Navigation

Inhaltsbereich

Far affars senza sfarlattar energia

En mintga interpresa datti potenzial da spargnar energia che variescha tut tenor la branscha. Faschai in'optimaziun professiunala dal manaschi per Vossa firma e spargnai cun mesiras simplas gia 10 fin 15 % dals custs d'energia.

Suenter che Vus avais realisà las mesiras per optimar il manaschi, pudais Vus mesirar ils resultats entaifer il manaschi ed als communitgar cun agid dal calculader da respargns: Suandai il link al calculader da respargns de al mussavia.

Noss 5 megliers tips per spargnar energia

1. Laschar sortir l'aria dals radiaturs
Laschai sortir l'atun l'aria dals radiaturs, en cas ch'els blublegian, sgarguglian u tschivlan u sch'els vegnan mo per part chauds. Independentamain da quai duessan ils radiaturs vegnir ventilads mintga trais onns. Il stgaudament lavura uschia puspè en moda effizienta e dovra damain energia.

2. Adattar las uras da manaschi
Aria stagnada en ils locals è in indizi che la ventilaziun n'è betg giustada optimalmain. Adattai las uras da manaschi a l'utilisaziun dals locals effectiva e reduci la prestaziun da la ventilaziun u la serrai giu gist dal tut durant las uras ch'ella na vegn betg duvrada. Sche Vus serrais giu la ventilaziun mintga di da las 20.00 fin las 06.00, sa reducescha ses consum d'energia per fin a 40 %.

3. Serrar frestgeras e glatscheras
Ordaifer ils temps d'avertura duessan las frestgeras vegnir serradas consequentamain. Adattads per quest intent èn schalusias da notg, cuvertas u portas da vaider. Uschia resta il fraid en las frestgeras e glatscheras e Vus evitais variaziuns da temperaturas nungiavischadas. Controllai che tut las frestgeras e glatscheras sco vitrinas, curunas e chaschas d'acziun sajan serradas ordaifer las uras d'avertura (durant la notg, la fin d'emna).

4. Eliminar foras en la rait d'aria cumprimida
Er en ina rait d'aria cumprimida che vegn controllada e tgirada regularmain van savens a perder 25 fin 60 % da l'aria sur foras. Controllai mintga onn ch'il sistem da conducts d'aria cumprimida n'haja betg foras, marcai e stuppai eventualas foras.

5. Remplazzar glischs fluorescentas
Il mantegniment d'ina illuminaziun pli veglia cun glischs fluorescentas dovra blera lavur da mantegniment. Controllai en locals cun lungs temps d'utilisaziun, sch'i cunvegn a curta vista da remplazzar las glischs fluorescentas tras bischens dad LED. Planisai a lunga vista il meglier cun in nov indriz d'illuminaziun che spargna energia.

Ulteriurs tips per spargnar energia chattais Vus qua.

Mesiras preparatoricas e cumportaments

Mesiras preparatoricas ed instrucziuns da cumportament da l'Uffizi federal per il provediment economic dal pajais chattais Vus qua.

Sin la pagina d'internet da la OSTRAL (Organisaziun naziunala per il provediment d'electricitad en situaziuns extraordinarias) chattais Vus infurmaziuns per consuments gronds.

Mesiras pussaivlas en cas d'ina situaziun da mancanza d'electricitad

Mögliche Massnahmen bei einer Strommangellage

L'electricitad è d'ina impurtanza centrala tant per la populaziun sco er per l'economia. Sche la purschida d'electricitad e la dumonda d'electricitad n'èn durant plirs dis, emnas u schizunt mais betg pli en concordanza ina cun l'autra, discurran ins d'ina stretga en il provediment d'electricitad u d'ina mancanza d'electricitad. Ina tala situaziun po per exempel daventar reala, sch'ils livels da l'aua en ils flums u en ils lais da fermada èn bass, sche la producziun d'electricitad en Svizra è perquai reducida e sch'il deficit na po betg vegnir cuvrì cun imports supplementars.

En Svizra è il provediment d'electricitad da princip chaussa da l'economia. Sche l'economia n'è betg pli abla da far frunt ad ina situaziun da mancanza cun agens meds, intervegn la Confederaziun en moda directiva. Per la preparaziun e la realisaziun da mesiras per dar dumogn ad ina mancanza d'electricitad è cumpetent il Provediment economic dal pajais.

En cas d'ina mancanza d'electricitad datti bain electricitad, dentant memia pauca. En in emprim pass vegniss la Confederaziun perquai ad appellar a la populaziun ed a l'economia da spargnar energia e da reducir en moda voluntara il consum d'electricitad.

