Navigation

Inhaltsbereich

  • Erste Mitteilung
  • Neuen Beitrag einfügen

Pervia da la situaziun actuala da corona na po la surdada dal Premi grischun da cultura 2020 betg vegnir realisada en il rom usità. Empè d'ina gronda occurrenza publica dastgan las titularas ed ils titulars dals premis festivar quest onn mo en in pitschen ravugl. Amis, parents e la populaziun interessada pon però assister a la surdada dals premis a Malans grazia ad ina transmissiun directa via internet.

Mintga onn vegn celebrada ina festa publica a chaschun da la surdada dal Premi grischun da cultura sco er dals premis da renconuschientscha e da promoziun, dapi l'onn 2016 mintgamai en il lieu da domicil u en la vischnanca d'origin da la titulara u dal titular dal Premi grischun da cultura. Quest onn vegnan ils premis surdads a Malans, il lieu da domicil dal fotograf engiadinais Guido Baselgia.

En directa dal Eschergut a Malans
La situaziun da corona ch'è anc adina precara e las mesiras respectivas per impedir infecziuns na permettan betg d'organisar ina occurrenza cun numerusa participaziun. Perquai vegnan las festivitads celebradas mo en in pitschen ravugl. Ultra da las titularas e dals titulars dals premis vegnan ad esser preschents il cusseglier guvernativ dr. Jon Domenic Parolini, la manadra da l'Uffizi da cultura Barbara Gabrielli, las collavuraturas ed ils collavuraturs da la Promoziun da la cultura, il president da la Cumissiun chantunala da cultura Köbi Gantenbein sco er las commembras ed ils commembers da la cumissiun. Medemamain preschents sco giasts envidads èn il president dal Cussegl grond Martin Wieland, la presidenta communala Susanne Krättli-Lori ed il laudatur dr. Beat Stutzer. La publicitad ha la pussaivladad da prender part a l'occurrenza grazia a la transmissiun directa via internet.

A las 17.15 cumenza la transmissiun directa sin il chanal da Youtube dal chantun Grischun.


Infurmaziuns:
Andrea Conrad, Promoziun da la cultura dal Grischun, Uffizi da cultura, tel. +41 81 257 48 07, e-mail Andrea.Conrad@afk.gr.ch


Gremi: Uffizi da cultura
Funtauna: rg Uffizi da cultura

Neuer Artikel