Il Post spezialisà per l'integraziun ha lantschà in project per rinforzar la cumpetenza da sa preschentar da persunas fugidas. Quest project vegn realisà en il rom dal program «Stabilisaziun ed activaziun da las resursas da persunas cun basegns spezials» dal Secretariat da stadi per la migraziun. L'entschatta è vegnida dada sonda, ils 11 da november 2023, cun l'emprima part d'in lavuratori da teater da forum, al qual han participà 15 intermediaturas ed intermediaturs. Quellas persunas han sezzas stuì fugir e partan lur savida a chaschun dad engaschaments multifars cun persunas fugidas che abiteschan da nov en il Grischun.

Suenter in'introducziun en la tecnica dal teater da forum tras dus manaders da curs da l'organisaziun «Forumtheater Schweiz» han las participantas ed ils participants skizzà differents temas da conflict or da lur mintgadi persunal. En in proxim pass ha la gruppa sviluppà vinavant ils dus temas «rassissem quotidian» e «sentiments da nunpussanza durant spetgar sin decisiuns da las autoritads». Cun represchentar las situaziuns concretas ed integrar il public han ins tschertgà alternativas e soluziuns per il problem demonstrà.

Per concepir vinavant il project «Rinforzament da la cumpetenza e segirtad da sa preschentar da persunas fugidas» vegn fundada ina gruppa da coc dad intermediaturas ed intermediaturs che han absolvì il lavuratori da pilot. La finamira è ina purschida a lunga vista en il chantun Grischun.

Ulteriuras infurmaziuns davart la metoda: www.forumtheaterschweiz.ch (DE)