La Regenza ha prendì posiziun tar las petiziuns dal quart parlament da mattas. Il Cussegl grond ha acceptà quellas en il rom da la sessiun da zercladur 2022 e las ha transmessas a la Regenza per l'ulteriura elavuraziun. En las trais dumondas che la Regenza ha tractà, èn las petiziunarias s'engaschadas «Per in traffic public attractiv ed ecologic» e per «Lavur mobila en tut il chantun Grischun» sco er cunter «Maletgs erotics nungiavischads e grooming».
Ils 11 da november 2021, al quart parlament da mattas, han 67 dunnas giuvnas dal Grischun debattà davart temas actuals. Da discussiuns engaschadas e constructivas en la sala dal Cussegl grond a Cuira èn resultadas tut en tut sis propostas che las participantas han surdà la saira en furma da petiziuns al president da la Regenza da quella giada Mario Cavigelli. Ils 16 da november 2021 ha la Regenza decidì, da surlaschar tut las sis petiziuns al Cussegl grond per la discussiun. La finala èn trais da las sis petiziuns vegnidas transmessas a la Regenza per l'elavuraziun.
Per in traffic public attractiv ed ecologic
Cun la petiziun «Per in traffic public attractiv ed ecologic» han las 67 scolaras dal 1. fin il 3. stgalim superiur prendì en mira la midada dal clima. Grazia ad in'amplificaziun dal traffic public duai il Grischun prestar ina contribuziun impurtanta per reducir la svapur da CO2. Particularmain duai l'electrificaziun dal traffic public en il chantun vegnir accelerada entaifer ils proxims onns. Per l'ina duai il chantun pajar ina contribuziun finanziala per quest intent e per l'autra duain las vischnancas e las interpresas da transport vegnir sustegnidas uschia. Suenter ch'il december 2022 è stà en funcziun in bus electric en il Grischun, vegni fatg quint fin il december 2023 cun var 15 vehichels da questa spezia. En sia resposta renviescha la Regenza plinavant al fatg, che l'amplificaziun dal traffic public è – en collavuraziun cun partenaris relevants – ina incumbensa permanenta e che quest svilup è en curs gia dapi plirs onns. L'engrondiment futur da las purschidas en il traffic public duai vegnir integrà en in concept chantunal dal traffic public, che sto anc vegnir elavurà. En il rom da l'elavuraziun da la petiziun, concluda la Regenza ultra da quai, co ch'ils ulteriurs giavischs da las petiziunarias vegnan tractads e realisads.
Lavur mobila en tut il chantun Grischun
La Regenza beneventa er la confruntaziun dal parlament da mattas cun la dumonda actuala pertutgant la lavur mobila en il chantun Grischun. Ella accentuescha, ch'il Grischun – sco plazza economica, sco chantun turistic e sco patrun – veglia acceptar questa tendenza en moda averta e proactiva. Pia fa il chantun grondas stentas per stgaffir las cundiziuns generalas per la lavur mobila – saja quai cun promover la transfurmaziun digitala, novs models da lavur u la cumpatibilitad da la professiun cun la famiglia. La lavur mobila è dentant ina incumbensa cuminaivla e sia realisaziun concreta pretenda, che las patrunas ed ils patruns prendian er mesiras.
Maletgs erotics nungiavischads e grooming
Sut la noziun da «grooming» chapeschan ins l'entrada en contact sistematica (savens en social media) da persunas creschidas cun uffants e cun giuvenils, e quai cun l'intent da far abus. La Regenza ha enconuschientscha dals resultats d'in studi (Studi James, Scola auta turitgaisa per scienzas applitgadas, 2022), tenor il qual passa 40 pertschient da tut ils giuvenils èn gia vegnids contactads ina giada en l'internet d'ina persuna estra cun intenziuns sexualas nungiavischadas. Pia èsi fundamentalmain impurtant, che las scolaras ed ils scolars sappian, a tgi ch'els pon sa drizzar svelt ed en moda simpla en cas da basegn. Medemamain èsi necessari, che la scola haja las enconuschientschas necessarias areguard l'ir enturn ed il sustegn dals uffants e dals giuvenils e possia er intermediar questas enconuschientschas. Perquai incumbensescha la Regenza l'Uffizi per la scola populara ed il sport da sensibilisar las scolas popularas per la tematica da la petiziun e da render attent als posts d'annunzia ed als posts spezialisads ch'existan gia sco er a las plattafurmas d'infurmaziun.
Agiuntas:
Infurmaziuns:
Servetsch da communicaziun, Chanzlia chantunala, tel. +41 81 257 22 18, e‑mail kommunikation@gr.ch
Responsabladad: Regenza