A la secziun Son Gagl dal Club alpin svizzer CAS ha la Regenza concedì ina contribuziun da maximalmain 170 300 francs ord la finanziaziun speziala Sport per sanar la chamona CAS Silvretta. Ils custs totals dal project èn calculads cun 908 834 francs.

La secziun Son Gagl dal CAS posseda e tgira la chamona CAS Silvretta. Ella è situada sin il territori communal da Claustra sin 2337 meters sur mar e cumpiglia trais chamonas (numnadas chasa principala, chamonetta d'enviern e stalla d'asens). Sco lieu da passadi en direcziun dal Montafon u da l'Engiadina Bassa è ella d'impurtanza per persunas che fan turas da skis e che van cun gianellas, sco er per viandantas e viandants. Pervia da sia buna cuntanschibladad è la chamona adattada er per famiglias. La «veglia» chamona Silvretta (ussa chamonetta d'enviern) e la stalla d'asens èn vegnidas construidas gia l'onn 1891 ed èn uschia dus dals pli vegls edifizis dal CAS ch'existan anc en il chantun Grischun.

En quai che reguarda l'isolaziun e l'umiditad è la chamonetta d'enviern oz en in stadi desolat. Sut cundiziuns normalas n'è ina pernottaziun perquai betg pli supportabla. En il rom da la renovaziun vegnan eliminadas las mancanzas architectonicas. Plinavant daventa l'alloschi pli attractiv per famiglias e pli pratic per gruppas pli pitschnas. Tras la modernisaziun resulta a medem temp ina pussaivladad segira e simpla da pernottar durant il temp senza guardiachamona, ordaifer la stagiun principala. Quai meglierescha supplementarmain l'utilisaziun per curs da giuventetgna e da scolaziun.

© Club alpin svizzer CAS

Infurmaziuns: Departament d'educaziun, cultura e protecziun da l'ambient

La Regenza ha concedì ina contribuziun da maximalmain 186 900 francs ord la finanziaziun speziala Sport per construir la nova chasa da battasendas Ganda a Landquart ed ha uschia approvà la dumonda da l'uniun «Pfadiheim Ganda Landquart».

Cun circa 130 commembras e commembers èn ils battasendas Falkenstein Landquart ina da las pli grondas organisaziuns da battasendas en il chantun Grischun. Els sa scuntran mintgamai la sonda per lur activitads d'uniun. Per pudair far en il futur ils exercizis er da mal'aura e durant l'enviern sut tetg, vul l'uniun construir ina nova chasa da battasendas. Per quest intent han las commembras ed ils commembers dals battasendas Falkenstein fundà aposta l'uniun «Pfadiheim Ganda Landquart». Il chantun sustegna las localitads che l'uniun dovra per las atgnas activitads. Quai èn ina stanza da material, stanzas da sesidas, in sectur da gieu sco er indrizs sanitars e stabiliments al liber. Ultra da quai èn er planisadas localitads da durmir generusas cun in local da segiurn e cun ina cuschina gronda. Ils custs totals da la nova chasa importan circa 2,26 milliuns francs.

Infurmaziuns: Departament d'educaziun, cultura e protecziun da l'ambient

A las organisaziuns che fan part da l'Associaziun grischuna da sport (AGS) ha la Regenza concedì contribuziuns da totalmain 1,3 milliuns francs ord la finanziaziun speziala Sport. Las associaziuns da sport grischunas prestan ina lavur da basa impurtanta per promover il sport da massa e da prestaziun. Cun las contribuziuns pauschalas per la lavur generala da las associaziuns e da las uniuns sustegna il chantun las prestaziuns da las 42 organisaziuns da sport a favur da las uniuns da sport grischunas.

Infurmaziuns: Departament d'educaziun, cultura e protecziun da l'ambient

La Regenza ha approvà la revisiun parziala da la planisaziun locala da Silvaplauna, che la vischnanca aveva concludì ils 23 da november 2023. Uschia vegnan creadas las premissas per stgaffir spazi d'abitar per persunas indigenas sin la plazza da parcar existenta en il territori Surlej sco er per construir in hotel per augmentar las capacitads d'alloschament turisticas.

Per quest intent vegn determinada la zona speziala d'abitar e d'hotel Foppas. La surfatscha necessaria dad 8624 meters quadrat vegn transferida da la zona d'abitar 2 a questa nova zona speziala.

Infurmaziuns: Departament d'economia publica e fatgs socials

Per la segunda etappa da realisaziun dal project per il svilup regiunal (PSR) Val Stussavgia ha la Regenza garantì ina contribuziun chantunala maximala da circa 2,65 milliuns francs a l'uniun PSR Val Stussavgia. Questa contribuziun vegn concedida sut la premissa, che la Confederaziun paja ina contribuziun da circa 3,14 milliuns francs. Ils custs subvenziunabels importan circa 7,92 milliuns francs.

Il PSR Val Stussavgia, ch'è vegnì lantschà l'onn 2020, è in project voluminus per il svilup regiunal. L'emprima etappa cumpiglia 10 projects parzials, che han survegnì ina garanzia da contribuziuns gia il favrer 2025. La segunda etappa, che vegn ussa realisada, cumpiglia 7 projects parzials. Qua tras duai l'agricultura da la Val Stussavgia vegnir diversifitgada pli fitg, per che famiglias possian vinavant lavurar e viver en la val. Differentas mesiras duain promover la producziun, l'elavuraziun e la vendita da products agriculs sco er l'extensiun da la purschida agroturistica e d'ulteriuras purschidas ed uschia sustegnair las chadainas regiunalas da valurisaziun.

Infurmaziuns: Departament d'economia publica e fatgs socials