Sch'ils appels da spargnar na tanschan betg, po il Provediment economic dal pajais revegnir a las mesiras previsas per la gestiun da l'electricitad, per diriger il consum d'electricitad e la purschida da l'electricitad. Questas mesiras han la finamira da pussibilitar vinavant ina convivenza sociala normala en Svizra.

Mesiras pussaivlas en cas d'ina situaziun da mancanza da gas

Mögliche Massnahmen bei einer Gasmangellage

En Svizra è il provediment da gas da princip chaussa da l'economia. Sche l'economia n'è betg pli abla da far frunt ad ina greva situaziun da mancanza cun agens meds, intervegn la Confederaziun en moda directiva. Dal concept da gestiun e da las mesiras da tal vegni fatg diever mo en cas d'ina greva situaziun da mancanza imminenta u existenta. Questas mesiras gidan ad evitar in pegiurament da la situaziun da provediment ed ad impedir l'applicaziun da mesiras pli severas. Ellas vegnan adina messas en vigur per in temp limità e puspè abolidas uschè svelt sco pussaivel.


Ils sbozs da las ordinaziuns vegnan mess en vigur pir en cas d'ina greva situaziun da mancanza e ston lura vegnir adattads resguardond la situaziun actuala. Per exempel pudessan differentas regiuns esser pertutgadas en moda differenta d'ina mancanza da gas. La dimensiun da las mesiras sto plinavant adina vegnir adattada a la grevezza da la situaziun da mancanza. Tut tenor il decurs da la situaziun da mancanza èsi er pussaivel da realisar las mesiras en etappas.


Uschespert ch'ina situaziun da mancanza sa mussa, vegnan proclamads appels da spargnar a tut las consumentas ed ils consuments da gas natiral. Sche la situaziun da mancanza sa pegiurescha malgrà l'appel da spargnar voluntarmain, po il Cussegl federal interrumper las furniziuns da gas natiral per tut ils implants commutabels. En vista a la situaziun actuala ha il Cussegl federal delegà al Departament federal d'economia, furmaziun e retschertga DEFR da metter en vigur l'Ordinaziun davart la commutaziun d'implants da gas natiral bicombustibels en consequenza d'ina greva mancanza da gas natiral. Tras la commutaziun d'implants bicombustibels ad auters purtaders d'energia po vegnir cuntanschida svelt ina reducziun da 15 fin 20 pertschient dal consum da gas natiral.


Sche questas mesiras da gestiun na bastan betg per far frunt a la situaziun da mancanza e sch'i resulta in ulteriur pegiurament da la situaziun da provediment, pon vegnir pronunziads – tras in'ordinaziun – restricziuns da consumar e scumonds per tscherts intents d'utilisaziun. L'utilisaziun da gas en ils secturs dal temp liber e da wellness sco er per utilisaziuns betg relevantas per il manaschi pon vegnir scumandadas. Bains e servetschs d'impurtanza existenziala na dastgan betg esser pertutgads substanzialmain. En Svizra vegn ina gronda cumpart dal gas natiral utilisà per stgaudar. In potenzial per reducir il consum porscha pia oravant tut la reducziun da la temperatura dals locals.
En Svizra consumeschan las chasadas passa 40 pertschient da tut il consum da gas. Tut tenor la grevezza da la situaziun da mancanza e tut tenor l'effect dals appels da spargnar voluntarmain pon las restricziuns da consumar ed ils scumonds er tutgar las chasadas. Las restricziuns dal consum ed ils scumonds servan ad evitar tant sco pussaivel ina contingentaziun. Ina tala fiss colliada cun donns considerabels per l'economia publica.

En cas che las mesiras precedentas na tanschan betg, po il consum d'implants monocombustibels vegnir reducì cun agid d'ina contingentaziun. Quai pertutgass tut las consumentas ed ils consuments, cun excepziun dals clients protegids (chasadas e servetschs socials da basa). Ils «servetschs socials da basa» èn limitads qua sin ospitals e sin chasas da persunas attempadas e da tgira. Exceptads da la contingentaziun vegnan – ultra da la polizia e dals pumpiers – er tut ils manaschis dals secturs che garanteschan il provediment d'aua da baiver e d'energia, la serenaziun da l'aua persa e la dismessa da rument sco er ils manaschis che tegnan liber da naiv e da glatsch las stgomias da viafier. Las interpresas pertutgadas da la contingentaziun avessan la pussaivladad da vender ina a l'autra ils contingents betg duvrads sur in pool. Ils donns per l'economia publica pudessan uschia vegnir reducids.

Infurmaziuns per ulteriuras branschas