Il mintgadi da lavur ha bleras fassettas captivantas – quellas pon dentant er chaschunar tensiuns u stress. Conflicts cun las collavuraturas ed ils collavuraturs, cun las superiuras ed ils superiurs u en il team, particularitads culturalas, squitsch da lavur, abus u violaziuns, surpassaments dals cunfins, discriminaziun u mulestas sexualas – per numnar mo intginas situaziuns engrevgiantas che pon resultar en il mintgadi. Sche la sfidas daventan memia grondas, po ina cussegliaziun psicologica esser utila. Savens bastan paucs discurs cun ina persuna spezialisada versada per chattar in nov equiliber sco er il plaschair da lavurar.
Sco patrun è il chantun Grischun obligà da proteger l'integritad fisica e psichica da sias collavuraturas e da ses collavuraturs. Per ademplir questa obligaziun en moda professiunala ha l'Uffizi da persunal endrizzà – en collavuraziun cun ils Servetschs psichiatrics dal Grischun (SPGR) – in post anonim da cussegliaziun psicologica.
Il Post da cussegliaziun psicologica consista d'in team da psicologas e psicologs che vegn coordinà da duas psicologas spezialisadas. Il team da cussegliaziun dals SPGR è cuntanschibel sut l'adressa dad e-mail PBS-Kanton@pdgr.ch u sut il numer da telefon 058 225 21 05.
Cliccai ils singuls titels per survegnir dapli infurmaziuns davart il tema.
En tge dumondas poss jau ma laschar cussegliar?
Il post anonim da cussegliaziun psicologica procura per la cussegliaziun en cas da
- grevezzas psichicas pervia da la lavur (p.ex. burnout, schliaziun da conflicts cun collavuraturas e collavuraturs, cun superiuras e superiurs u en il team)
- mobing
- discriminaziun
- mulestas sexualas
- problems da dependenza
Las psicologas ed ils psicologs discutan il problem concret cun la persuna che tschertga cussegl. Ensemen cun la persuna che tschertga cussegl sviluppan ellas ed els vias per schliar il conflict, la motiveschan da prender per mauns il problem e la sustegnan tar la schliaziun dal problem. Per quest intent han ellas ed els per regla a disposiziun fin diesch sesidas.
Tge custa la cussegliaziun?
La purschida da cussegliaziun psicologica è gratuita ed anonima (q.v.d. la persuna superiura u l'Uffizi da persunal na vegn betg infurmà). Las persunas spezialisadas èn suttamessas a l'obligaziun da discreziun per tut quai che las vegn confidà cun pratitgar lur professiun. Ellas instradeschan mesiras u consulteschan terzas persunas mo cun il consentiment da la persuna u da la gruppa da persunas che tschertga cussegl.
Il Post da cussegliaziun psicologica consista d'in team da psicologas e psicologs che vegn coordinà da duas psicologas spezialisadas.
Persunas da confidenza en cas da violaziun da l'integritad persunala
Il chantun Grischun protegia la persunalitad e la dignitad da tut las collavuraturas ed ils collavuraturs. Ellas ed els han il dretg sin protecziun da l'integritad spiertala e corporala al plaz da lavur.
Tras mobing, mulestas sexualas, discriminaziun e violenza vegn violada l'integritad persunala da las persunas pertutgadas. I sa tracta d'ina enumeraziun betg cumpletta da modas da cumportament che pon violar l'integritad persunala. La designaziun dal fauss cumportament è d'impurtanza secundara. I va per modas da cumportament che surpassan cunfins e che donnegeschan la segirezza da sasez. Il chantun Grischun spetga da sias collavuraturas e da ses collavuraturs ch'ellas ed els hajan ina demananza onesta, respectusa ed apprezianta in visavi l'auter ed observian ils cunfins persunals che las collegas ed ils collegas fan valair en il contact vicendaivel. Violaziuns da l'integritad èn scumandadas e na vegnan betg toleradas. Sch'i dat tuttina mobing, discriminaziun u mulestas sexualas a la lavur, pon e duain las collavuraturas ed ils collavuraturs contactar las persunas da confidenza chantunalas. Ellas preschentan opziuns d'agir e porschan ina cussegliaziun absolutamain confidenziala.
Las suandantas persunas da confidenza stattan a disposiziun:
Collavuraturas e collavuraturs da lingua rumantscha e taliana pon vegnir intermediads a persunas spezialisadas correspundentas entaifer il team. Ensemen cun la persuna da confidenza vegn tschertgada ina via per schliar il problem.