Navigation

Inhaltsbereich

  • Erste Mitteilung
  • Neuen Beitrag einfügen

Las pussaivladads da sa laschar vaccinar en il chantun vegnan extendidas. Ultra dals nov centers da vaccinaziun regiunals, da las praticas da las medias e dals medis da chasa e dals posts da vaccinaziun «pop up» ch'èn disponibels mo durant in tschert temp, porschan da nov er apotecas vaccinaziuns cunter il coronavirus. Ultra da quai vegnan purschids emprims dis da vaccinaziun per giuvenils per als pussibilitar l'access a la vaccinaziun.

En ils nov centers da vaccinaziun regiunals, en las praticas da las medias e dals medis da chasa ed en ils posts da vaccinaziun «pop up» ch'èn disponibels mo durant in tschert temp èn fin ussa vegnidas fatgas 132 000 vaccinaziuns cunter il coronavirus. Ussa vegnan las pussaivladads da sa laschar vaccinar amplifitgadas cun vaccinaziuns cunter il coronavirus en apotecas e cun dis da vaccinaziun per giuvenils tranter 16 e 17 onns.

Dis da vaccinaziun per giuvenils tranter 16 e 17 onns
Fin ussa èn s'annunziads per ina vaccinaziun cunter il coronavirus var 500 giuvenils en la vegliadetgna da 16 e 17 onns. Actualmain pon els sa laschar vaccinar mo en la Halla da la citad da Cuira. Mo là vegn applitgà il vaccin da Pfizer/Biontech ch'è admess gia per persunas a partir da 16 onns. Pervia da la conservaziun cumplexa vegnan ussa planisads en las regiuns dis da vaccinaziun per giuvenils da la vegliadetgna da 16 e 17 onns:

Giuvenils da la vegliadetgna da 16 e 17 onns che vegnan ad esser s'annunziads fin ils 13 da zercladur 2021, a las 20.00, sur la plattafurma da vaccinaziun, vegnan contactads. Annunzias èn vinavant pussaivlas sur la pagina d'internet www.gr.ch/impfung. Giuvenils a partir da 16 onns pon s'annunziar vinavant per in termin da vaccinaziun en il center da vaccinaziun a Cuira. La priorisaziun vegn alura fatga tenor il plan chantunal da vaccinaziun.

Vaccinaziuns cunter il coronavirus en apotecas
A partir dals 17 da zercladur 2021 porschan er apotecas vaccinaziuns cunter il coronavirus. 13 apotecas en il chantun sa participeschan a la campagna da vaccinaziun a partir da l'emna proxima. Ellas han quantitads da vaccins limitadas e sa drizzan a la populaziun mobila a partir da 18 onns. L'annunzia sto vegnir fatga sur l'apoteca.

Evitar termins dubels
Tgi ch'è vegnì vaccinà en la pratica d'ina media u d'in medi da chasa u en in'apoteca, vegn supplitgà d'annullar eventuals termins u eventualas preannunzias tar ils centers da vaccinaziun. Quai per simplifitgar la planisaziun dals termins da vaccinaziun. Per evitar termins dubels (center da vaccinaziun / pratica da la media u dal medi da chasa) vegnan las persunas, che vulan sa laschar vaccinar, supplitgadas d'annullar lur annunzia tar il center da vaccinaziun sur la plattafurma da vaccinaziun, sch'ellas survegnan in termin tar la media u il medi da chasa. Quai è pussaivel directamain per SMS / per e-mail (ad impfung@amz.gr.ch) u sur la hotline (+41 81 254 16 00).

Las infurmaziuns davart las vaccinaziuns cunter il coronavirus vegnan cumplettadas cuntinuadamain sin la pagina d'internet www.gr.ch/vaccinar.


Infurmaziuns:
Post da communicaziun per il coronavirus dal chantun Grischun, e‑mail kfsmedien@amz.gr.ch



Gremi: Uffizi da sanadad
Funtauna: Chanzlia chantunala

Neuer Artikel