Il chantun Grischun tgira sias relaziuns transcunfinalas en furma da numerus contacts bilaterals e multilaterals. En il rom da la «pitschna politica exteriura» (guardar basas giuridicas) tgira il Grischun er atgnas relaziuns cun regiuns vischinas da l'exteriur e fa part da divers gremis internaziunals.
Cuminanza da lavur da las regiuns alpinas (ARGE ALP)
La Cuminanza da lavur da las regiuns alpinas (ARGE ALP) è vegnida fundada ils 12 d'october 1972 en il Tirol cun la finamira da schliar sco buns vischins problems communabels. En tut l'Europa è ella stada l'emprima fusiun cumparegliabla d'unitads statalas ed autonomas sin il plaun sut ils stadis naziunals e federals.
Ils stadis commembers da la ARGE ALP èn il stadi liber Baviera, ils stadis federativs Tirol, Salzburg e Vorarlberg, las provinzas autonomas Bulsaun-Tirol dal Sid e Trento sco er la regiun Lumbardia ed ils chantuns Grischun, Son Gagl e Tessin.
L'organ suprem è la Conferenza da las scheffas e dals schefs da las regenzas, che sa raduna ina giada l'onn. Il presidi mida annualmain. Responsabla per preparar la Conferenza da las scheffas e dals schefs da las regenzas e per realisar lur conclus è la Cumissiun da direcziun che sa raduna trais giadas l'onn. Per realisar il program da lavur vegnan nominadas gruppas da project cun spezialistas e spezialists dals singuls pajais commembers. La sedia dal secretariat sa chatta a Puntina.
Ulteriuras infurmaziuns: www.argealp.org
Project grischun: www.argealp-sport.org
Interreg
Interreg è in program regiunal da l'Uniun europeica (UE) che vul promover la collavuraziun transcunfinala, al qual er stadis d'ordaifer la UE sco la Svizra ed il Principadi da Liechtenstein pon sa participar. Il program d'Interreg vegn sviluppà ed administrà da las regiuns e dals chantuns sezs. Er la schelta dals projects vegn fatga da las represchentanzas chantunalas resp. regiunalas.
Actualmain sa participescha il chantun Grischun a tschintg programs d'Interreg da la perioda 2021–2027 sin ils suandants champs:
Cooperaziuns transcunfinalas (programs d'Interreg A)
Cooperaziuns transnaziunalas (programs d'Interreg B)
Barat interregiunal (Interreg Europe)