Navigaziun principala

Cuntegn da la pagina

Il chantun examinescha la purschida per persunas pertutgadas da dependenza

  • Erste Mitteilung
  • Neuen Beitrag einfügen

Il chantun Grischun dispona d'ina vasta purschida d'agid per persunas dependentas. Quai è il resultat d'in rapport che Infodrog, il Center naziunal da coordinaziun per dumondas da dependenza, ha elavurà per incumbensa da la Regenza. En il rapport èn dentant er vegnidas constatadas purschidas mancantas. Perquai examinescha la Regenza la purschida per persunas pertutgadas da dependenza en il chantun.

Per incumbensa da la Regenza ha Infodrog retschertgà la situaziun ed il basegn en il sectur da l'agid per persunas dependentas en il chantun Grischun. Qua tras ha la Regenza ademplì ina incumbensa dal Cussegl grond che pretendeva in rapport davart la situaziun actuala e davart l'eventual basegn d'agir areguard la purschida per persunas pertutgadas da dependenza.

Vasta purschida d'agid per persunas dependentas en il Grischun
Il chantun Grischun ha ina vasta rait regiunala da purschidas d'agid per persunas dependentas. Questa rait è adattada als basegns locals e cumpiglia totalmain 52 differentas purschidas. Las purschidas da differentas instituziuns publicas e privatas stattan a disposiziun en ils suandants secturs: cussegliaziun, terapia, diminuziun dal donn, abitar, agid a sasez sco er purschidas d'agid per persunas dependentas en l'execuziun da chastis e da mesiras. Nagina purschida n'exista percunter en la terapia sociala staziunara. Mancanzas èn vegnidas constatadas er en ils secturs da prestaziun da la diminuziun dal donn, sco "drug checking", local per consumar drogas e lavur sociala extra muros.

Il rapport formulescha set recumandaziuns d'agir per il chantun Grischun en vista a sia purschida per persunas pertutgadas da dependenza. Sin basa da las recumandaziuns dal rapport examinescha il chantun ussa la purschida per persunas pertutgadas da dependenza, tranter auter er la pussaivladad da stgaffir in post da contact e da consultaziun cun in local per consumar drogas.

Pretensiuns envers in post da contact e da consultaziun cun in local per consumar drogas
En il rapport mussa Infodrog plinavant las pretensiuns ed ils facturs da success areguard in local per consumar drogas. In punct decisiv è ch'i existian ordavant aspectativas realisticas areguard il niz ed areguard ils cunfins d'in local per consumar drogas. En il rapport vegni perquai er menziunà ch'in local per consumar drogas na vegnia betg a laschar svanir il consum en il spazi public u a far sparir la scena visibla en la publicitad.

Sco premissas per in local per consumar drogas numna il rapport in lieu central ed il fatg ch'i vegnia tolerà in commerzi minimal cun substanzas illegalas tranter las consumentas ed ils consuments. Per impedir ch'i resultia in effect d'attracziun sin consumentas e consuments d'auters chantuns u d'autras regiuns, stoppian vegnir elavurads criteris d'access u models interchantunals da cooperaziun. Necessaria saja ultra da quai la coordinaziun cun purschidas existentas (p.ex. cuschina per persunas senza tetg, post da contact e da consultaziun da l'Uniun per l'agid da survivenza dal Grischun).

Ils custs da gestiun annuals d'in local per consumar drogas vegnan budgetads en il rapport cun 400 000 fin 600 000 francs. Ils custs d'investiziun unics per in tal local vegnan stimads a 60 000 fin 90 000 francs. En vista a quests custs examinescha il chantun er alternativas che avessan in effect sumegliant ad in local per consumar drogas, per exempel l'extensiun da la purschida da l'abitar assistì cun la pussaivladad da consumar drogas u l'installaziun d'ina purschida da la lavur sociala extra muros (lavur sin via).

Il Cussegl grond decida davart la finanziaziun da la purschida
Il Departament d'economia publica e fatgs socials vegn a suttametter a la Regenza avant la stad il resultat da l'examinaziun da la purschida ed a far propostas areguard la purschida per persunas pertutgadas da dependenza. Uschia èsi garantì ch'il Cussegl grond po debattar e decider en la sessiun da december 2021 davart la deliberaziun dals meds finanzials per purschidas d'agid per persunas dependentas en il rom da la tractativa davart il preventiv chantunal 2022.


Agiunta: 
Rapport final "Purschida per persunas pertutgadas da dependenza en il chantun Grischun"


Infurmaziuns: 
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel per telefon tranter las 13.30 e las 14.30), e‑mail Marcus.Caduff@dvs.gr.ch


Gremi: Departament d'economia publica e fatgs socials
Funtauna: rg Chanzlia chantunala dal Grischun


Neuer Artikel