'ils stampats e che las scrittiras da l'administraziun vegnian concepids en ina moda unitara;
  • garantescha in servetsch da posta per ils posts da servetsch che resguarda ils termins fixads e ch'è fidà.

Publicitad e populaziun

La chanzlia chantunala …

  • è il post da consultaziun per la vasta publicitad;
  • communitgescha svelt e cumplettamain las decisiuns da la regenza a la publicitad ed a las medias;
  • cuntanscha - tras il e-government sco er tras portals d'internet unitars ed attractivs - per las burgaisas e per ils burgais sco er per las interpresas in access electronic direct e liber a l'administraziun;
  • tgira la reputaziun dal chantun Grischun envers la generalitad cun ina tenuta che resguarda ils basegns da la clientella e ch'è a medem temp professiunala;
  • garantescha - en il rom da sia incumbensa d'infurmaziun - l'applicaziun consequenta e professiunala da las trais linguas chantunalas;
  • ha quità che las votaziuns e che las elecziuns vegnian realisadas correctamain e punctualmain;
  • è responsabla per publicaziuns sco il fegl uffizial dal chantun, il rapport annual, l'annuari dal chantun Grischun u il carnet da votar;
  • tgira ed actualisescha la collecziun dal dretg chantunal.

 

Co faschain nus quai?

Lavur da team

La chanzlia chantunala ha in'organisaziun concisa, cunvegnenta ed effizienta. Las collavuraturas ed ils collavuraturs da la chanzlia chantunala sa chapeschan sco persunas che fan in servetsch a favur da la politica, da l'administraziun e da la populaziun, e quai en in center da servetschs modern. Cun lur tenuta ch'è orientada a la clientella, a la soluziun ed al team acceptan ellas ed els la sfida e vesan novs svilups sco schanzas. Las collavuraturas ed ils collavuraturs surpiglian communablamain la responsabladad e lavuran en ina moda innovativa, averta e communicativa. Ellas ed els tgiran ils secturs da lavur en moda independenta, cun ina ferma voluntad da prestar insatge e cun in grond engaschi e s'orienteschan per quest intent tenor las finamiras dal model directiv.

Innovaziuns

La chanzlia chantunala s'infurmescha activamain davart las novas tendenzas e davart ils novs svilups en il sectur da l'organisaziun statala ed administrativa. Innovaziuns e novas tecnologias raschunaivlas che permettan d'organisar ils andaments da lavur en moda cunvegnenta ed effizienta vegnan surpigliadas.

Autonomia

La chanzlia chantunala è autonoma. Per ademplir las funcziuns dals posts da stab furnescha ella sezza prestaziuns impurtantas, particularmain il sustegn da la direcziun per la regenza, la tgira dal cussegl grond, ils servetschs centrals dal dretg, da las translaziuns e da las medias sco er las incumbensas da secretariat. Quests servetschs vegnan garantids permanentamain.

Neutralitad

La chanzlia chantunala ha ina funcziun d'integraziun. La regenza, il parlament, l'administraziun chantunala e la publicitad èn ils incumbensaders che vegnan reunids en il rom d'incaricas e da lavurs da project.

Cumpetenzas

Il potenzial d'experientscha existent da las collavuraturas e dals collavuraturs vegn impundì en moda optimala. Las collavuraturas ed ils collavuraturs èn averts per novas dumondas e per novas pretensiuns ed amplifitgeschan lur cumpetenza professiunala tras ina furmaziun supplementara permanenta. Ina gronda part da las collavuraturas e dals collavuraturs da tut ils secturs da lavur garantescha per ina cumpetenza professiunala e sociala.

Senn da responsabladad

Sco instanza responsabla maina la chanzlia chantunala projects interdepartamentals per incarica da la regenza e dal parlament e surpiglia cumplettamain la responsabladad per lur resultats, cunzunt er per projects d'ina gronda urgenza politica.

Cultura da lavur professiunala

Las collavuraturas ed ils collavuraturs han ina cultura da discussiun averta e constructiva. Ellas ed els promovan ina cuntraversa critica cun la lavur e respectan posiziuns differentas.

Tgira da la reputaziun

Sco post da stab dal servetsch public communitgescha la chanzlia chantunala permanentamain e savens a medem temp entaifer l'administraziun chantunala dentant er cun la vasta publicitad. Mintga contact è in contact cun la clientella. Las collavuraturas ed ils collavuraturs profitan da mintga contact per sa recumandar sco partenaria u sco partenari unic ed indispensabel.