Èn colliaziuns da glistas permessas?
Gea. Duas u dapli propostas electoralas pon vegnir colliadas ina cun l'autra. Quai cun ina decleranza concordanta da las represchentantas e dals represchentants respectivs ubain da las substitutas e dals substituts respectivs. Colliaziuns da glistas èn irrevocablas.
Èn sutcolliaziuns da glistas permessas?
Gea. Dentant mo tranter glistas dal medem num (medema denominaziun principala) che sa differenzieschan ina da l'autra mo tras in supplement areguard la regiun, la schlattaina, la vegliadetgna u l'ala da la gruppaziun. I sto vegnir inditgada ina glista da tschep.
Èn sut-sutcolliaziuns da glistas permessas?
Na (art. 31 al. 1 LDP).
Tge effect han colliaziuns da glistas?
Per reparter ils sezs vegnan las glistas colliadas tractadas – en cumparegliaziun cun las autras glistas – sco in'unica glista. L'emprim vegn eruì il dumber da sezs che cumpeta a la gruppa da glistas colliadas ed en ina segunda distribuziun vegnan ils sezs repartids sin las singulas glistas da la gruppa (art. 42 LDP).
Exempel: La partida A ha cuntanschì 4121 vuschs
La partida B ha cuntanschì 3912 vuschs
La cifra da repartiziun è 500
Senza colliaziun da glistas survegn la partida A 4121: 500 = 8 sezs; rest = 121
Senza colliaziun da glistas survegn la partida B 3912: 500 = 7 sezs; rest = 412
La partida A perda pia: 121 vuschs
La partida B perda pia: 412 vuschs
>Total da las vuschs persas 533 vuschs
En cas d'ina colliaziun da glistas vegnan quintadas ensemen las vuschs d'omaduas partidas, numnadamain 4121 + 3912 = 8033.
Suenter vegn il dumber total da las vuschs dad 8033 dividì tras la cifra da repartiziun 500. Quai dat 16 sezs, pia a favur dad omaduas partidas 1 sez dapli che senza colliaziun da glistas. Cun auters pleds: empè da 533 van a perder mo 33 vuschs.
Co vegn calculada la cifra da repartiziun?
Il dumber da las vuschs da partida valaivlas da tut las glistas vegn dividì tras il dumber da sezs ch'èn d'occupar plus 1. La proxima cifra pli auta sa numna cifra da repartiziun. Alura vegnan attribuids a mintga glista uschè blers sezs, sco quai che la cifra da repartiziun è cuntegnida en ses dumber da vuschs. Sche partidas u gruppaziuns fan ina colliaziun da glistas, las vegnan dabun ils rests che na vegnan betg resguardads en il dumber da las vuschs da partida, cura ch'i vegn fatg la divisiun cun la cifra da repartiziun. Quai èn ils rests che giessan uschiglio a perder.