Navigation

Inhaltsbereich

  • Erste Mitteilung
  • Neuen Beitrag einfügen
La regenza ha prendì posiziun davart midadas che la confederaziun ha planisà en il sectur da la sutlocaziun. Plinavant ha ella prendì enconuschientscha d'in rapport davart la mobilitad en il Grischun ed ha concedì contribuziuns per l'inscenaziun dal viaduct da la Landwasser sco er per il nov center da trenament da la generaziun giuvna dal HCD.

Nova regulaziun concernent la sutlocaziun chaschuna malsegirezzas giuridicas
La regenza ha prendì posiziun davart il project da consultaziun dal departament federal d'economia, furmaziun e retschertga (DEFR) concernent la midada da l'ordinaziun davart la locaziun e la fittanza da locals d'abitar e da fatschenta (OLFL). La regenza refusa la revisiun proponida.
La digitalisaziun cuntinuanta ha laschà nascher ils ultims onns plattafurmas d'alloschament che ageschan sin nivel global, sco per exempel Airbnb. Quellas na pussibiliteschan betg mo in access nuncumplitgà a numerusas purschidas d'alloschis privats, mabain procuran a medem temp ch'ils contacts vegnian stabilids e che las reservaziuns vegnian liquidadas. Quest svilup permetta tant a las partidas da locaziun sco er a las proprietarias ed als proprietaris da surlaschar lur surfatschas d'abitar e da fatschenta repetidamain durant in curt temp a giasts da tut il mund. Per resguardar meglier quest svilup vul la confederaziun far midadas correspundentas en la OLFL.
Cun sia tenuta refusanta na vul la regenza grischuna betg s'opponer als novs svilups ed a las novas furmas da locaziun. Ella è dentant da l'avis che la regulaziun davart la sutlocaziun, ch'è gia francada en la lescha, bastia per tegnair quint da las relaziuns ch'existan ozendi e ch'èn previsiblas il proxim avegnir en il sectur da la sutlocaziun.
Igl è ina gronda finamira da la regenza d'evitar regulaziuns che n'èn betg urgentamain necessarias, che na fan nagin effect u mo in effect insuffizient u che chaschunan malsegirezzas giuridicas.

Consultaziun dal departament federal d'economia, furmaziun e retschertga

Las Grischunas ed ils Grischuns fan mintga di 44 kilometers
La regenza ha prendì enconuschientscha dal rapport "Mobilitad en il Grischun – resultats dal microcensiment mobilitad e traffic 2015" da l'avrigl 2018. Il microcensiment mobilitad e traffic (MCMT) è ina retschertga statistica da la Confederaziun che ha lieu mintga 5 onns e che infurmescha davart il cumportament da la populaziun svizra en il traffic.
Ils resultats dal microcensiment 2015 mussan tranter auter che las Grischunas ed ils Grischuns fan en media stgars 44 kilometers per di (senza viadis a l'exteriur). Per quest intent èn ellas ed els bundant 100 minutas en viadi. La distanza quotidiana sco er il temp quotidian en viadi èn uschia en il chantun Grischun – sumegliantamain sco en ils auters chantuns da muntogna – cleramain sur la media naziunala da var 37 kilometers respectivamain 90 minutas. La part la pli gronda, numnadamain 48 pertschient dals trajects fatgs, pertutgan il traffic da temp liber. Il traffic pendular (lavur e scolaziun) percunter è cun 24 pertschient bler pli pitschen.
Cun ina quota da 69 pertschient – mesirà vi da la distanza fatga – è il traffic individual motorisà lunschor il med da transport il pli impurtant. 83 pertschient da las chasadas grischunas possedan almain in auto. Entant che 24 pertschient dals trajects vegnan fatgs cun il traffic public, importa la quota dal traffic betg motorisà 7 pertschient. Cumpareglià cun il microcensiment 2010 po uschia vegnir constatà in lev spustament da 2 pertschient dal traffic betg motorisà vi al traffic public.

Rapport "Mobilitad en il Grischun – resultats dal microcensiment mobilitad e traffic 2015"

-
©Transreno / Mathias Kunfermann

Sustegn finanzial per la meglieraziun generala da Mustér
Per las lavurs da la meglieraziun generala da Mustér vegn concedida ina contribuziun chantunala da maximalmain 9,7 milliuns francs. Questa contribuziun dal chantun premetta ina contribuziun finanziala da la confederaziun, che sustegna il project cun passa 12 milliuns francs.
Il mars 2012 ha la vischnanca da Mustér concludì da realisar ina meglieraziun generala. Il territori dal project cumpiglia var 829 hectaras. Ultra da l'arrundaziun dal terren vegnan construids da nov u renovads var 39 kilometers vias champestras. La finamira è quella da simplifitgar ils andaments per l'agricultura.

