La regenza grischuna ha lantschà la consultaziun per la revisiun totala da la lescha per promover il svilup economic en il chantun Grischun.

La finamira suprema per promover il svilup economic è quella da rinforzar permanentamain la capacitad da concurrenza e d'innovaziun dal Grischun sco spazi da viver e da lavurar. Per cuntanscher questa finamira ha la regenza – en renconuschientscha da las novas sfidas e per ademplir ina incarica dal cussegl grond – deliberà per la consultaziun il sboz d'ina revisiun totala da la lescha per promover il svilup economic en il chantun Grischun. Il sboz cuntegna intginas novaziuns, cun las qualas ins vul tegnair quint da la concurrenza pli intensiva tranter ils lieus e da las pretensiuns augmentadas envers ina politica cumplessiva per il svilup economic dal chantun. 

Il chantun procura ch'i stettian a disposiziun surfatschas destinadas a l'economia
Da nov duai il chantun survegnir la pussaivladad da s'acquistar bains immobigliars en lieus d'ina impurtanza strategica. En la concurrenza tranter ils lieus per obtegnair interpresas interessantas sco er per sviluppar l'economia indigena pon surfatschas che stattan spert a disposiziun esser in avantatg decisiv. L'acquist da proprietad funsila tras il chantun – en il senn d'ina politica funsila precauta, activa e da lunga durada – duai permetter d'engrondir interpresas existentas e da domiciliar interpresas novas e novs furniturs da prestaziuns turisticas. 

In post da contact central e proceduras coordinadas
Interpresas existentas e novas vulan pudair sa drizzar ad in post da contact central en il chantun che s'occupa da lur giavischs, che las sustegna cun cussegls e che represchenta la tenuta dal chantun en general. Da nov metta il chantun a disposiziun in unic post da contact che fa la coordinaziun tranter ils differents purtaders chantunals da decisiuns e che represchenta quels vers anor. Projects extraordinaris vegnan coordinads sin plaun interdepartamental. 

Per dapli qualitad en il turissem
En il futur duai la promoziun da projects d'alloschament survegnir dapli impurtanza. Projects d'hotels duain, er cumplementarmain a la finanziaziun tras la societad svizra da credit d'hotel (SCH), pudair vegnir sustegnids cun tut las mesiras da promoziun. L'accent sto vegnir mess sin l'augment da la qualitad (p.ex. midar ad ina classa da stailas pli auta) e sin il rinforz da las destinaziuns turisticas. Projects d'infrastructura ston vegnir concepids sin plaun regiunal ed esser necessaris per l'entira economia sco er gidar a sviluppar il turissem regiunal. Ultra da quai vegn mantegnida er vinavant la promoziun da las infrastructuras e da las occurrenzas turisticas. 

La promoziun da manaschis singuls resta impurtanta
Per interpresas da producziun e per servetschs favuraivels a la producziun è decisiva – en connex cun in'evaluaziun dals lieus – la pussaivladad d'ina promoziun da manaschis singuls. Quest instrument da promoziun vegn applitgà en differents chantuns, dentant er sin plaun internaziunal. Per ch'il Grischun haja vinavant schanzas resp. las medemas schanzas en la concurrenza per interpresas, dat il chantun er en il futur la prioritad a la promoziun da manaschis singuls. 

Garanzias supplementaras èn pussaivlas
Oz han interpresas pitschnas e mesaunas (IPM) la pussaivladad da dumandar ina garanzia tar l'associaziun da garanzia da la Svizra da l'ost (OBTG). La summa maximala da garanzia da la OBTG importa 500 000 francs e na tanscha dentant betg en singuls cas. Da nov duain las IPM vegnir sustegnidas cun garanzias supplementaras chantunalas, sco ch'i vegn fatg er en auters chantuns. Ina garanzia supplementara importa maximalmain 50 pertschient ubain 250 000 francs. 

La capacitad d'innovaziun ed il transfer da savida vegnan meglierads
Projects innovativs per perscrutar e per sviluppar products, process e servetschs sco er instituziuns da perscrutaziun duain vegnir sustegnids er vinavant. Da nov pon vegnir promovids la constituziun ed il manaschi da raits da cumpetenza sco er projects en il sectur dal transfer da savida e da tecnologia. Per meglierar la collavuraziun tranter las scolas autas e las interpresas pon ultra da quai vegnir pajadas contribuziuns en furma da schecs d'innovaziun (en il cas singul maximalmain 10 000 francs). 

Vischnancas e regiuns fermas
Ultra dal chantun creeschan er las vischnancas bunas cundiziuns da basa per in'economia productiva e duraivla e promovan activamain l'economia. Il chantun po promover projects da vischnancas, en spezial tals che gidan a rinforzar ils centers regiunals. Ultra da quai sustegna il chantun il svilup regiunal, en spezial il management regiunal cun maximalmain sis sviluppadras regiunalas e svilppaders regiunals situads en las regiuns. 

Il parlament decida davart ils meds finanzials
La realisaziun da las mesiras da promoziun dependa essenzialmain da las resursas finanzialas e persunalas che stattan a disposiziun. Ultra d'intensivar ils instruments vertents sin ils champs alloschament ed innovaziun prevesa il sboz da la lescha novas mesiras sco garanzias supplementaras u la promoziun da projects communals. Il cussegl grond vegn a fixar annualmain il preventiv respectiv. 
 

Remartga ed agiunta:
La consultaziun dura fin ils 25 da schaner 2013. Ils documents da consultaziun pon vegnir consultads sut www.gr.ch (publicaziuns / consultaziuns). 
 

Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01


Gremi: regenza
Funtauna: rg chanzlia chantunala dal Grischun