En Svizra vegnan determinadas las coordinatas dapi l'onn 1903 sin basa dal rom da referenza MN03. Quest rom da referenza na correspunda betg pli a las pussaivladads tecnicas ed a las proceduras da mesiraziun d'ozendi sco er betg a las pretensiuns da qualitad e d'exactadad actualas. En l'infrastructura da l'administraziun chantunala èn las geodatas disponiblas perquai ussa mo pli cun il nov rom da referenza MN95.

Tenor l'ordinaziun da geoinfurmaziun han ils chantuns l'incarica da remplazzar las coordinatas da la MN03 fin la fin da l'onn 2020 tras las novas coordinatas MN95. En sia sesida dals 7 d'avust 2018 ha la regenza fixà il termin dals 3 da favrer 2019 per midar il rom da referenza da tut las geodatas da basa tenor il dretg chantunal e federal, ch'èn en la cumpetenza dal chantun, da las regiuns u da las vischnancas.

Ils posts ch'èn cumpetents per las geodatas da basa han midà il rom da referenza en moda coordinada sut la direcziun da l'uffizi d'agricultura e da geoinfurmaziun. Las geodatas existentas èn vegnidas transfurmadas en il nov rom da referenza MN95 cun agid d'ina unitad da datas naziunala da transfurmaziun. Vi da las autezzas n'èn vegnidas fatgas naginas midadas.

A partir d'immediat vegnan las geodatas da basa messas a disposiziun ed actualisadas mo pli cun il rom da referenza MN95. Ulteriuras infurmaziuns davart la midada dal rom da referenza pon ins leger en la communicaziun a las medias dals 13 da settember 2018.


Infurmaziuns:
Donat Rischatsch, manader dal center da cumpetenza dal SIG, uffizi d'agricultura e da geoinfurmaziun, tel. 081 257 24 70, e-mail Donat.Rischatsch@alg.gr.ch


Gremi: uffizi d'agricultura e da geoinfurmaziun
Funtauna: rg uffizi d'agricultura e da geoinfurmaziun