Cun la nova lescha da promoziun dal sport duai vegnir stgaffida la basa per la promoziun futura dal sport en il Grischun. Il medem mument duai vegnir realisada la nova legislaziun federala.

En vista a l'impurtanza dal sport e dal moviment en spezial per la sanadad da la populaziun èsi adequat da reglar la promoziun dal sport en ina lescha chantunala separada. Cun concepir la lescha vegni resguardà ch'ils basegns da la promoziun dal sport pon sa midar relativamain svelt. Cun relaschar l'ordinaziun ch'è actualmain en vigur per exempel n'era l'aissa anc betg sviluppada e l'ir cun il velo da muntogna anc nagina disciplina olimpica. Uschenavant che quai è pussaivel vegn perquai stgaffida ina lescha adattabla, ma tuttina concisa. En la lescha vegn fixada la basa centrala da la promoziun dal sport dal Grischun. Nua che quai para d'esser raschunaivel, vegnan ils detagls circumscrits en in'ordinaziun. Questa repartiziun garantescha la flexibilitad necessaria che porscha plazza er a svilups futurs.
En quai che concerna il cuntegn duai la lescha da promoziun dal sport ir pli lunsch che la legislaziun per promover il sport da la confederaziun. Uschenavant che quai è pussaivel vegn però surpiglià il vocabulari da la confederaziun. Plinavant vegni fatg stim che tut las incumbensas parlamentaras pon vegnir realisadas cun il sboz qua avant maun. Il sboz da la lescha prevesa che la regenza relaschia in concept cumplessiv per promover il sport.
En il sectur da l'instrucziun da sport obligatorica en scola sco er da la scolaziun e da la furmaziun supplementara da las persunas d'instrucziun che instrueschan sport duai vegnir mantegnida la regulaziun cumprovada da la legislaziun da scola. 


Remartga:
La consultaziun dura fin ils 30 da schaner 2014. Ils documents respectivs pon vegnir consultads en l'internet sut www.gr.ch / Consultaziuns currentas. 


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: martin.jaeger@ekud.gr.ch  
- Andrea Stadler, secretaria dal departament d'educaziun, cultura e protecziun da l'ambient, tel. 081 257 27 11, e-mail: andrea.stadler@ekud.gr.ch


Gremi: regenza
Funtauna: rg chanzlia chantunala dal Grischun