-
©Vischnanca da Mustér

Contribuziun NPR per inscenar il viaduct da la Landwasser
En il rom da la nova politica regiunala da la confederaziun (NPR) ha la regenza concedì a la Viafier retica ina contribuziun da totalmain 900 000 francs per il project "Viaduct da la Landwasser – simbol dal Grischun". Las contribuziuns NPR vegnan surpigliadas mintgamai per la mesadad da la confederaziun e dal chantun.
Il viaduct da la Landwasser duai vegnir inscenà sco tur da signal da la Viafier retica e dal turissem grischun. Ultra da la viafier duai il spazi d'attracziun vegnir cumplettà ensemen cun il Parc Ela cun ils elements guaud, agricultura, aua e selvaschina/chatscha. Il territori enturn il viaduct da la Landwasser duai daventar uschia ina destinaziun d'excursiun nova ed impurtanta per il turissem da stad en tut il Grischun.
En il rom dal project – purtà da la Viafier retica sco er da las vischnancas da staziunament e da la regiun – vegn sviluppà in model da fatschenta per l'entir spazi d'attracziun. En quest connex duain er vegnir scleridas las rollas da la Viafier retica, da las vischnancas, da la regiun, da las organisaziuns turisticas, dal Parc Ela e da Grischun vacanzas. Fin la primavaira 2020 duai vegnir preschentà in masterplan sco basa per ina realisaziun definitiva dal project "Viaduct da la Landwasser – simbol dal Grischun".

-
©Viafier retica

La Obere Au a Cuira po vegnir sviluppada vinavant
La regenza ha approvà la revisiun parziala da la planisaziun locala che la citad da Cuira aveva concludì ils 4 da mars 2018. Tras questa approvaziun pon ils stabiliments da sport sin la Obere Au vegnir renovads e cumplettads ils proxims onns ed il lieu d'occurrenzas po vegnir sviluppà vinavant.
Ils stabiliments da sport da la Obere Au na satisfan betg pli als basegns da las utilisadras e dals utilisaders ed èn per part antiquads areguard la construcziun sco er areguard il manaschi. Per ch'i possia vegnir reagì en etappas sin la mancanza da plazzas da sport da pastget, è vegnì elavurà in masterplan. Quest masterplan divida il territori concepziunalmain en singuls secturs. Per ch'il sistem da moduls possia vegnir realisà, ston vegnir fatgas adattaziuns pli pitschnas en la planisaziun locala. Tras la planisaziun approvada vegnan adattads ils instruments da l'urden fundamental tant enavant, ch'els correspundan al masterplan.

-
©Uffizi federal da topografia

Contribuziuns da promoziun per il nov center da trenament da la generaziun giuvna dal HCD

La regenza ha concedì contribuziuns or da la finanziaziun speziala "sport" per construir il nov center da trenament sper il glatsch ("off ice") en la halla da trenament dal club da hockey da Tavau (HCD) per promover la generaziun giuvna da hockey sin glatsch. Per ils secturs da promoziun "edifizis da sport" e "material da sport" ha la regenza concedì maximalmain 89 650 francs respectivamain 21 110 francs.
La halla da trenament vegn concepida uschia, ch'ins po trenar là tant sin il glatsch sco er sper il glatsch. Ultra da la plazza da glatsch èn previsas duas gallarias da mintgamai 400 meters quadrat sco center da trenament "off ice". Las duas gallarias vegnan a star a disposiziun exclusivamain per ils trenaments da la generaziun giuvna dal HCD. Ils novs urdains installads u cumprads correspundan al standard actual da la promoziun da la generaziun giuvna.

-
©HCD/Fanzun

L'ordinaziun tar la lescha da scola e las tavlas da lecziuns vegnan actualisadas
La regenza ha approvà la revisiun parziala da l'ordinaziun tar la lescha da scola dals 25 da settember 2012. Plinavant ha ella approvà las explicaziuns actualisadas tar las tavlas da lecziuns da la scola populara dal Grischun a partir dal 2018/19 e mess en vigur las tavlas da lecziuns actualisadas per il 1. d'avust 2018.
Ils 15 da mars 2016 aveva la regenza concludì d'introducir il Plan d'instrucziun 21 per l'onn da scola 2018/19 (scolina, stgalim primar ed 1./2. classa dal stgalim secundar I) respectivamain per l'onn da scola 2019/20 (3. classa dal stgalim secundar I) inclusivamain las tavlas da lecziuns. Pervia da l'introducziun dal nov plan d'instrucziun han stuì vegnir adattads singuls artitgels da l'ordinaziun tar la lescha da scola. A medem temp èn vegnidas actualisadas las explicaziuns tar las tavlas da lecziuns sco er concretisadas las regulaziuns tar la furmaziun supplementara intensiva da las persunas d'instrucziun.


Gremi: regenza
Funtauna: rg chanzlia chantunala dal Grischun
Neuer Artikel