La cussegliaziun linguistica individuala pertutgant il tudestg sa drizza tant tenor la populaziun immigrada da lingua estra sco er tenor las persunas indigenas ch'èn interessadas d'obtegnair ina integraziun linguistica u che s'occupan professiunalmain u privatamain da l'integraziun da migrantas e da migrants.

Questa cussegliaziun dat a persunas interessadas la pussaivladad da s'infurmar gratuitamain ed independentamain d'in offerent da curs da lingua u d'ina scola da linguas davart la purschida da curs da lingua e d'integraziun en il chantun ed ella cumpiglia definiziuns individualas dal standard linguistic che tanschan dal nivel A0 fin al nivel B2. Ina tala cussegliaziun vegn fatga cun agid da tests da classificaziun e cun agid d'in discurs da cussegliaziun, en il qual vegnan scleridas las cumpetenzas communicativas ch'èn avant maun sco er valitadas las abilitads da leger e da scriver per tudestg.

Nus cussegliain er persunas che n'han betg pudì frequentar ina scola en lur pajais d'origin e che n'èn betg vegnidas alfabetisadas u che han gì mo pauca scolaziun, sco er persunas ch'èn vegnidas alfabetisadas cun in auter sistem da scrittira.

La finamira è quella d'eruir – sin fundament dal standard linguistic – in curs da lingua adattà. Per valitar il nivel linguistic tenor la norma europeica communabla (NEC) vegnan resguardadas er l'experientscha da scola vertenta e la disa d'ir a scola.

Las cussegliaziuns linguisticas ed ils tests da classificaziun ston vegnir chapids exclusivamain sco recumandaziun. Per l'attribuziun definitiva als curs valan ils tests da classificaziun dals offerents da curs da lingua.

La purschida da cussegliaziun stat a disposiziun a tut las persunas interessadas mintgamai la gievgia da las 13.00 fin las 18.30.