Cun il conclus dals 22 d'avust 2023 ha la Regenza designà la firma IntegrityPlus SA (IntegrityPlus), Turitg, sco post independent per l'annunzia d'incunvegnientschas tar l'administraziun chantunala, tar las dretgiras e tar ils instituts chantunals autonoms (excepziun: Banca Chantunala Grischuna).
Il chantun Grischun dat gronda paisa ad ina cultura d'interpresa che sa basa sin confidenza e respect. L'integritad persunala e dal manaschi duai vegnir protegida, incunvegnientschas entaifer l'administraziun chantunala dal Grischun duain vegnir messas a la glisch.
En cas d'indizis concrets ch'i dettia incunvegnientschas, pon e dastgan las collavuraturas ed ils collavuraturs natiralmain sa drizzar er vinavant a lur superiur(a) direct(a) u a lur proxim(a) superiur(a). Sche las incunvegnientschas na vegnan betg eliminadas, suenter ch'ellas èn vegnidas tematisadas internamain, u sch'i resultan conflicts d'interess, pon e duain ellas vegnir annunziadas al Post independent per l'annunzia d'incunvegnientschas.
Cliccai ils singuls titels per survegnir dapli infurmaziuns davart il tema.
Tgi è IntegrityPlus?
IntegrityPlus sustegna – cun in team interdisciplinar da persunas spezialisadas – interpresas ed organisaziuns da dretg public en tut las fasas d'in management efficazi d'incunvegnientschas, quai cun la finamira da rinforzar l'integritad dal manaschi e persunala.
Tgi po annunziar incunvegnientschas?
Collavuraturas e collavuraturs ch'èn actualmain engaschads tar l'administraziun chantunala, tar las dretgiras u tar ils instituts chantunals autonoms pon e duain annunziar incunvegnientschas.
Tge dastg e duai jau annunziar?
Collavuraturas e collavuraturs che han infurmaziuns davart incunvegnientschas tar l'administraziun chantunala dal Grischun, pon – cun lur annunzia – gidar essenzialmain a metter a la glisch ed ad eliminar questas incunvegnientschas.
In'annunzia sincera fa, tgi ch'è da l'avis ch'il cuntegn da sia annunzia saja vair, u sch'i dat buns motivs dad esser da l'avis ch'ils fatgs annunziads sajan probabels e che l'annunzia saja en il bain chapì interess da la patruna u dal patrun (q.v.d. «en buna fai»). Confurm a la lescha è il chantun Grischun obligà da proteger las persunas, che fan sinceramain in'annunzia, cunter discriminaziuns (p.ex. disditga, degradaziun en l'ierarchia e tut ils ulteriurs obstachels per la carriera, donns psichics e la toleranza da tals).
Tge èn incunvegnientschas tar l'organisaziun administrativa chantunala dal Grischun?
- Violaziuns da l'integritad persunala tras discriminaziun, mobing, mulestas sexualas u autras violaziuns da la persunalitad;
- violaziuns da l'integritad dal manaschi tras engion, corrupziun, acceptaziun d'avantatgs, defraudaziun, ma er ulteriurs fauss cumportaments finanzials;
- cuntravenziuns cunter las obligaziuns da servetsch, sco l'obligaziun da fidaivladad, l'obligaziun da prender recusaziun, l'obligaziun da discreziun u il scumond d'acceptar regals, u cunter prescripziuns da la protecziun da datas, da la protecziun da l'ambient u da la segirezza al plaz da lavur.
I na va betg per famas u per supposiziuns. Per in'annunzia dovri observaziuns ed infurmaziuns concretas. Per elavurar l'annunzia èsi impurtant che l'incunvegnientscha u il fauss cumportament vegnia descrit detagliadamain e precisamain. Quai vala en spezial per annunzias anonimas.
Co inoltresch jau in'annunzia al post d'annunzia?
Las annunzias duain vegnir inoltradas da preferenza via la plattafurma online. Alternativamain pon ellas er vegnir fatgas per telefon, per posta u per e-mail.
Resguardai per plaschair che mo atgnas datas persunalas vegnan tramessas per e-mail, però naginas datas persunalas estras e nagin material da cumprova. Quai pervia da la segirezza da las datas e pervia da la protecziun da datas.
Tge capita lura?
Suenter che IntegrityPlus ha survegnì in'annunzia d'ina incunvegnientscha via IntegrityLine, per telefon, per posta u per e-mail, daventa ella activa sco suonda:
- ella infurmescha l'annunziadra u l'annunziader ed ils posts cumpetents en moda adequata, ella cusseglia talas e tals (p.ex. sclerir, sche l'annunziadra u l'annunziader ha in basegn da protecziun immediat, infurmar davart il stadi da la procedura, dar sustegn cumpetent, discutar la situaziun e las opziuns d'agir sco er las mesiras recumandadas) ed ella procura che las persunas involvidas vegnian protegidas cunter dischavantatgs nungiustifitgads (p.ex. garantir il mantegniment da l'anonimitad da l'annunziadra u da l'annunziader e la protecziun da la persunalitad durant l'entir process da l'elavuraziun da l'annunzia);
- en cas da basegn sa drizza ella directamain a las persunas da contact da vart da la patruna u dal patrun (p.ex. en cas d'in basegn da protecziun), quai en furma anonima u betg anonima (cun garantir il mantegniment da l'anonimitad e la protecziun da la persunalitad durant l'entir process da l'elavuraziun da l'annunzia);
- sch'ella è da l'avis ch'ina mesira stoppia vegnir prendida urgentamain, infurmescha ella la patruna u il patrun e gida las instanzas cumpetentas a sclerir ils fatgs ed a realisar las mesiras;
- plinavant sto ella suttametter a la Regenza ina giada per onn in rapport davart sias activitads, per che quella saja p.ex. infurmada davart il dumber e davart il gener da las annunzias inoltradas sco er davart l'elavuraziun da talas e possia prender ulteriuras mesiras en cas da basegn.