Il sectur analitic da la SV fa las analisas las pli differentas. Dad ina vart vegnan examinadas emprovas ch'èn vegnidas fatgas en il rom da l'activitad da controlla, da l'autra vart vegnan fatgas analisas per differentas instituziuns en il senn da servetschs. En il center da questas prestaziuns da servetsch stattan d'ina vart las analisas da las emprovas da l'aua da baiver per ils provediturs d'aua da baiver dal chantun Grischun, da l'autra vart las analisas per l'uffizi per la natira e l'ambient, per il qual i vegn examinà il cuntegn da las substanzas nuschaivlas da las emprovas las pli differentas (aua persa, aua da deponias, glitta da serenera, aua sutterrana). Incumbensas privatas vegnan fatgas da nus, sch'ellas sa laschan cunvegnir cun las incumbensas uffizialas e sche las capacitads correspundentas èn avant maun.

Ina gronda part da noss temp da lavur duvrain nus sper l'analitica er per documentar nossas datas dal lavuratori e dals andaments en il rom da l'accreditaziun "ISO" (organisaziun internaziunala da normas) tenor ISO 17025:1999 sco er per sviluppar nossas atgnas bancas da datas nua che questas datas vegnan depositadas.

Mintg'onn vegnan realisadas da noss persunal spezialisà cumpetent ca. 150'000 mesiraziuns tras var 500 metodas d'analisa documentadas.
Ultra da quai porscha il sectur da laboratori mintga trais onns a 2 emprendistas u emprendists ina scolaziun da basa fundada sco laboranta u sco laborant da chemia.

Il LvbGR, medemamain accredità tenor ISO 17025:1999, è ina partiziun integrada en l'uffizi per la segirezza da victualias e per la sanadad d'animals che serva a la diagnostica da labor e d'epidemias da la medischina veterinara.
Cun la diagnostica d'epidemias contribuin nus ina part essenziala per la surveglianza d'epidemias e da malsognas d'animals per incumbensa dal servetsch veterinar dal USVA dentant er per incumbensa dals servetschs veterinars d'ulteriurs chantuns. Cun ulteriuras diagnosticas da labor per la medischina veterinara cuntentain nus il basegn da la diagnostica da las praticas veterinaras.