La Cumissiun per politica da stadi e strategia dal Cussegl grond (CPSS) ha predeliberà la missiva da la Regenza tar l'introducziun da la vegliadetgna da votar 16. La maioritad s'exprima a favur dal project.
Sut l'egida dal president da la cumissiun Kevin Brunold ed en preschientscha dal president da la Regenza Martin Bühler, schef dal Departament da finanzas e vischnancas, ha la CPSS predeliberà la missiva da la Regenza tar la revisiun parziala da la Constituziun chantunala e da la Lescha davart ils dretgs politics (introducziun da la vegliadetgna da votar 16). Il project prevesa da sbassar la limita da vegliadetgna a 16 onns per il dretg da votar e per il dretg d'eleger activ. Il dretg d'eleger passiv, quai vul dir la pussaivladad da sez dastgar vegnir elegì, resta tar 18 onns (communicaziun a las medias da la Regenza). L'impuls per questa missiva aveva dà l'incumbensa dal deputà Derungs concernent l'introducziun dal dretg da votar a la vegliadetgna da 16 onns (dretg da votar e d'eleger activ), ch'il Cussegl grond ha surdà il zercladur 2022 a la Regenza per la realisaziun.
La maioritad recumonda da deliberar il project per mauns da la votaziun dal pievel
La cumissiun predeliberanta è entrada unanimamain en la fatschenta. Tenor sia opiniun èsi numnadamain gist, ch'il Cussegl grond sa fatschenta cun il tema e prenda posiziun. Quai che pertutga il cuntegn n'è la CPSS però betg adina stada perina: Ina minoritad da la cumissiun refusa la vegliadetgna da votar 16. In'autra part da la cumissiun è sceptica envers la vegliadetgna da votar 16. Ella è però da l'opiniun ch'il project duai vegnir suttamess al pievel per la votaziun, per che las votantas ed ils votants possian decider sezs davart questa impurtanta dumonda da la politica da stadi. E la finala datti en la CPSS er cleras aderentas e clers aderents dal project. La maioritad da la CPSS recumonda pia al Cussegl grond da deliberar la revisiun parziala da la Constituziun chantunala per mauns da la votaziun dal pievel.
La fatschenta vegn tractada dal Cussegl grond en la sessiun d'avrigl 2026. Sche las relaziuns da forzas en il Cussegl grond restan pli u main tuttina sco en la cumissiun, dastgan las votantas ed ils votants decider l'atun 2026 sezs a l'urna.
Infurmaziuns:
Kevin Brunold, president da la Cumissiun per politica da stadi e strategia, tel. +41 78 847 62 68, e‑mail Kevin.Brunold@icloud.com
Responsabladad: Cussegl grond / Cumissiun per politica da stadi e strategia