La Regenza ha prolungà l'incarica da prestaziun cun l'Uniun GRdigital per promover la transfurmaziun digitala en il Grischun. Plinavant ha ella prendì posiziun davart in project da consultaziun da la Confederaziun en connex cun midadas planisadas per la legislaziun stradala.
La Regenza ha prolungà l'incarica da prestaziun cun l'Uniun GRdigital
La Regenza ha prolungà l'incarica da prestaziun cun
l'Uniun GRdigital per tschintg ulteriurs onns fin ils 31 da december 2030. Sco
organisaziun spezialisada interdisciplinara surpiglia l'Uniun GRdigital gia dapi
l'onn 2021 incumbensas
centralas per il chantun per promover la transfurmaziun digitala en il
Grischun.
Ils onns 2026 fin
2030 metta il chantun a disposiziun en media 460 000 francs per onn per
las lavurs generalas da l'uniun e per l'indemnisaziun da las commembras e dals
commembers dal cussegl spezialisà. Quests daners vegnan pajads en il rom d'ina
limita dals custs per l'entira durada da l'incarica da prestaziun, uschia che
l'indemnisaziun totala importa maximalmain 2,3 milliuns francs.
Fin ussa ha
l'uniun sustegnì il chantun cunzunt tar la promoziun da la transfurmaziun
digitala, quai cun sviluppar e realisar las mesiras necessarias per
identifitgar, inizialisar, accumpagnar e coordinar projects da digitalisaziun.
L'incarica da prestaziun per ils proxims tschintg onns cuntegna er anc
ulteriuras incumbensas. Da nov sa posiziunescha l'Uniun GRdigital pli fitg sco
post da consultaziun e sco center per la coordinaziun, per il transfer da
savida e per las colliaziuns en il mund digital dal Grischun. En il center stat
qua la collavuraziun tranter pliras firmas e branschas, cun in focus spezial
sin interpresas pitschnas e mesaunas (IPM).
Ulteriuras
infurmaziuns: https://www.grdigital.digital/rm
© Gritec
Infurmaziuns: Departament d'economia publica e fatgs
socials
La Regenza ha prolungà l'incarica da prestaziun cun l'Uniun GRdigital per tschintg ulteriurs onns fin ils 31 da december 2030.
Reducziun da la sveltezza e protecziun cunter canera: posiziun da la Regenza davart midadas planisadas da la Confederaziun
La Regenza ha prendì posiziun davart in project da
consultaziun dal Departament federal per ambient, traffic, energia e
communicaziun (DATEC) en connex la realisaziun da la moziun Schilliger «Segirar
l'ierarchia da la rait da vias entaifer ed ordaifer ils abitadis».
L'intervenziun parlamentara vul, che l'ierarchia da las vias existenta vegnia
mantegnida, sch'i sa tracta da reducir la sveltezza sin vias orientadas al
traffic. Plinavant pretenda ella, che questa premissa vegnia cumprovada tras
in'expertisa independenta. L'intervenziun vul proteger la populaziun cunter
canera sproporziunada dal traffic stradal en emprima lingia tras in'obligaziun
d'utilisar cuvridas che chaschunan pauca canera sin vias orientadas al traffic
entaifer ils abitadis.
En sia posiziun renconuscha la Regenza, che las
adattaziuns proponidas realiseschan da princip las finamiras da la moziun
Schilliger. La Regenza è dentant da l'avis, che la proposta giaja memia lunsch,
cunquai ch'ella priorisescha renovaziuns da cuvridas envers reducziuns da la
sveltezza. Il chantun beneventa il mantegniment da l'ierarchia da las vias sco
er la pussaivladad d'applitgar – sut tschertas premissas – vinavant tempo 30
per motivs da protecziun cunter canera. Pervia da l'efficacitad manglusa en regiuns
pli autas, pervia dals gronds custs e pervia da la restricziun da la libertad
d'agir refusa la Regenza dentant cleramain in'obligaziun generala da duvrar
cuvridas che chaschunan pauca canera. Tras la midada proponida restrenschess la
Confederaziun memia fitg l'autonomia dals chantuns e da las vischnancas sur las
ordinaziuns respectivas. La Regenza beneventa percunter ina glista proponida e
nunlianta da l'Uffizi federal d'ambient cun ina recumandaziun da cuvridas che
chaschunan pauca canera, uschenavant che soluziuns regiunalas restan vinavant
pussaivlas.
Dapli infurmaziuns:
Infurmaziuns:
Departament d'infrastructura, energia e mobilitad
La Regenza ha prendì posiziun davart in project da consultaziun dal Departament federal per ambient, traffic, energia e communicaziun (DATEC) en connex la realisaziun da la moziun Schilliger «Segirar l'ierarchia da la rait da vias entaifer ed ordaifer ils abitadis».
Glisch verda per novas abitaziuns da locaziun e da proprietad a Tavau
La Regenza ha approvà la revisiun parziala da la
planisaziun locala che la vischnanca da Tavau aveva concludì ils 9 da favrer 2025. Per che edifizis d'abitar cun abitaziuns da locaziun
e da proprietad sco er cun manaschis da servetsch sajan permess en l'avegnir en
la zona d'abitar Valbella a Tavau, èsi stà necessari d'adattar la planisaziun
d'utilisaziun.
En il rom da
l'adattaziun dal plan da zonas èn differentas parts da la zona vertenta per
manaschis da cura sco er da la zona da l'ur da l'abitadi1 vegnidas
attribuidas a la zona d'abitar Valbella. Tut en tut han 10 382 meters quadrat midà zona. Tenor las novas disposiziuns dastgan vegnir construids – en
la nova zona d'abitar Valbella – edifizis d'abitar cun abitaziuns da locaziun e
da proprietad. Entaifer la nova zona d'abitar èn plinavant admess manaschis da
servetsch, quai en ina dimensiun subordinada da maximalmain 10 pertschient
da la surfatscha totala d'auzada imputabla.
© Andrea Badrutt, Cuira
Infurmaziuns:
Departament d'economia publica e fatgs socials
La Regenza ha approvà la revisiun parziala da la planisaziun locala che la vischnanca da Tavau aveva concludì ils 9 da favrer 2025.
