Navigation

Inhaltsbereich

  • Erste Mitteilung
  • Neuen Beitrag einfügen

A chaschun da l'ediziun da quest onn dal Magazin MIX per la diversitad en il Grischun cun il tema central «vegliadetgna e migraziun» organisescha il Post spezialisà per l'integraziun, en il rom d'in partenadi cun la Scola auta spezialisada dal Grischun, in’occurrenza al podium. En il focus stattan las differentas situaziuns da vita ed ils divers basegns da la populaziun immigrada pli veglia sco er las cundiziuns generalas che nossa societad porscha per in daventar vegl en moda autodeterminada.

En il Grischun vivan actualmain circa 3150 senioras e seniors cun naziunalitad estra. Lur ragischs han ellas ed els en passa 60 differents pajais. En blers aspects na sa differenzieschan lur situaziuns da vita en general betg da quella da senioras e seniors svizzers. Er els èn confruntads cun dumondas sco: «Tge models d'abitar datti ed als poss jau ma prestar?», «Co mantegn jau mia dignitad?», «Vegn jau er stimà sco uman vegl?», «Co m'apport jau en la societad?». Tuttina datti particularitads, cun las qualas persunas pli veglias immigradas pon esser confruntadas. Pervia da lur biografia da lavur han ellas eventualmain stuì supportar chargias economicas e grevezzas da sanadad pli grondas. Ubain ch'ellas han fatg l'experientscha che la difficultad da chapientscha ha manà a largias d'infurmaziun ed a dischavantatgs areguard la situaziun giuridica ed areguard ils servetschs per la vegliadetgna. Forsa han ellas u els fatg l'experientscha da vegnir exclus da la societad ed èn confruntads cun il dilemma tranter returnar en lur pajais da derivanza e restar en Svizra.

Diversitad è il mintgadi en il Grischun
Il Magazin MIX per la diversitad en il Grischun infurmescha davart ils temas integraziun e migraziun. El presta pia ina contribuziun impurtanta per la discussiun objectiva davart dumondas da la convivenza tranter la populaziun indigena e la populaziun estra. Mintga ediziun metta il focus sin in accent tematic e porscha savida fundada davart temas actuals e davart temas da la politica sociala. La diversitad da las contribuziuns politicas, economicas, socialas, culturalas, individualas, demograficas ed artisticas èn in simbol per ils divers secturs da nossa societad ch'èn d'impurtanza per l'integraziun e per la participaziun. Il Magazin MIX cumpara mintgamai la fin da l'atun e po vegnir empustà gratuitamain.

Discussiun al podium davart la populaziun immigrada pli veglia
A chaschun da la nova ediziun dal Magazin MIX fa il Post spezialisà per l'integraziun – ils 18 da november – ensemen cun persunas immigradas, cun la Spitex e cun la Pro Senectute ina preschentaziun generala davart la situaziun actuala da persunas immigradas pli veglias en il Grischun. L'occurrenza ha lieu en l'aula da la Scola auta spezialisada dal Grischun a Cuira. Igl è er pussaivel da sa participar online via live-stream. L'entrada è gratuita. Per sa participar a l'occurrenza al lieu dovri in certificat COVID ed in document d'identitad. Ulteriuras infurmaziuns davart la discussiun al podium e davart il Magazin MIX per la diversitad en il Grischun chattais Vus sut www.integration.gr.ch.

Agiunta:

Giasts, program e decurs da la discussiun al podium

Infurmaziuns:

Felix Birchler,manader dal Post spezialisà per l'integraziun/incumbensà chantunal d'integraziun, tel. +41 81 257 36 84, e‑mail Felix.Birchler@afm.gr.ch

 

Responsabladad: Post spezialisà per l'integraziun

Neuer Artikel